បាត់ដំបងៈ មន្ត្រីខេត្តបាត់ដំបងបានឱ្យដឹងថា សកម្មភាពទន្ទ្រានកាន់កាប់ដីខុសច្បាប់បានកំពុងតែបន្តកើតមាននៅក្នុងតំបន់ព្រៃលិចទឹកនៃបឹងទន្លេសាបជាច្រើនពាន់ហិកតា ទន្ទឹមពេលដែលអាជ្ញាធរមូលដ្ឋាន ខ្វះខាតធនធាន និងសម្ភារ ជាមធ្យោបាយក្នុងការការពារ និងការអភិរក្ស។
លោក សឿម ប៊ុនរិទ្ធិ អ្នកនាំពាក្យរដ្ឋបាលខេត្តបាត់ដំបងប្រាប់ ភ្នំពេញ ប៉ុស្តិ៍ នៅថ្ងៃទី ៣១ ខែ ឧសភា ឆ្នាំ ២០២១ នេះឱ្យដឹងថា ក្នុងរយៈពេល ២ ឆ្នាំចុងក្រោយ គឺឆ្នាំ ២០១៩ និងឆ្នាំ ២០២០ មានករណីចូលទន្ទ្រានរានយកដីព្រៃលិចទឹកនៅក្នុងតំបន់ ៣ ក្នុងមូលដ្ឋានខេត្តបាត់ដំបងមានសភាពខ្លាំងជាងឆ្នាំៗមុន ដែលជាតំបន់រាជរដ្ឋាភិបាលហាមឃាត់ដាច់ខាត គឺមិនឱ្យមានការទន្ទ្រានរានយកដីធ្វើជាកម្មសិទ្ធិ។
លោកថា៖ «ក្នុងរយៈពេលកន្លងមកនេះ គឺមានចលនាពីជនទុច្ចរិតឱ្យពលរដ្ឋចូលទៅទន្ទ្រានកាន់កាប់ដីរបស់រដ្ឋ ដែលរដ្ឋបាលខេត្តបានកត់សម្គាល់ឃើញថា មានចលនាថ្មីមួយដែលមិនធ្លាប់មានពីមុនមក គឺចលនាឱ្យប្រជាពលរដ្ឋដើរតួជំនួសឱ្យម្ចាស់ដីធំ»។
លោកថ្លែងថា៖ «យើងសួរថា បើប្រជាពលរដ្ឋក្រីក្រ ហេតុអ្វីបានជាទន្ទ្រានយកដីរាប់រយ និងរាប់ពាន់ហិកតាបាន បើពលរដ្ឋមានត្រឹមតែចបជីក និង ចបកាប់។ អានេះ សុទ្ធតែអាត្រាក់ទ័រហ្នឹង»។
លោក ប៊ុនរិទ្ធិ ថ្លែងថា រដ្ឋបាលខេត្តក៏បានកសាងសំណុំរឿង និងបញ្ជូនជនសង្ស័យជាបន្តបន្ទាប់ ទៅកាន់តុលាការខេត្តដើម្បីអនុវត្តនីតិវិធីបន្ត ក្នុងករណីទន្ត្រានរានយកដីព្រៃលិចទឹកនេះមានចំនួន ៦ ករណី នៅក្នុងឆ្នាំ ២០២១ នេះ។
លោក ប៊ុនរិទ្ធី បញ្ជាក់ទៀតថា ករណីទន្ទ្រានរានយកដីព្រៃលិចទឹកនៅក្នុងតំបន់ ៣ មិនមែនមានតែប្រជាពលរដ្ឋរស់នៅក្នុងភូមិសាស្ត្រខេត្តបាត់ដំបងនោះទេ គឺមានប្រជាពលរដ្ឋមកពីខេត្តផ្សេងៗ ដូចជាសៀមរាប និងបន្ទាយមានជ័យ ដូច្នេះខេត្តទប់ស្កាត់តែម្នាក់ឯងមិនអាចធ្វើទៅបាននោះទេ លុះត្រាតែមានកិច្ចសហការរវាងខេត្ត និងខេត្តដែលពាក់ព័ន្ធ។
