.jpg)
រាជរដ្ឋាភិបាលសម្រេចដាក់បញ្ចូលសាលាអង្គការជំនួយនៃក្តីសង្ឃឹម ជាគ្រឹះស្ថានសាធារណៈរបស់់រដ្ឋ ដោយរួមបញ្ចូលទាំងគ្រូ និងបុគ្គលិកអប់រំក្នុងសាលានេះទាំងអស់ឱ្យក្លាយជាបុគ្គលិករដ្ឋដោយស្វ័យប្រវត្តិ។ រូបថត Hands of Hope Community
ភ្នំពេញ៖ រាជរដ្ឋាភិបាលបានសម្រេចដាក់បញ្ចូលសាលាអង្គការជំនួយនៃក្តីសង្ឃឹមសម្រាប់សហគមន៍ (សាលាកុមារអូទីសិម) ជាគ្រឹះស្ថានសាធារណៈរបស់់រដ្ឋ ដោយរួមបញ្ចូលទាំងគ្រូ និងបុគ្គលិកអប់រំក្នុងសាលានេះទាំងអស់ឱ្យក្លាយជាបុគ្គលិករដ្ឋដោយស្វ័យប្រវត្តិ។
ការសម្រេចដាក់បញ្ចូលសាលានេះជាសាលារដ្ឋបានធ្វើឡើង តាមសំណើរបស់ក្រសួងអប់រំ យុវជន និងកីឡា ដើម្បីបំពេញតម្រូវការចាំបាច់របស់ខ្លួន ក្នុងការបង្កើនការបណ្តុះបណ្តាល និងអប់រំនៅក្នុងប្រទេសកម្ពុជា បន្ទាប់ពីបានធ្វើការសិក្សាវាយតម្លៃយ៉ាងយកចិត្តទុកដាក់។
យោងតាមលិខិតមួយច្បាប់ ចុះហត្ថលេខាដោយលោកនាយករដ្ឋមន្ត្រី ហ៊ុន សែន បានបញ្ជាក់ថា រាជរដ្ឋាភិបាលយល់ព្រមជាគោលការណ៍ ដោយបញ្ចូលសាលាអង្គការជំនួយនៃក្ដីសង្ឃឹមសម្រាប់សហគមន៍ជាគ្រឹះស្ថានសិក្សាសាធារណៈ ចាប់ពីឆ្នាំសិក្សា ២០២០-២០២១ តទៅ។
បន្ថែមពីនេះ រដ្ឋាភិបាលក៏នឹងផ្តល់ការឧបត្ថម្ភថវិកាលើដំណើរការសាលារៀន ព្រមទាំងបញ្ចូលគ្រូបង្រៀន និងបុគ្គលិកអប់រំនៅសល់ចំនួន ២៦ នាក់ ទៅក្នុងក្របខ័ណ្ឌរដ្ឋ ដោយបានណែនាំឱ្យបន្តពិភាក្សាជាមួយក្រសួងសេដ្ឋកិច្ច និងហិរញ្ញវត្ថុ ដើម្បីទទួលបានការឧបត្ថម្ភបន្ថែមសម្រាប់ដំណើរការសាលារៀន។
ជាមួយនឹងការប្រកាសដាក់សាលាកុមារអូទីសិមនេះ ចូលជាគ្រឹះស្ថានសាធារណៈរបស់់រដ្ឋជាផ្លូវការ ក្រសួងអប់រំ យុវជន និងកីឡា បានឱ្យដឹងនៅក្នុងសេចក្តីប្រកាសរបស់ខ្លួនចុះថ្ងៃទី ៣ មិថុនាថា ក្រសួងបានសម្រេចប្រែក្លាយសាលាអង្គការជំនួយនៃក្តីសង្ឃឹមសម្រាប់សហគមន៍ ទៅជាវិទ្យាល័យអប់រំពិសេសក្រុងតាខ្មៅ ដែលមានទីតាំងស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ចាប់ពីឆ្នាំសិក្សា ២០២០-២០២១ តទៅ។
បន្ថែមពីនេះ ក្រសួងបានបន្តថា សម្រាប់វិទ្យាល័យអប់រំពិសេសក្រុងតាខ្មៅនេះ ត្រូវដឹកនាំដោយនាយកមួយរូប និងនាយករងមួយរូប ឬច្រើនរូបជាជំនួយការតាមការចាំបាច់ ព្រមទាំងបុគ្គលិកផ្សេងទៀត ស្របតាមលិខិតបទដ្ឋានគតិយុត្តប្រើប្រាស់ក្របខ័ណ្ឌបុគ្គលិកសម្រាប់អប់រំពិសេស។
កុមាររៀននៅក្នុងសាលាអូទីសិម នាពេលកន្លងទៅ។ រូបថត Hands of Hope Community
នាយក នាយករង មានសិទ្ធិទទួលប្រាក់បំណាច់មុខងារតាមគោលការណ៍កំណត់របស់រដ្ឋ។
លោក ចាន់ សារិន នាយកប្រតិបត្តិនៃអង្គការជំនួយនៃក្តីសង្ឃឹមសម្រាប់សហគមន៍បានប្រាប់ ភ្នំពេញ ប៉ុស្តិ៍ នៅថ្ងៃទី ៤ មិថុនា ដោយបង្ហាញក្តីត្រេកអរ ដែលរដ្ឋាភិបាលបានទទួលស្គាល់សាលានេះ ជាគ្រឹះស្ថានសាធារណៈរដ្ឋ ខណៈដែលក្នុងរយៈពេលចុងក្រោយនេះ សាលាបានប្រឈមនូវការខ្វះខាតជំនួយជាច្រើន។
លោកបញ្ជាក់ថា៖ «ដោយសារតែឆ្នាំ ២០២០ កន្លងមកនេះ សាលាបានជួបបញ្ហាគ្មានម្ចាស់ជំនួយ ដែលរដ្ឋាភិបាលបានស្តាប់ពីការលំបាករបស់យើង ក៏បានទទួលស្គាល់យើងសម្រាប់ផ្តល់ក្តីសង្ឃឹមដល់កុមារមានបញ្ហាស្មារតីនៅក្នុងសាលាយើង»។
បើតាមលោក ចាន សារិន សាលាអង្គការជំនួយនៃក្តីសង្ឃឹមសម្រាប់សហគមន៍មានសាខាចំនួន ៥ នៅក្នុងរាជធានីភ្នំពេញ និងខេត្តកណ្តាល ដែលមានកុមារមានបញ្ហាស្មារតី កំពុងសិក្សាក្នុងសាខាទាំង ៥ នេះ ចំនួន ២០៥ នាក់ និងមានគ្រូបង្រៀនពេញសិទ្ធិចំនួន ៤០ នាក់ និងអ្នកស្ម័គ្រចិត្តមានជិត ១០ នាក់។
លោកបានបញ្ជាក់ថា៖ «នៅពេលយើងទទួលបានការសម្រេចអនុញ្ញាតនេះហើយ យើងនឹងបញ្ចូនសាលាសាខាទាំង ៥ មកជាសាលាតែមួយ ដើម្បីបង្កើតជាវិទ្យាល័យអប់រំពិសេសក្រុងតាខ្មៅនេះ ដោយមានការគ្របដណ្តប់ចាប់ពីថ្នាក់មតេយ្យ ដល់ថ្នាក់ទី ១២ ដោយធ្វើការគ្របដណ្តប់ចំពោះតំបន់ដែលមានក្នុងពេលបច្ចុប្បន្ន មាននៅស្រុកស្អាង ឬស្រុកកណ្តាលស្ទឹង»៕
