​ពោធិ៍​សាត់ៈ​ អាជ្ញា​ធរខេត្ត​ពោធិសាត់​ចុះទៅ​ទប់​ស្តា​ត់ និង​បង្ក្រាប​ការកាប់​ទន្ទ្រាន​យក​ដី និង​ភ្នំ​ធ្វើក​ម្មសិ​ទ្ទ​ដោយ​ខុសច្បាប់ នៅ​ថ្ងៃទី ​៣ ខែមិថុនា​នេះ​រឹបអូស​បាន​កាំភ្លើង​កែច្នៃ​ ៨​ ដើម ​ម៉ាស៊ីន​អា​ឈើ​ ២​ គ្រឿង និង​កំពុង​ស្វែងរក​មេខ្លោង​នៅ​ពីក្រោយ​ខ្នង​ការ​ញុះញង់​ឲ្យ​ពលរដ្ឋ​ចូល​កាប់​រានទន្ទ្រាន​តំបន់​ឧទ្យាន​ជាតិ​ជួរ​ភ្នំក្រវាញ​កណ្តាល ក្នុង​ឃុំ​ក្រពើ​ពីរ ស្រុ​វាលវែង​។

លោក កូយ រី​ដា អភិបាលរង​ខេត្តពោធិសាត់ ដែល​បាន​ដឹកនាំ​កម្លាំង​គណៈបញ្ជាការ​ឯកភាព​ខេត្ត​ចុះទៅពិនិត្យ​ផ្ទាល់ នៅ​ថ្ងៃទី ​៣ ខែមិថុនា ថ្លែងថា កម្លាំងចម្រុះ​មាន​គ្នា​ ១០០​ នាក់​ត្រូវបាន​បែងចែក​ទៅតាម​គោលដៅ ដែលមាន​ការកាប់​រាន​ទន្ទ្រាន​នៅ​តំបន់​ល្អាង​ ១២ ក្នុង​ឃុំ​ក្រពើ​ពីរ បាន​រកឃើញ​កាំភ្លើង​កែច្នៃ​ចំនួន​ ៨​ ដើម និង​ម៉ាស៊ីន​អា​ឈើ​ចំនួន ​២​ ផងដែរ​។

លោក ខូ​យ រី​ដា ថ្លែងថា មាន​ប្រជាពលរដ្ឋ​មកពី​តាម​បណ្តា​ខេត្ត​ជាច្រើន​នាំគ្នា​ចូលមក​កាប់​ទន្ទ្រាន​ដី​តំបន់​ការពារ ស្ថិតក្នុង​ឧទ្យាន​ជាតិ​ជួរ​ភ្នំក្រវាញ​កណ្តាល​។ តាម​ការពិនិត្យ​ឃើញជាក់ស្តែង ភ្នំ​ខ្ពស់ៗ​នៅ​តំបន់​ឧទ្យាន​ជាតិ​ជួរ​ភ្នំក្រវាញ​កណ្តាល បើ​មើ​លពី​ចំហៀង​ឃើញ​នៅមាន​ព្រៃ​ជុំជិត​ល្អ ប៉ុន្តែ​នៅពេល ឡើង​ទៅដល់​កំពូលភ្នំ​ជាក់ស្តែង គឺមាន​ការកាប់​រានទន្ទ្រាន​ហិនហោច​ជាខ្លាំង​។

លោក​ រី​ដា បញ្ជាក់ថា កន្លងមក​អាជ្ញាធរ​ធ្លាប់បាន ធ្វើការ​អប់រំ​មកហើយ ប៉ុន្តែ​នៅតែមាន​ការផ្គើន​ក្នុង​ការកាប់​ទន្ទ្រាន​។ ដូច​ច្នេះ ការចុះ​ប្រតិបត្តិការ​នេះ​អាជ្ញាធរ​ស្វែងរក​បុគ្គល​ជា​មេខ្លោង​ទៅ​ដោះស្រាយ​តាមច្បាប់​ដោយ​មិន​លើកលែង​ឡើយ​។

លោក​ថ្លែងថា​៖ «​លើក​នេះ​យើង​ចុះមក​ដើម្បី​អនុវត្ត​ច្បាប់ អីចឹង​យើង​ស្វែងរក​មេខ្លោង​ធំៗ សំខាន់ៗ ប៉ុន្តែ​ពេល​កម្លាំង​យើង​ចុះមក​ពួកគេ​បាន​រត់គេចខ្លួន​អស់ ហើយ​ខ្លះ​មាន​កាំភ្លើង​បាញ់​ត​ទាល់​ជាមួយ​សមត្ថកិច្ច​ទៀតផង ប៉ុន្តែ​មិនមាន​អ្នកណា​រងរបួស​ទេ ដោយសារ​នៅក្នុង​ព្រៃ​ហើយ​ការបាញ់​មាន​ចម្ងាយ​ឆ្ងាយ​។ ក្រៅពី​ស្វែងរក​មេខ្លោង យើង​អប់រំ​អ្នក​នៅតាម​ជំរុំ​ខ្ទម​ដែល​ពួកគាត់​បាន​ចុះមក​បោះ​ដើម្បី​កាប់​ទន្ទ្រាន​ដីព្រៃ​ហ្នឹង កុំ​ឲ្យ​ចាញ់បោក​ជនខិលខូច​ញុះញង់ មកពី​ទីណា​ឲ្យ​ពួកគាត់ ត្រឡប់​ទៅ​ទី​ហ្នឹង​វិញ »​។

