.jpg)
មន្ត្រីពេលរៀបចំដុតកម្ទេចជ្រូកមានជំងឺប៉េស្ដពីម្សិលមិញ។ រូបថត សហការី
ភ្នំពេញៈ អគ្គនាយកដ្ឋានសុខភាពសត្វ និងផលិតកម្មសត្វ ក្រសួងកសិកម្ម រុក្ខាប្រមាញ់ និងនេសាទ កាលពីម្សិលមិញបានដុតកម្ទេចចោលសត្វជ្រូកចំនួន ១០០ ក្បាល ដែលចាប់បានពីទីសត្តឃាតចំនួន ២ កន្លែងផ្សេងគ្នាក្នុងរាជធានីភ្នំពេញ បន្ទាប់ពីរកឃើញមានកើតជំងឺប៉េស្តជ្រូកអាហ្វ្រិក។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ បានប្រាប់ ភ្នំពេញ ប៉ុស្តិ៍ តាមទូរស័ព្ទអំឡុងពេលដុតកម្ទេចជ្រូកទាំងនេះនៅតំបន់ភ្នំតាម៉ៅ ខេត្តតាកែវ ថា ជ្រូកទាំង ១០០ ក្បាលនេះ គឺត្រូវបានក្រុមជំនាញ ស្រាវជ្រាវតាមចាប់បានតាំងពីច្រកព្រំដែនថៃ រហូតមកឃាត់បាននៅក្នុងទីសត្វឃាតចំនួន ២ កន្លែងផ្សេងគ្នា។
លោកបានបន្តថា កន្លែងដែលឃាត់ជ្រូកមានផ្ទុកជំងឺនេះបាន គឺទី១ នៅចំណុចទីសត្វឃាតច្បារអំពៅ និងទី២ នៅទីសត្វឃាតដំណាក់ធំក្នុងរាជធានីភ្នំពេញ ហើយក្រុមជំនាញបានចុះប្រតិបត្តិការឃាត់ជ្រូកទាំងនេះកាលពីសប្តាហ៍មុន ខណៈលទ្ធផលធ្វើតេស្តបានរកឃើញថា មានផ្ទុកជំងឺប៉េស្ដ។
លោកបានបញ្ជាក់ថា៖ «យើងទទួលបានព័ត៌មានពីការនាំជ្រូកទាំងនេះខុសច្បាប់នៅច្រកព្រំដែន ប៉ុន្តែយើងដេញចាប់មិនទាន់ក៏ចូលទៅដល់ទីសត្វឃាតនៅភ្នំពេញ ហើយយើងក៏បានតាមចូលទៅចាប់រហូតដល់ទីសត្វឃាតទាំងនេះតែម្តង»។
ចំពោះនីតិវិធីលើជនពាក់ព័ន្ធនឹងការនាំជ្រូកខុសច្បាប់ដែលមានជំងឺចូលមកកម្ពុជានេះ លោក តាន់ ផាន់ណារ៉ា បានអះអាងថា អគ្គនាយកដ្ឋាននឹងធ្វើទៅតាមច្បាប់ដែលមានចែង ខណៈអ្នកជាប់ពាក់ព័ន្ធ សមត្ថកិច្ចបន្តស្រាវជ្រាវដើម្បីយកមកអនុវត្តទោសតាមនីតិវិធីច្បាប់។
លោកបានបន្ថែមថា៖ «ពេលយើងចាប់ហើយ យើងសម្រេចនូវអ្វីដែលជាហានិភ័យសិន ហើយវាក៏ជាការសម្រេចរបស់ឯកឧត្តមរដ្ឋមន្ត្រីដែរ ថាដុតកម្ទេចចោលសិន ហើយចាំនីតិវិធីផ្សេងៗយើងធ្វើបន្តទៀត។ មកទល់ពេលនេះយើងមិនទាន់ឃាត់ខ្លួននរណាទេ ប៉ុន្តែភ័ស្តុតាង ដូចជា យានយន្តអី គឺនៅនឹងយើងនៅឡើយទេ»។
