.jpg)
សាកសពបុរសដែលរត់ចេញពីមណ្ឌលចត្តាឡីស័ក ត្រូវរថយន្តបុកស្លាប់នៅតាមផ្លូវ។ រូបថត នគរបាល
ពោធិ៍សាត់ៈ បុរសម្នាក់ត្រូវរថយន្តបុកស្លាប់ កាលពីយប់ថ្ងៃទី ១ មិថុនា នៅក្នុងភូមិក្របៅជ្រំ ឃុំ បាក់ចិញ្ចៀន ស្រុកភ្នំក្រវ៉ាញ ខេត្តពោធិ៍សាត់ ក្រោយពីលួចរត់ចេញពីមណ្ឌលចត្តាឡីស័ក នៅវិទ្យាល័យសម្តេចហ៊ុន សែនបាក់ចិញ្ចៀន។
លោក ម៉ូ លីដា ស្នងការរងទទួលផែនការងារ នគរបាលព្រហ្មទណ្ឌ នៃស្នងការដ្ឋាននគរបាលខេត្តពោធិ៍សាត់ប្រាប់ ភ្នំពេញ ប៉ុស្តិ៍ នៅថ្ងៃទី ២ មិថុនាថា ជនរងគ្រោះ ឈ្មោះ ឡាយ សុខាន់ ភេទប្រុស អាយុ ៣៣ ឆ្នាំ រស់នៅភូមិក្រូចឆ្មារ ឃុំលាជ ស្រុកភ្នំក្រវ៉ាញ ខេត្តពោធិ៍សាត់។
ជនរងគ្រោះបានលួចរត់ចេញពីមណ្ឌលចត្តាឡីស័ក ហើយត្រូវរថយន្តបុកស្លាប់ ខណៈគាត់ធ្វើដំណើរដោយថ្មើជើងតាមថ្នល់កៅស៊ូនៅប្រហែលម៉ោងជិត ១២ យប់។
លោកបាននិយាយតាមសម្តីក្រុមគ្រូពេទ្យនៅក្នុងមណ្ឌលចត្តាឡីស័កនៅវិទ្យាល័យសម្តេចហ៊ុន សែនបាក់ចិញ្ចៀនថា បុរសរងគ្រោះម្នាក់នេះ ទើបតែបញ្ជូនចូលក្នុងមណ្ឌចត្តាឡីស័ក បានតែប៉ុន្មានថ្ងៃមុនកើតហេតុប៉ុណ្ណោះ។
ប៉ុន្តែក្រុមគ្រូពេទ្យ ពិនិត្យមិនឃើញមានមេរោគកូវីដ ១៩ នៅក្នុងខ្លួនរបស់គាត់ទេ នៅពេលដែលគ្រូពេទ្យយកសំណាករបស់គាត់ទៅពិនិត្យលើកដំបូង។
លោកបន្តថា៖«កាលណាគាត់ចូលទៅក្នុងមណ្ឌលចត្តាឡីស័ក គឺគ្រូពេទ្យត្រូវតែវាស់កំដៅ និងយកសំណាកទៅពិនិត្យដែលមាន៣ដំណាក់កាល បើអត់ឃើញទេគ្រូពេទ្យឱ្យគាត់ត្រឡប់ទៅផ្ទះវិញ។ តែខ្ញុំបានសាកសួរប្អូនរបស់ជនរងគ្រោះហើយថា បងរបស់គាត់ ធ្វើសំណាកហើយគឺអវិជ្ជមានកូវីដ»។
លោក វួន ធី នាយនគរបាលប៉ុស្តិ៍ឃុំបាក់ចិញ្ចៀន ឱ្យដឹងនៅរសៀលថ្ងៃទី២មិថុនាថា ជនរងគ្រោះឈ្មោះ ឡាយ សុខាន់ នេះ នៅអំឡុងថ្ងៃទី៣០ឬ៣១ឧសភាឆ្នាំ ២០២១ គាត់បានជិះម៉ូតូ ពីរាជធានីភ្នំពេញមកលេងស្រុកកំណើតរបស់គាត់ នៅស្រុកភ្នំក្រវ៉ាញ។
ប៉ុន្តែពេលជនរងគ្រោះទៅដល់ភូមិកំណើត គឺបងប្អូនរបស់គាត់បានប្រាប់អាជ្ញាធរមូលដ្ឋាន ហើយអាជ្ញាធរបានបញ្ជូនគាត់ឱ្យទៅធ្វើចត្តាឡីស័ក នៅមណ្ឌលចត្តាឡីស័ក វិទ្យាល័យសម្តេចហ៊ុន សែនបាក់ចិញ្ចៀន។
លោកបន្តថា ពេលយកជនរងគ្រោះចូលក្នុងមណ្ឌលភ្លាម ក្រុមគ្រូពេទ្យ បានយកសំណាកគាត់ទៅពិនិត្យរកមេរោគកូវីដ ១៩ ប៉ុន្តែក្រុមគ្រូពេទ្យរកមិនទាន់ឃើញទេ ព្រោះការធ្វើចត្តាឡីស័កនេះ តម្រូវឱ្យធ្វើសំណាក៣ដងទើបបានដឹងលទ្ធផល។
ចំពោះជនរងគ្រោះទើបតែយកសំណាកទៅពិនិត្យលើកទី១ ក៏លួចរត់ចេញពីមណ្ឌលចត្តាឡីស័កតែម្តង ហើយភ្លាមៗនោះ ក្រុមគ្រូពេទ្យនៅក្នុងមណ្ឌលចត្តាឡីស័ក បានរាយការណ៍ប្រាប់លោក ដើម្បីតាមចាប់ខ្លួនមកចូលក្នុងមណ្ឌលវិញ តែកម្លាំងសមត្ថកិច្ចរបស់លោករកមិនឃើញ។
លោកបញ្ជាក់ថា៖ «នៅយប់នោះ យើងខំដើររកជនរងគ្រោះដែរ តែរកមិនឃើញ ដល់ក្រោយមកទើបពលរដ្ឋប្រាប់ថា មានឡានបុកមនុស្សម្នាក់ស្លាប់។ ពេលខ្ញុំទៅមើលសាកសពទើបស្គាល់ថា ជាមុខសញ្ញាតាមរក»។
លោកឱ្យដឹងបន្តថា បើតាមម្តាយជនរងគ្រោះ បានប្រាប់លោកថា ជនរងគ្រោះ បានចាក់វ៉ាក់សាំងការពារជំងឺកូវីដបានចំនួន ២ ដងហើយ។
គាត់លួចរត់ចេញពីមណ្ឌលចត្តាឡីស័កប្រហែលម៉ោងជាង ១១ យប់ ថ្ងៃទី ១ មិថុនា ហើយដើរតាមថ្នល់កៅស៊ូ ដែលឆ្ងាយពីមណ្ឌលចត្តាឡីស័កប្រហែលជាង ២ គីឡូម៉ែត្រ៕
