.jpg)
សមត្ថកិច្ចខេត្តពោធិ៍សាត់ កំពុងសាកសួរអ្នកពាក់ព័ន្ធករណីពុលស្រាបណ្តាលឱ្យមនុស្សស្លាប់។ រូបថត នគរបាល
ពោធិ៍សាត់ៈ អាជ្ញាធរខេត្តពោធិ៍សាត់បានឲ្យដឹងថា មានករណីពុលស្រាជាបន្តបន្ទប់ ដែលបណ្តាលឲ្យប្រជាពលរដ្ឋស្លាប់ចំនួន ៨ នាក់ និងមានជនរងគ្រោះជាង ៧៤ នាក់ ត្រូវបានដឹកយកទៅសង្គ្រោះនៅមន្ទីរពេទ្យ ខណៈអ្នកចែកចាយស្រាម្នាក់ នៅក្នុងឃុំ ត្រូវបានឃាត់ខ្លួនយកទៅសាកសួរ។
លោក ខាន់ សម្បូរ ជំទប់ទី១ នៃឃុំ អន្សាចំបក់ បានប្រាប់ ភ្នំពេញ ប៉ុស្តិ៍ នៅថ្ងៃទី ២ មិថុនានេះថា ហេតុការណ៍ពុលស្រានេះ បានកើតឡើងជាបន្តបន្ទាប់ ចាប់តាំងពីថ្ងៃទី ២៨ ខែឧសភា ស្ថិតក្នុងភូមិចំនួន ៤ នៃ ឃុំអន្សាចំបក់ ស្រុកក្រគរ ខេត្តពោធិ៍សាត់ ដែលអ្នកពុលទាំងនោះ មានអាយុចន្លោះ ពី ៣០ ទៅ ៦០ ឆ្នាំ។
លោកបានបន្តថា ជាមួយនឹងការផ្ទុះករណីពុលស្រានេះ អ្នកចែកចាយស្រាម្នាក់ ឈ្មោះ ទៀង វណ្ណា អាយុ ៧៥ ឆ្នាំ ត្រូវបានឃាត់ខ្លួន ដើម្បីយកទៅសួរនាំបន្ត ខណៈប្រភពនៃស្រានេះ នៅមិនទាន់ដឹងច្បាស់នៅឡើយ។
លោកបញ្ជាក់ថា៖ «យើងបានប្រកាសឲ្យអ្នកភូមិទាំង ៧ ភូមិ នៅក្នុងឃុំ ផ្អាកការចែកចាយស្រា ដែលមានប្រភពពុលតែមួយនេះសិន ដើម្បីកុំឲ្យមានអ្នកពុលបន្ថែមទៀត។ សមត្ថកិច្ច យើងក៏បានយកសំណាកស្រាទាំងនេះ ទៅពិសោធន៍ដែរ»៕