គិតត្រឹមថ្ងៃទី ៣ ខែមិថុនា អគ្គនាយកដ្ឋានសុខភាពសត្វបានដុតកម្ទេចជ្រូកនាំចូលខុសច្បាប់ដែលមានផ្ទុកជំងឺប៉េស្តជ្រូកអាហ្វ្រិកចំនួន ៤ លើកមកហើយ គឺលើកទី១ មានចំនួន ៣០ ក្បាល លើកទី២ មានចំនួន ៣៨ ក្បាល និងលើកទី៣ មានចំនួន ១២០ ក្បាល ខណៈការដុតកម្ទេចចោលនៅថ្ងៃទី ៣ មិថុនា គឺជាករណីលើកទី៤។ នេះបើតាម លោក តាន់ ផាន់ណារ៉ា។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានថ្លែងថា ករណីនេះ គឺជាការធ្វេសប្រហែសរបស់សមត្ថកិច្ចនៅតាមព្រំដែនដែលនៅតែបណ្តែតបណ្តោយឱ្យមានការនាំចូលជ្រូកដោយខុសច្បាប់រហូតមកដល់រាជធានីភ្នំពេញ។ លោកបារម្ភថា បើអគ្គនាយកដ្ឋានមិនបង្ក្រាបករណីនេះបានទេ អាចនឹងមានការចម្លងជំងឺនេះចូលមកកាន់ប្រទេសកម្ពុជា។
ករណីនេះលោកភ័យខ្លាចការនាំចូលខុសច្បាប់ដទៃទៀតដែលអាចនឹងបង្កឱ្យកើតមានហេតុការណ៍ផ្ទុះជំងឺប៉េស្តជ្រូកអាហ្វ្រិក ដែលជាហេតុធ្វើឱ្យកម្ពុជាខាតបង់សេដ្ឋកិច្ចយ៉ាងធ្ងន់ធ្ងរម្តងទៀត។
លោក ស្រ៊ុន ពៅ បានអះអាងថា ជំងឺប៉េស្តជ្រូកអាហ្វ្រិកនេះ គឺជាជំងឺសត្វជ្រូក ១ ប្រភេទ ដែលឆ្លងយ៉ាងសាហាវបំផុតទៅដល់សត្វជ្រូកដទៃ ហើយវាមិនទាន់មានវ៉ាក់សាំងសម្រាប់ចាក់ការពារ និងព្យាបាលនោះទេ ព្រោះថា ប្រសិនបើមានឆ្លងចូលមកដល់ជ្រូកនៅក្នុងស្រុក នឹងបន្តរីករាលដាលតាមរយៈការប៉ះពាល់សត្វជ្រូកមានជំងឺ តាមរយៈរុយ ឬចៃរបស់សត្វទាំងនោះយ៉ាងឆាប់រហ័ស។
លោកបានបញ្ជាក់ថា៖ «ខ្ញុំសូមសំណូមពរឱ្យសមត្ថកិច្ចនៅតាមព្រំដែនរឹតបន្ដឹងឱ្យមែនទែន ពីព្រោះសត្វមានជំងឺនេះ បើកាលណា ដឹកឆ្លងកាត់មកយើង មិនដឹងឆ្លងកាត់ប៉ុន្មានកន្លែងរួចមកហើយទេ។ អ៊ីចឹងហើយ ប្រសិនបើសត្វអស់នេះ យើងការពារមិនបានដោយនៅតែបណ្តែតបណ្តាយចូលមកបានទៀត នឹងធ្វើឱ្យប៉ះពាល់យ៉ាងធ្ងន់ធ្ងរដល់អ្នកចិញ្ចឹមក្នុងស្រុក»។
កាលពីឆ្នាំ ២០១៩ នៅក្នុងប្រទេសកម្ពុជាធ្លាប់មានការផ្ទុះជំងឺនេះម្តងរួចមកហើយ ដោយការឆ្លងចូលនៃជំងឺប៉េស្តជ្រូកអាហ្វ្រិកជាហេតុធ្វើឱ្យកម្ពុជាជួបប្រទះនូវការខ្វះជ្រូកសម្រាប់ផ្គត់ផ្គង់ក្នុងស្រុក ដោយសារតែត្រូវសម្លាប់ជ្រូកដែលឆ្លងក្នុងស្រុកអស់រាប់ពាន់ក្បាល។ នេះបើយោងតាមការអះអាងរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ៕
វីដេអូ៖
