.jpg)
សមត្ថកិច្ចកំពុងសាកសួរ អ្នកជាប់ពាក់ព័ន្ធ ករណីពុលស្រាស្លាប់ ៨ នាក់នៅស្រុកក្រគរ។ រូបថត នគរបាល
ពោធិ៍សាត់ៈ អាជ្ញាធរខេត្តពោធិ៍សាត់បានឱ្យដឹងថា មានករណីពុលស្រាជាបន្តបន្ទាប់ ដែលបណ្តាលឱ្យប្រជាពលរដ្ឋស្លាប់ចំនួន ៨ នាក់ និង ៧៤ នាក់ ទៀត ត្រូវបានដឹកយកទៅសង្គ្រោះនៅមន្ទីរពេទ្យ ខណៈអ្នកចែកចាយស្រាម្នាក់ នៅក្នុងឃុំអន្សាចំបក់ ស្រុកក្រគរ ត្រូវបានឃាត់ខ្លួនយកទៅសាកសួរ។
ហេតុការណ៍ពុលស្រានេះបានកើតឡើងជាបន្តបន្ទាប់ ចាប់តាំងពីថ្ងៃទី ២៨ ខែឧសភា ស្ថិតក្នុងភូមិចំនួន ៤ នៃឃុំអន្សាចំបក់ ស្រុកក្រគរ ខេត្តពោធិ៍សាត់ ដែលអ្នកពុលទាំងនោះត្រូវបានរាយការណ៍មកថា មានអាយុចន្លោះ ពី ៣០ ទៅ ៦០ ឆ្នាំ។
លោក ខាន់ សម្បូរ ជំទប់ទី១ ឃុំ អន្សាចំបក់ បានប្រាប់ ភ្នំពេញ ប៉ុស្តិ៍ នៅថ្ងៃទី ២ មិថុនាថា ស្រាដែលមានសារធាតុពុលនេះត្រូវបានចែកចាយពីប្រភពតែមួយ ទៅកាន់តូបលក់ដូរនានានៅតាមភូមិ។
លោកបន្តថា នៅពេលជនរងគ្រោះ បានទិញស្រាទាំងនេះ បរិភោគ ក៏បណ្តាលឱ្យពួកគាត់ មានអាការទន់ដៃទន់ជើង ខ្សោយអស់កម្លាំង និងមានអាការថប់ដង្ហើម។
លោកបានរៀបរាប់ថា៖ «ផ្ទុះដំបូងកើតចេញពីភូមិសានស ដោយពលរដ្ឋ ដែលបានផឹកស្រានេះរួចហើយ ពួកគាត់មានអាការមិនស្រួលក៏ទៅពេទ្យ ហើយបន្ទាប់មកក៏ទទួលបានព័ត៌មានថា មានពលរដ្ឋដទៃទៀត មានអាការបែបនេះបន្តបន្ទាប់នៅភូមិ ៣ ផ្សេងទៀត»។
តាមតួលេខបឋម ដែលលោកស្រង់បានគិតត្រឹមរសៀលថ្ងៃទី ២ មិថុនា គឺមានអ្នកស្លាប់ ចំនួន ៨ នាក់ និងរងគ្រោះ ដល់ទៅ ៧៤ នាក់ ខណៈអ្នកខ្លះមានអាការល្អប្រសើរ បានវិលត្រឡប់មកផ្ទះវិញ ហើយមានអ្នកខ្លះទៀតស្ថិតក្នុងស្ថានភាពធ្ងន់ធ្ងរ កំពុងបន្តសង្គ្រោះបន្ទាន់។
បើតាម លោក ខាន់ សម្បូរ ករណីពុលស្រានេះ អ្នកចែកចាយស្រាម្នាក់ឈ្មោះ ទៀង វណ្ណា អាយុ ៧៥ ឆ្នាំ ត្រូវបានឃាត់ខ្លួន ដើម្បីយកទៅសួរនាំនៅស្នងការដ្ឋាននគរបាលខេត្ត ខណៈប្រភពនៃស្រានេះនៅមិនទាន់ដឹងច្បាស់នៅឡើយទេ។
លោកបញ្ជាក់ថា៖ «មន្ត្រីជំនាញកំពុងបន្តការងារ។ យើងក៏បានប្រកាសឲ្យអ្នកភូមិទាំង ៧ ភូមិនៅក្នុងឃុំដែលទទួលចែកចាយស្រាពីបុគ្គលនេះ ផ្អាកការចែកចាយអស់ហើយដែរ ដើម្បីកុំឲ្យមានអ្នកពុលបន្ថែមទៀត»។
លោក អ៊ឹង គឹមលាងអភិបាលរងខេត្តពោធិ៍សាត់ដែលទទួលបន្ទុកកិច្ចការនេះ និងលោក ថេត សុវត្ថិធី នាយប៉ុស្តិ៍អន្សារចំបក់នៅថ្ងៃទី ២ ខែមិថុនា បាននិយាយយ៉ាងខ្លីដូចគ្នាថា សមត្ថកិច្ចជំនាញកំពុងបូកសរុបរបាយការណ៍នេះហើយចំណាត់ការបន្តនឹងត្រូវប្រកាសក្នុងពេលឆាប់ៗ។
