.jpg)
រថយន្តនិងអ្នកបើកបរត្រូវបានសមត្ថកិច្ចឃាត់ នៅខេត្តកណ្តាល ក្រោយមានការរិះគន់ថា រំខានពលរដ្ឋ។ រូបថត នគរបាល
កណ្តាលៈ រថយន្តដឹកដី និងទំនិញចំនួន ១៩ គ្រឿងត្រូវបាននគរបាលចរាចរណ៍ខេត្តកណ្តាលឃាត់ទុក ដោយតម្រូវឲ្យអ្នកបើកបរធ្វើកិច្ចសន្យាក្នុងនោះមានរថយន្តចំនួន ៧ គ្រឿង ត្រូវបានផាកពិន័យ បន្ទាប់ពីមានការរិះគន់ពីពលរដ្ឋនៅផ្សារស្អាងភ្នំ ឃុំស្អាងភ្នំ ស្រុកស្អាង កាលពីសប្តាហ៍មុន ដោយសារមានការំខានពីរថយន្តទាំងនោះ និងរិះគន់តាមបណ្តាញសង្គមហ្វេសប៊ុកចូលផេកលោកនាយករដ្ឋមន្ត្រីហ៊ុន សែន។
លោក ឆេង សំអឿន នាយការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តកណ្តាល បានឱ្យដឹងនៅរសៀលថ្ងៃទី ៣ មិថុនាថា រយៈពេល ២ ថ្ងៃ ពីថ្ងៃទី ១ ដល់ថ្ងៃទី ២ មិថុនា គឺនគរបាលចរាចរណ៍ខេត្តបានចាប់ឃាត់រថយន្តដឹកដី និងដឹកទំនិញបានចំនួន ១៩ គ្រឿង។ ការឃាត់រថយន្តទាំងនោះ គឺយោងតាមសំណូពររបស់ប្រជាពលរដ្ឋដែលបានបញ្ចេញយោបល់តាមបណ្តាញទំនាក់ទំនងសង្គមហ្វេសប៊ុកចូលផេករបស់លោកនាយករដ្ឋមន្រ្តី ហ៊ុន សែន។
លោកថា ក្រោយពីទទួលបានបទបញ្ជាពីលោក ឈឿន សុចិត្ត ស្នងការនគរបាលខេត្តកណ្តាលមក គឺកម្លាំងសមត្ថកិច្ចជំនាញផ្នែកចរាចរណ៍បានចុះអនុវត្តភ្លាមៗក្រោយទទួលបទបញ្ជា។ ចំពោះរថយន្តដែលសមត្ថកិច្ចឃាត់មួយរយៈពេលខ្លីនោះគឺខ្លះជារថយន្តដឹកដី និងខ្លះជារថយន្តដឹកទំនិញ។
ការឃាត់រថយន្តនេះក្នុងគោលបំណងបញ្ឈប់ការរំខានដល់ពលរដ្ឋ ដែលបង្កពីការដឹកដី និងពង្រឹងសណ្តាប់ធ្នាប់នៃការធ្វើចរាច លើដងផ្លូវនិងចូលរួមថែរក្សាសន្តិសុខសុវត្ថិភាពដើម្បីចៀសវាងការគ្រោះថ្នាក់ចរាចរណ៍តែប៉ុណ្ណោះ។
លោកថ្លែងថា៖ «រថយន្តទាំងនោះគឺយើងអត់ឃាត់ទេគ្រាន់តែតម្រូវឱ្យអ្នកបើកបរធ្វើកិច្ចសន្យាឈប់បង្កការរំខានដល់ពលរដ្ឋទៀត។ យើងអនុវត្តទៅតាមជំនាញ និងតាមច្បាប់តែប៉ុណ្ណោះ។ យើងអនុវត្តដូចជាភ្លៀងរលឹមអ៊ីចឹង»។
លោកបន្តថា ការអនុវត្តសណ្តាប់ធ្នាប់ចរាចរណ៍នេះ គឺសមត្ថកិច្ចជំនាញនៅតែបន្តធ្វើកិច្ចការរបស់ខ្លួនរហូត។ បើនៅតំបន់ស្រុកណាដែលសមត្ថកិច្ចមិនទាន់ចុះទៅដល់ គឺសមត្ថកិច្ចលោកនឹងបន្ថែមការងាររហូតទៅដល់តំបន់នោះ ដើម្បីរួមគ្នាពង្រឹង និងអនុវត្តច្បាប់ឱកាន់តែប្រសើរ។
ការអនុវត្តច្បាប់រយៈពេល ២ ថ្ងៃកន្លងមកនេះ សមត្ថកិច្ចឃាត់រថយន្តបានចំនួន ១៩ គ្រឿង។ ក្នុងនោះសមត្ថកិច្ចបានដកហូតស៊ីផ្លេខ្យល់ពីរថយន្តដឹកដីបានចំនួន ៩ ដើម នៅលើបណ្តោយផ្លូវជាតិលេខ ២១ និងផ្លូវលេខ ១២១០ នៅឃុំស្អាងភ្នំ ស្រុកស្អាង ខេត្តកណ្ដាល។ បន្ទាប់ពីតម្រូវឱ្យដោះស៊ីផ្លេចេញពីរថយន្តហើយសមត្ថកិច្ចឱ្យអ្នកបើកបររថយន្តធ្វើកិច្ចសន្យាដោយបញ្ឈប់មិនឱ្យប្រើស៊ីផ្លេខ្យល់តទៅទៀត។
លោក សំអឿន បញ្ចាក់ថា ក្រៅពីដកហូតស៊ីផ្លេខ្យល់ពីរថយន្តហើយនោះ សមត្ថកិច្ចលោកបានអនុវត្តតាមអនុក្រឹត្យលេខ ៣៩ ដែលរាជរដ្ឋាភិបាលបានកំណត់ ដោយកម្លាំងសមត្ថកិច្ចរបស់លោក ត្រូវតែចាប់ផាកពិន័យអន្តរកាល។ ការងារទាំងនេះគឺសមត្ថកិច្ចជំនាញគ្មានធ្វើអ្វីខុសច្បាប់ទេ មានតែការយោគយល់ទៅវិញទេ។
ចំពោះរថយន្តដែលបានផាកពិន័យមានទាំងអស់ចំនួន ៧ គ្រឿង ក្នុងនោះមានរថយន្តដឹកអីវ៉ាន់សំពីងសំពោង ១ គ្រឿង និងអ្នកបើករថយន្តដែលមិនពាក់ខ្សែក្រវាត់ការពារចំនួន ៦ គ្រឿង សរុបទឹកប្រាក់ចំនួន ១ ២០០ ០០០រៀល៕
វីដេអូ៖
