.jpg)
យុវជនម្នាក់ស្លាប់បាត់បង់ជីវិត ដោយសង្ស័យជម្លោះព្រោះស្រី។ រូបថត ហ្វេសប៊ុក
ភ្នំពេញៈ លោក ម៉េង វិមានតារា អធិការនគរបាលខណ្ឌមានជ័យបានបញ្ជាឱ្យសមត្ថកិច្ចបន្តស្រាវជ្រាវលើករណី ការស្លាប់យុវជនម្នាក់នៅលើផ្លូវជាតិលេខ ២ កាលពីយប់ថ្ងៃទី ១ ខែមិថុនា ដោយហេតុដួលម៉ូតូ ដែលទំនងបណ្ដាលមកពីដេញតាមគ្នាជម្លោះដណ្ដើមស្រី។
លោក វិមានតារា ថ្លែងថា៖ «យើងមិនទាន់កំណត់ច្បាស់ទេថា តើការស្លាប់នេះពាក់ព័ន្ធនឹងអ្វីពិតប្រាកដ ព្រោះមន្ត្រីនគរបាលកំពុងព្យាយាមប្រមូលព័ត៌មាន ដើម្បីកំណត់មុខសញ្ញាជនល្មើស»។
លោក ជា រតនា នាយប៉ុស្តិ៍នគរបាលសង្កាត់ចាក់អង្រែលើបានថ្លែងឱ្យដឹង នៅថ្ងៃទី ២ មិថុនា ថា ជនរងគ្រោះឈ្មោះ គិន សុខឿន ភេទប្រុស អាយុ ២១ ឆ្នាំ ជាជាងធ្វើមាសរស់នៅក្នុងភូមិសាមគ្គី សង្កាត់ ឫស្សីកែវ ខណ្ឌឫស្សីកែវ រាជធានីភ្នំពេញ។
លោក រតនា បញ្ជាក់ដោយយោងតាមសម្តីសាក្សីនៅកន្លែងកើតហេតុថា ហេតុការណ៍នេះបានកើតឡើងនៅវេលាម៉ោងជិត ៨ យប់ថ្ងៃទី ១ ខែមិថុនា តាមបណ្តោយផ្លូវជាតិលេខ ២ ដោយជនរងគ្រោះជិះម៉ូតូ ១ គ្រឿងម៉ាក ស៊ុយ ហ្ស៊ុយគី និងមានឌុបនារីម្នាក់នៅពីក្រោយធ្វើដំណើរទិសដៅពីជើងទៅត្បូងក្នុងល្បឿនយ៉ាងលឿន ពេលនោះដែរ គេបានឃើញម៉ូតូ ១ គ្រឿងទៀតជិះឌុបគ្នា ២ នាក់ដែលទំនងបើកដេញតាមពីក្រោយ។
មន្ត្រីនគរបាលមួយរូបនៅអធិការដ្ឋាននគរបាលខណ្ឌមានជ័យបានថ្លែងដោយលក្ខខណ្ឌ សុំមិនបញ្ចេញឈ្មោះថា ក្នុងហេតុការណ៍នេះនៅពេលដែលជនរងគ្រោះបើកម៉ូតូដល់កន្លែងកើតហេតុបានរេចង្កូតឡើងខឿនថ្មក្បែរចិញ្ចើមផ្លូវ ហើយបានទៅបុកបង្គោលភ្លើង និងបុករនាំងទ្វារដែក ១ ផ្ទាំងទៀតបណ្ដាលឱ្យមនុស្សបានដួលដេកនៅក្បែរបង្គោលភ្លើង។
ចំណែកឯនារីម្នាក់ដែលជិះជាមួយក៏ដួលសន្លប់ដែរដែលពេលនោះក្រុមជនសង្ស័យម្ខាងទៀតបានឈប់ម៉ូតូហើយស្ទុះទៅកាប់យុវជនរងគ្រោះបន្ថែមទៀត តែដោយសារឃើញសភាពជនរងគ្រោះមានរបួសធ្ងន់ក៏នាំគ្នាលើកនារីម្នាក់ដែលសន្លប់នោះឡើងលើម៉ូតូជិះគេចខ្លួនបាត់។
បន្ទាប់ពីកើតហេតុ កម្លាំងសមត្ថកិច្ចនគរបាលខណ្ឌមានជ័យ និងនគរបាលប៉ុស្តិ៍សង្កាត់ចាក់អង្រែលើបានចុះដល់កន្លែងកើតហេតុដោយពិនិត្យឃើញថា នៅត្រង់ចង្កេះរបស់ជនរងគ្រោះមានរបួសដោយស្នាមកាប់ ១ កន្លែង។ ប៉ុន្តែមូលហេតុដែលស្លាប់គឺដោយសារបុកនឹងបង្គោលភ្លើងមិនមែនស្លាប់ដោយកាប់នឹងកាំបិតទេ។
មន្ត្រីនគរបាលថា៖ «ជនរងគ្រោះស្លាប់មិនមែនដោយគេកាប់មែន ប៉ុន្តែបើកុំតែគេដេញក៏គាត់មិនស្លាប់ដែរ រឿងនេះគឺជារឿងឃាតកម្មហើយ អ៊ីចឹងហើយទើបសមត្ថកិច្ចស្រាវជ្រាវរកមុខសញ្ញាជនល្មើស»។
លោក រតនា បានបញ្ជាក់ថាករណីនេះសង្ស័យជាទំនាស់ដណ្តើមសង្សារគ្នា តែសមត្ថកិច្ចមិនទាន់កំណត់ព័ត៌មានឱ្យបានច្បាស់នៅឡើយទេ។ ក្នុងនោះសមត្ថកិច្ចនឹងប្រមូលព័ត៌មានពីសាក្សី និងពីការឆែកមើលតាមកាមេរ៉ាសុវត្ថិភាព៕
