The Phnom Penh Post Search

Search form




Logo of Phnom Penh Post newspaper Phnom Penh Post - ពេញ​ ១ ​ខែ​ ក្រសួង​​ឃាត់​រថយន្ត​ដឹក​លើស​ទម្ងន់​បាន​​ចំនួន ​១៧២ ​គ្រឿង

ពេញ​ ១ ​ខែ​ ក្រសួង​​ឃាត់​រថយន្ត​ដឹក​លើស​ទម្ងន់​បាន​​ចំនួន ​១៧២ ​គ្រឿង

Content image - Phnom Penh Post
រថយន្ត​ដឹក​លើស​ទម្ងន់​ដែល​ឃាត់​បាន​ពី​ខែឧសភា​។ រូបថត ក្រសួង​សាធារណការ

ពេញ​ ១ ​ខែ​ ក្រសួង​​ឃាត់​រថយន្ត​ដឹក​លើស​ទម្ងន់​បាន​​ចំនួន ​១៧២ ​គ្រឿង

ភ្នំពេញៈ រថយន្ត​ដឹក​លើស​ទម្ងន់​ចំនួន​ ១៧២ ​គ្រឿង​ត្រូវបាន​ចាប់ និង​ពិន័យ​ជា​ថវិកា​បាន​ជាង​ ២៤២ ​លាន​រៀល​ក្នុង​ខែឧសភា​ឆ្នាំនេះ ដោយ​ចំនួន​ដឹក​ល្មើស​បាន​​កើនឡើង​ប្រមាណ​​ ៦ ​ភាគរយ បើ​ធៀប​នឹង​ខែមេសា ឆ្នាំ​ ២០២១ ​កន្លងទៅ ដែល​មាន​ចំនួន​ ១៦១ ​គ្រឿង​។ ​នេះ​បើតាម​របាយការណ៍​​របស់​ក្រសួង​សាធារណការ និង​ដឹកជញ្ជូន​ចេញផ្សាយ​កាលពី​ថ្ងៃទី​ ១ ខែមិថុនា ឆ្នាំនេះ​។

ក្រសួង​បញ្ជាក់ថា ផលប៉ះពាល់​​ដែល​បណ្តាល​មកពី​ការដឹកជញ្ជូន​លើស​ទម្ងន់ គឺ​បាន​បំផ្លាញ​ផ្លូវជាតិ​​ដែល​នាំឱ្យ​ខាតបង់​ថវិកាជាតិ ព្រមទាំង​បង្ក​នូវ​គ្រោះថ្នាក់​ប៉ះពាល់​ដល់​ទ្រព្យសម្បត្តិ​សាធារណៈ និង​ជីវិត​មនុស្ស​ផងដែរ​។

លោក ឈួន វន់ អ្នកនាំពាក្យ​​ និង​ជា​អគ្គនាយក​ដឹកជញ្ជូន​ផ្លូវគោក​នៃ​ក្រសួង​សាធារណការ​​ និង​ដឹកជញ្ជូន​បាន​ប្រាប់​ភ្នំពេញ-ប៉ុស្តិ៍​កាលពី​ម្សិលមិញ​ថា ករណី​ដឹកជញ្ជូន​លើស​ទម្ងន់​ភាគច្រើន​បណ្តាល​មកពី​ម្ចាស់​បាន​កែច្នៃ​រថយន្ត​ឱ្យ​អាច​ផ្ទុកទំនិញ​បាន​ច្រើន​។

លោក​បាន​បន្តថា មួយវិញទៀត ម្ចាស់​អាជីវកម្ម​ក៏ដូចជា​អ្នកបើកបរ​មិនបាន​គោរព​ច្បាប់​ឱ្យ​បាន​ត្រឹមត្រូវ ហើយ​តែងតែ​ដាក់​ទំនិញ​លើស​ទម្ងន់​ ដើម្បី​ប្រយោជន៍​ផ្ទាល់ខ្លួន ដោយ​មិនបាន​គិតពី​ការខូចខាត​ផ្លូវថ្នល់ និង​គ្រោះថ្នាក់​ចរាចរណ៍​នោះទេ​។

លោក ឈួន វន់ បញ្ជាក់ថា​៖ «​មាន​កត្តា​មួយចំនួន​ដែល​នាំឱ្យ​មាន​គ្រោះថ្នាក់​ចរចរណ៍​ដូចជា កត្តា​បច្ចេកទេស​យានយន្ត​ដោយ​​មាន​ការកែច្នៃ​ខុស​បច្ចេកទេស ដឹក​លើស​ទម្ងន់ អ្នកបើកបរ​មិន​​មាន​បណ្ណ​បើកបរ រថយន្ត​អត់​បាន​​មក​ឆៀក​ត្រឹមត្រូវ និង​លិខិត​​អនុញ្ញាត​អាជីវកម្ម​ជាដើម​»​។

លោកស្រី លឹម សុខជា ទីប្រឹក្សា​ជាន់ខ្ពស់​អង្គការ​សម្ព័ន្ធ ដើម្បី​សុវត្ថិភាព​ចរាចរណ៍​ផ្លូវគោក​ (CRY) ​បាន​ថ្លែ​ថា តាម​ការកត់សម្គាល់ រថយន្ត​ដឹក​លើសទម្ងន់​នៅតែ​បន្ត​កើនឡើង​នៅតាម​​ដងផ្លូវ​នៅក្នុង​ខែ​ឧសភា​កន្លង​មក​នេះ បន្ទាប់ពី​រាជរដ្ឋាភិបាល​បើក​ចរាច​រណ៍​ឡើងវិញ រួម​ជាមួយនឹង​ការយល់ដឹង​ពី​ការអនុវត្ត​ច្បាប់​​របស់​អ្នកបើកបរ និង​ម្ចាស់​អាជីវកម្ម​ខ្លះ​នៅ​មាន​កម្រិត​។