លោក ឡាញ់ ស៊ីធន អតីតមេឃុំអន្សាចំបក់ដែលអ្នកពុលស្រាម្នាក់បានស្លាប់នៅក្បែរផ្ទះរបស់លោកបានប្រាប់ភ្នំពេញ-ប៉ុស្តិ៍នៅថ្ងៃទី ២ មិថុនាថា ភាគច្រើនអ្នកពុលស្រានេះគឺពួកគាត់បានទិញស្រាពីតូបលក់ដូរដែលនៅក្បែរៗផ្ទះ ដើម្បីយកមកបរិភោគជុំគ្នា។
លោកបន្តថា៖ «តាមព័ត៌មានដែលខ្ញុំដឹង គឺពួកគាត់ជួបជុំគ្នាផឹកស៊ី ២ ទៅ ៣ នាក់ ហើយអ្នកខ្លះក៏ទិញផ្សេងៗគ្នាទៅផឹកទៅក៏ពុលទៅ។ ស្រាទាំងនេះពួកគាត់ទិញពីក្នុងភូមិហើយអ្នកភូមិទិញបន្តពីអ្នកលក់បន្តទៀត ហើយបើខ្ញុំដឹង គឺស្រានេះ បិតនៅក្នុងឃុំហ្នឹងឯង តែខ្ញុំមិនបានដឹងទីតាំងច្បាស់នោះទេ»។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប បានប្រាប់ ភ្នំពេញ ប៉ុស្តិ៍ នៅថ្ងៃទី ២ មិថុនាថា អគ្គនាយកដ្ឋានបានចាត់មន្ត្រីឲ្យចុះទៅយកគំរូសំណាកស្រានេះ ដើម្បីយកមកធ្វើពិសោធន៍ហើយ។
លោកបន្តថា បន្ទាប់ពីចេញលទ្ធផលថា ស្រានេះមានសារធាតុពុល នោះអ្នកពាក់ព័ន្ធនឹងត្រូវកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់។
លោកបានបញ្ជាក់ថា៖ «យើងអំពាវនាវច្រើនហើយ ឲ្យពលរដ្ឋកុំបរិភោគស្រាស ឬស្រាថ្នាំ ដែលគ្មានប្រភពច្បាស់លាស់ ហើយអ្នកផលិតក៏ត្រូវស្វែងរកវត្ថុធាតុដើម ដែលមានការទទួលស្គាល់ពីអាជ្ញាធរមានសមត្ថកិច្ចដែរ។ តែបើករណីនេះនៅតែកើតមាន ដូច្នេះបើយើងរកឃើញថា ស្រាមានសារធាតុពុលនោះយើងនឹងមានចំណាត់ការតាមច្បាប់»។
លោក ផាន អូន ក៏នៅតែទទូចឲ្យប្រជាពលរដ្ឋមានការប្រុងប្រយ័ត្នខ្ពស់ ហើយចំពោះអ្នកផលិតក៏ត្រូវតែផលិតស្រា ឲ្យស្របតាមលក្ខណៈដែលក្រសួងកំណត់ និងអាចស្វែងរកការប្រឹក្សាយោបល់បានគ្រប់ពេលជាមួយមន្ត្រី បើមានករណីសង្ស័យណាមួយ ដែលកើតមានឡើងចំពោះបញ្ហាស្រានេះ។
ក្នុងរយៈពេលចាប់ពីឆ្នាំ ២០១៦ ដល់ឆ្នាំ ២០២០ មានកើតឡើងករណីពុលស្រាសជាបន្តបន្ទាប់ចំនួន ០៤ លើកនៅខេត្តពោធិ៍សាត់ ក្រចេះ បន្ទាយមានជ័យ និងកំពង់ឆ្នាំង ដែលបង្កឲ្យប្រជាពលរដ្ឋចំនួន ២៨ នាក់បានស្លាប់ និងមានជនរងគ្រោះរាប់រយនាក់។
បន្ថែមពីនេះ គ្រាន់តែក្នុងខែឧសភា មានករណីពុលស្រាចំនួន ២ ករណីផ្ទួនៗបានកើតឡើងនៅខេត្តកំពត និងខេត្តកណ្តាលបានបណ្តាលមនុស្ស ២២ នាក់ ស្លាប់ និងជាច្រើននាក់ទៀតរងគ្រោះ។
មូលហេតុនៃការពុលស្រានេះត្រូវបានមន្ត្រីជំនាញរកឃើញថា គឺដោយសារតែមានលាយសារធាតុមេតាណុលច្រើនហួសលើសកម្រិត៕
វីដេអូ៖