លោក ងួន រតនៈ អភិបាលខេត្តបាត់ដំបងថ្លែងថា កន្លងមកនេះរដ្ឋបាលខេត្តបាត់ដំបងបានធ្វើការទប់ស្កាត់ បង្ក្រាប ការទន្ទ្រានដីរដ្ឋ ជាពិសេសដីព្រៃលិចទឹក ដែលមានជនឆ្លៀតឱកាសមួយចំនួនបានរំលោភបំពានយក ហើយរដ្ឋបាលខេត្តក៏បានចេញនូវសេចក្ដីជូនដំណឹង អប់រំផ្សព្វផ្សាយ ដើម្បីធ្វើការហាមឃាត់ប្រជាពលរដ្ឋដែលរំលោភបំពានដីរដ្ឋផងដែរ។
លោក ងួន រតនៈ ថ្លែងថា៖ «រាល់ការបង្ក្រាបបទល្មើសទាំងអស់នេះ រដ្ឋបាលខេត្តក៏មានការលំបាក និងជួបបញ្ហាប្រឈមមួយចំនួន ដោយសារទីតាំងដីព្រៃលិចទឹក និងដែននេសាទមានទំហំធំ ហើយមន្ដ្រីមានចំនួនតិច ខ្វះខាតធនធានមធ្យោបាយ ថវិកា និងសម្ភារក្នុងការចុះទប់ស្កាត់»។
លោក យិន ម៉េងលី មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបាត់ដំបងថ្លែងថា ចំពោះករណីចូលទៅទន្ទ្រានរានយកដីព្រៃលិចទឹកនៅក្នុងតំបន់ ៣ នេះ មិនមែនប្រជាពលរដ្ឋធម្មតាអាចធ្វើបាននោះទេ គឺជាករណីអ្នកមានអំណាច និងអ្នកមានធនធានជាអ្នកប្រព្រឹត្ត ដោយបានប្រើប្រាស់គ្រឿងចក្រ ទៅឈូសឆាយ។
លោក យិន ម៉េងលី បញ្ជាក់ទៀតថា ករណីនេះមានលក្ខណៈស្មុគស្មាញបំផុត ដែលមិនមានភាពងាយស្រួលក្នុងការចុះបង្ក្រាបនោះទេ ប៉ុន្តែបើប្រជាពលរដ្ឋធម្មតាគាត់ចូលទៅទន្ទ្រានដោយប្រើប្រាស់កាំបិត ពូថៅ និងសម្ភារផ្សេងទៀត គឺត្រូវបានសមត្ថកិច្ចចុះបង្ក្រាបហើយ។ ដោយឡែកចំពោះអ្នកមានអំណាច និងមានលុយ គឺមានការលំបាក ហាក់មិនសូវមានការយកចិត្តទុកដាក់ និងបង្ក្រាប។
យោងតាមរបាយការណ៍របស់រដ្ឋបាលខេត្តបាត់ដំបងបញ្ជាក់ថា ខេត្តបាត់ដំបងមានស្រុកចំនួន ៤ មានស្រុកមោងឫស្សី ស្រុកឯកភ្នំ ស្រុកសង្កែ និងស្រុកថ្មគោលស្ថិតនៅក្នុងតំបន់ ៣ នៃបឹងទន្លេសាបនេះ ដោយក្នុងនោះ ផ្ទៃដីដែលខូចខាតដោយការរំលោភទន្ទ្រាននៅក្នុងភូមិសាស្ត្រស្រុកមោងឫស្សី មានចំនួន ១ ៩៧៧ ហិកតា ភូមិសាស្ត្រស្រុកសង្កែមានចំនួន ៦ ៤២៥ ហិកតា ភូមិសាស្ត្រស្រុកឯកភ្នំមានចំនួន ១ ៩៣៨ ហិកតា និង ភូមិសាស្ត្រស្រុកថ្មគោលមានចំនួន ៦៥១ ហិកតា សរុបចំនួន ១០ ៩៩២ ហិកតា៕