លោកស្រី​បាន​បន្តថា ម្យ៉ាងទៀត​ការរឹតបន្តឹង​ការអនុវត្ត​ច្បាប់​របស់​សមត្ថកិច្ច ក៏​ដូច​ក្រសួង ស្ថាប័ន​ពាក់ព័ន្ធ​នៅមានកម្រិត​​ដែល​អាចមាន​ហានិភ័យ​ខ្ពស់​ចំពោះ​គ្រោះថ្នាក់​ចរាចរណ៍​បណ្តាល​ឱ្យ​មនុស្ស​ស្លាប់ និង​ខូចខាត​ទ្រព្យសម្បត្តិ​ផ្សេងៗ​។

លោកស្រី លឹម សុខជា ថ្លែងថា​៖ «​ការកើនឡើង​នៃ​ការដឹក​លើស​ទម្ងន់​នៅតែ​បន្ត​កើតមាន ជាពិសេស​ក្នុង​ខែឧសភា ដោយសារ​ការអនុវត្ត​ច្បាប់​នៅលើ​ដងផ្លូវ​នៅ​មាន​កម្រិត​ និង​ការចូលរួម​ពី​អ្នកបើកបរ​ផងដែរ​»​។

យ៉ាងណាក្ដី លោកស្រី​បាន​បញ្ជាក់ថា ការកើនឡើង​នេះ​ក៏​ដោយសារ​កន្លងមកនេះ សមត្ថកិច្ច​មិនសូវ​បាន​ចុះទៅ​អនុវត្ត​ច្បាប់ ដោយសារ​រវល់​ចូលរួម​ការការពារ​​នៃ​ការឆ្លង​ជំងឺ​កូវីដ​ ១៩ ដូចជា​ការចុះ​បិទខ្ទប់​តំបន់​ក្រហម​ជាដើម​។

ចំណែក​លោក គឹម បញ្ញា នាយក​អង្គការ​មូលនិធិ​បង្ការ​របួស​អាស៊ី​ប្រចាំ​នៅ​កម្ពុជា (AIP) ថ្លែងថា មិន​ថា​នៅតែ​កម្ពុជា​នោះទេ តែ​នៅ​ប្រទេស​នានា​ក៏​មាន​ករណី​ដឹក​លើស​ទម្ងន់​នេះដែរ​ ដើម្បី​​ប្រយោជន៍​ផ្ទាល់ខ្លួន​ ឬ​បក្ខពួក​។

បើតាម លោក គឹម បញ្ញា ស្ថាប័ន​ពាក់ព័ន្ធ​របស់​រដ្ឋាភិបាល​កម្ពុជា​​បាន​មាន​វិធាការ​គួរឱ្យ​កត់សម្គាល់ ប៉ុន្តែ​នៅពេល​កំពុង​មមាញឹក​ក្នុង​ការប្រយុទ្ធ​ប្រឆាំងនឹង​ជំងឺ​កូវីដ​ ១៩ ឈ្មួញ​នានា​បាន​ឆ្លៀត​យក​ឱកាស​នេះ ដើម្បី​បំពាន​ច្បាប់ ជាពិសេស​ក្នុង​ខែមេសា និង​ឧសភា​កន្លងមកនេះ គឺមាន​កើនឡើង​។

លោក​បាន​បញ្ជាក់ដែរថា ការដឹកលើស​ទម្ងន់​នេះ វា​បង្ក​ឱ្យ​គ្រោះថ្នាក់​ធ្ងន់ធ្ងរ ហើយ​ប្រសិន​បើ​ប៉ះពាល់​ដល់​មនុស្ស​នឹង​បណ្តាលឱ្យ​ស្លាប់ រីឯ​រថយន្ត​វិញ​គឺ​ខ្ទេចខ្ទី​ហើយ​ថែម​ទាំង​ធ្វើឱ្យ​ខូចខាត​ថ្នល់​ទៀតផង​។

លោក គឹម បញ្ញា បាន​ថ្លែងថា​៖ «​ដើម្បី​ទប់ស្កាត់​កុំ​ឱ្យ​មាន​រថយន្ត​ដឹក​លើស​ទម្ងន់​ទៀត ស្ថាប័ន​រដ្ឋាភិបាល គួរ​ដំឡើង​កម្រិត​នៃ​ការផាកពិន័យ​ឱ្យ​ធ្ងន់ធ្ងរ​ជាង​​មុន និង​តម្រូវ​ឱ្យ​ក្រុមហ៊ុន​បំពាក់​ GPS ​ឬ​ឧបករណ៍​ណាមួយ​ដែល​អាច​ដឹង​ពី​ទម្ងន់​របស់​ខ្លួន​ឯង​គឺ​ម្ចាស់​ហ្នឹង​មិន​អាច​ប្រកែក​បាន​នោះទេ​»៕

អត្ថបទគួរចាប់អារម្មណ៍