ភ្នំពេញៈ ប្រឡាយទួលពង្រ ២ ប្រវែងជាង ៦ គីឡូម៉ែត្រ ត្រូវបានមន្ទីរសាធារណការ និងដឹកជញ្ជូនរាជធានីភ្នំពេញចាប់ផ្តើមស្តារឡើងវិញ ចាប់ពីដើមខែមិថុនានេះ ដើម្បីបញ្ចៀស និងរំដោះទឹកចេញពីលំនៅឋានប្រជាពលរដ្ឋនៅតំបន់ភាគខាងលិចឆៀងខាងត្បូងទីក្រុងមួយនេះ ដែលរងនូវការជន់លិចដោយជំនន់ទឹកភ្លៀងនារដូវវស្សា។
ប្រឡាយទួលពង្រ ២ នេះមានបណ្ដោយប្រវែង ៦ ១០០ ម៉ែត្រចាប់ផ្តើមចេញពីផ្លូវជាតិលេខ ៣ ឆ្លងកាត់សង្កាត់ចោមចៅទី១ សង្កាត់ចោមចៅទី២ ក្នុងខណ្ឌពោធិ៍សែនជ័យ និងឆ្លងទៅសង្កាត់ព្រៃសទម្លាក់ទៅស្ពានព្រែកហា។
លោក ដួង ចាន់សារ៉ាត់ ប្រធានអង្គភាព លូទឹក-បូមទឹកនៃមន្ទីរសាធារណការ និងដឹកជញ្ជូនរាជធានីភ្នំពេញប្រាប់ ភ្នំពេញ ប៉ុស្តិ៍ នៅថ្ងៃទី ២ ខែមិថុនា ថា ដំណើរការស្តារប្រឡាយទួលពង្រ ២ នេះ នឹងចំណាយពេលចំនួន ២ ខែ គិតចាប់ពីដើមខែមិថុនានេះ រហូតដល់ខែសីហា ដែលនឹងត្រូវបញ្ចប់ជាស្ថាពរ។
លោកប្រាប់ថា៖ «ទោះបីជារាជធានីភ្នំពេញយើងបានកំពុងតែមានការមមាញឹកក្នុងការទប់ស្កាត់នូវការរីករាលដាលនៃជំងឺកូវីដ ១៩ យ៉ាងណាក៏ដោយ ក៏ការងារស្ដារប្រឡាយនេះនៅតែធ្វើបន្តរហូត ដើម្បីការពារ និងបញ្ចៀសនូវទឹកជំនន់ដែលបណ្តាលមកពីទឹកភ្លៀង ប៉ះពាល់ដល់ប្រជាពលរដ្ឋ។ នៅពេលដែលប្រឡាយទួលពង្រ ២ នេះស្តាររួចរាល់ហើយនឹងជួយប្រជាពលរដ្ឋយើងនៅតំបន់នេះបានច្រើន»។
លោក ចាន់សារ៉ាត់ បានឱ្យដឹងទៀតថា បន្ទាប់ពីបញ្ចប់ការស្តាយប្រឡាយទួលពង្រ ២ នេះ អង្គភាពលូទឹក-បូមទឹក នឹងបន្តធ្វើការស្តារប្រឡាយ និងដាក់លូនៅម្តុំលូ៥ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ដែលមានប្រមាណជា ២ គីឡូម៉ែត្រ។
លោកបញ្ជាក់ថា៖ «យើងមិនអាចទាន់កំណត់បាននៅឡើយថា តើរាជធានីភ្នំពេញយើង អាចនឹងលែងជួបនូវជំនន់ទឹកភ្លៀងពេលណា ឬឆ្នាំណានោះទេ។ ប៉ុន្តែសាលារាជធានីភ្នំពេញ បាននិងកំពុងតែធ្វើការដោះស្រាយនូវបញ្ហានេះជាបណ្តើរៗ ស្របពេលដែលទីក្រុងភ្នំពេញយើងក៏កំពុងតែមានការអភិវឌ្ឍច្រើនផងដែរ»។
បើតាមលោក ដួង ចាន់សារ៉ាត់ ប្រឡាយទួលពង្រ ២ នេះមានសារៈសំខាន់ណាស់ ក្នុងការរំដោះទឹក កាត់បន្ថយការលិចលង់ លំនៅឋានប្រជាពលរដ្ឋ នៅក្នុងមូលដ្ឋានខណ្ឌពោធិ៍សែនជ័យ និងផ្នែកខ្លះនៃខណ្ឌដង្កោ។ តំបន់ទាំងនេះបានទទួលរងនូវការលិចលង់ដោយទឹកជំនន់ទឹកភ្លៀងយ៉ាងធ្ងន់ធ្ងរ កាលពីឆ្នាំ ២០២០ កន្លងមក។
កាលពីខែកុម្ភៈ រដ្ឋបាលរាជធានីភ្នំពេញបានសិក្សាកែលម្អប្រព័ន្ធលូ ប្រឡាយបង្ហូរទឹកកខ្វក់ និងទឹកភ្លៀងក្នុងភូមិសាស្ត្រនៃបណ្ដាខណ្ឌមួយចំនួនក្នុងរាជធានីភ្នំពេញ ដើម្បីបញ្ចៀសទឹកជំនន់ ដែលអាចកើតឡើងនៅរដូវវស្សា ហើយក៏នឹងមានការបន្ថែមស្ថានីយបូមទឹកថ្មី ១ កន្លែង នៅភូមិទួលពង្រ សង្កាត់ចោមចៅ ២ ខណ្ឌពោធិ៍សែនជ័យ ផងដែរ។
ប្រធានមន្ទីរសាធារណការ និងដឹកជញ្ជូន រាជធានីភ្នំពេញ លោក សាំ ពិសិដ្ឋ បានថ្លែងនាពេលនោះថា ស្ថានីយបូមទឹកថ្មី ១ កន្លែងទៀតនឹងត្រូវសាងសង់នៅភូមិទួលពង្រ សង្កាត់ចោមចៅទី ២ ខណ្ឌពោធិ៍សែនជ័យ ដែលមានឈ្មោះថា «ស្ថានីយបូមទឹកទួលពង្រ»។ មន្ត្រីជំនាញក៏នឹងជីកស្តារប្រឡាយបង្ហូរទឹក ដាក់លូជ្រុងឱ្យមានទំហំទទឹង ៨ ម៉ែត្រ នៅទីតាំងចាំបាច់ផងដែរ ដើម្បីសម្រួលចរន្តទឹកឱ្យហូរបានប្រសើរជាងមុន។
លោកបញ្ជាក់ថា៖ «ស្ថានីយបូមទឹកទួលពង្រនេះមានម៉ាស៊ីនបូមទឹកចំនួន ៣ គ្រឿង ដែលអាចរំដោះទឹកបាននៅតំបន់ទួលពង្រ ត្រពាំងថ្លឹង និងតំបន់ជុំវិញ។ គម្រោងនេះអាចនឹងបើកការដ្ឋាននៅចុងខែកុម្ភៈនេះ ហើយគ្រោងបញ្ចប់នៅក្នុងខែសីហា ឆ្នាំ ២០២១ បើសិនយើងមានថវិកាគ្រប់គ្រាន់»៕