លោក ប៉ែន ប៊ុណ្ណា​រ៍ មន្ត្រី​ចងក្រង​សហគមន៍ នៃ​សមាគម​អាដហុកថ្លែងថា រឿងរ៉ាវ​ពាក់ព័ន្ធ​ក្នុង​បញ្ហា​កាប់​រានទន្ទ្រាន​ដី​រដ្ឋ កើតឡើង​ដដែលៗ ស្ទើរតែ​គ្រប់​ខេត្ត​ក្រោមរូបភាព ប្រជាពលរដ្ឋ​ចូលទៅ​កាប់​រានទន្ទ្រាន​អាស្រ័យ​ផល ហើយ​លក់​ទៅ​ឲ្យ​អ្នកមាន​លុយ​មានអំណាច ដែល​មានការ​គប់គិត ពី​អាជ្ញាធរ​មួយចំនួន​បានចេញ​លិខិត​ទិញ​លក់​។

លោក​ថ្លែងថា​៖ «​ប្រជាពលរដ្ឋ​នៅតែ​ទៅ​កាប់ រានទន្ទ្រាន​ដីព្រៃ អស់ពី​កន្លែង​មួយ​ទៅ​កន្លែង​មួយទៀត​គ្រប់​ខេត្ត​ទាំងអស់​។ អ៊ីចឹង​យើង​ឃើញថា វិធានការ​របស់​អាជ្ញា​ធរ​អត់​មាន​ពិតប្រាកដ ហើយដោយ​សារ​អំពើពុករលួយ​ជា​ប្រព័ន្ធ​ផង ធ្វើ​ឲ្យ​អ្នកមាន​លុយ​មានអំណាច ប្រើប្រាស់​រូបភាព​ដដែលៗ​បាន​ជោគជ័យ បើសិនជា​បណ្តោយ​យើង​អាច​និយាយបានថា ទាល់តែ​អស់​ដី​តែម្តង​បាន​វាច​ប់​»។​

យ៉ាងណាក៏ដោយ លោក​ ខូ​យ រី​ដា អះអាងថា មិនមែន​អាជ្ញាធរ​មិន​ខិតខំ​ប្រឹងប្រែង​ធ្វើការ​ថែរក្សា​នោះទេ ប៉ុន្តែ​អាជ្ញាធរ​ត្រូវ​ធ្វើការស្រាវជ្រាវ​ឲ្យ​ច្បាស់​មុន​ចេញ​វិធានការ​ណាមួយ ដើម្បី​កុំ​ឲ្យ​ប៉ះពាល់​ដល់​ប្រជាពលរដ្ឋ​មួយចំនួន​ដែល​ចាញ់បោក​ជនខិលខូច​។

លោក​ថ្លែងថា​៖ «​ដី​រដ្ឋ​គឺ​យើង​ដកហូត​វិញ​បើ​មាន​ការកាប់​ទន្ទ្រាន ហើយ​ដាក់បន្ទុក​ទៅ​តុលាការ​ទៀត​។ ការងារ​យើង​ចុះ​ធ្វើ​ជាក់ស្តែង មិនមាន​ជាការ​ងាយស្រួល​ទេ ចូល​ព្រៃ​ឆ្លង​ភ្នំ​ដឹកនាំ​កម្លាំង បើ​អត់​មានការ​លះបង់​ធ្វើ​មិនកើត​ទេ​។ ហើយ​យើង​មិនមែន​ចេះតែ ចាប់​ធ្វើបាប​ប្រជាពលរដ្ឋ​ផ្តេសផ្តាស​បានទេ ត្រូវ​សង្កេត​ពិនិត្យ​ស្រាវជ្រាវ​ឲ្យ​បាន​ច្បាស់​»។​

បើតាម​លោក ខូ​យ រី​ដា អ្នក​ដែល​ចូលមក​កាប់​ទន្ទ្រាន​ដីព្រៃ​តំបន់​ឧទ្យាន​ជាតិ​ជួរ​ភ្នំក្រវាញ​កណ្តាល​នេះ មកពី​ខេត្តព្រះវិហារ សៀមរាប បាត់ដំបង ប៉ៃលិន កំពង់ធំ កំពង់ចាម ត្បូងឃ្មុំ កំពត តាកែវ និង​ខេត្តព្រៃវែង ដែល​ចាញ់បោក​ការ​ញុះញង់​របស់​ជនខិលខូច​។

លោក​ថ្លែងថា​៖ «​មាន​ថ្ងៃ​មួយក្រុម​អ្នក​ខិលខូច​បាន​បង្កើត​វិ​ដេ​អូ​ដោយ ឲ្យ​ក្មេង ចាស់ ប្រុស​ស្រី ស្រែក​រញ៉េរញ៉ៃ ស្រែកយំ​អី​អីចឹង តែ​នៅពេល​ខ្ញុំ​បាន​ចុះទៅ​ត្រួតពិនិត្យ​សួរនាំ​គាត់​ទៅ បានដឹងថា គេ​ហៅ​គាត់​មក​ឲ្យ​ធ្វើតាម​អ៊ីចឹង​។ ជនខិលខូច​ហ្នឹង​វា​យក​ប្រជាជន ធ្វើ​ខែល​សម្តែង​ដូច​មែនទែន​ចឹ​ង​» ៕