ភ្នំពេញៈ មន្ត្រីនាយកដ្ឋានប្រឆាំងបទល្មើសបច្ចេកវិទ្យាប្រាប់ឱ្យប្រជាពលរដ្ឋមានការប្រុងប្រយ័ត្នជាមួយនឹងការឈ្នះរង្វាន់ពីក្រុមហ៊ុនកូកាកូឡា ផ្សាយតាមរយៈបណ្ដាញទំនាក់ទំនងសង្គមអេឡិចត្រូនិក ខណៈអ្នកប្រឹក្សាផ្នែកសន្តិសុខឌីជីថលអះអាងថា ការផ្ញើសារឈ្នះរង្វាន់នោះ ជាការបោកប្រាស់។
លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យាថ្លែងថា ក្នុងរយៈពេលថ្មីៗនេះនាយកដ្ឋានប្រឆាំងបទល្មើសបច្ចេកវិទ្យា បានសង្កេតឃើញមានការកើនឡើងនូវការទទួលបានសារទាក់ទងនឹងការឈ្នះរង្វាន់ពីមូលនិធិសុខុមាលភាពកូកាកូឡាតាមបណ្ដាញទំនាក់ទំនងសង្គម Telegram និងហ្វេសប៊ុកដែលមានខ្លឹមសារថា «ចុចដើម្បីចូលរួមស្ទង់មតិ មានឱកាសឈ្នះ ២០ ម៉ឺនរៀល»។
លោក ជា ពៅ ថ្លែងថា៖ «សូមឱ្យអ្នកប្រើប្រាស់ទាំងអស់ កុំជឿលើការឈ្នះរង្វាន់ ដែលផ្សព្វផ្សាយតាមរយៈបណ្ដាញទំនាក់ទំនងសង្គមណាមួយនោះ ព្រោះភាគច្រើន វាគឺជាការបោកបញ្ឆោត។ សូមកុំចុចនៅលើតំណភ្ជាប់ ឬធ្វើការចែកចាយបន្ត ដែលនាំឱ្យខាតបង់ពេលវេលា ឬប្រាក់កាសរបស់លោកអ្នកតែប៉ុណ្ណោះ»។
តាមការស្រាវជ្រាវរបស់នាយកដ្ឋានប្រឆាំងបទល្មើសបច្ចេកវិទ្យា សារទាំងអស់នោះគឺជាសារបោកបញ្ឆោតហើយអាចជាល្បិចរបស់ពួកក្រុមជនខិលខូច ដើម្បីចែកចាយកម្មវិធីមេរោគ លួចប្រមូលយកទិន្នន័យរបស់អ្នកប្រើប្រាស់ ឬដើម្បីស្វែងរកទីតាំងរបស់អ្នកប្រើប្រាស់។
លោកថ្លែងថា៖ «នៅពេលខ្លះ ពួកគេអាចប្រើល្បិចទាមទារឱ្យអ្នកប្រើប្រាស់ធ្វើការបង់ប្រាក់បន្តិចបន្តួច ដើម្បីឱ្យលោកអ្នកមានការជឿជាក់ ប៉ុន្តែនេះជាល្បិចដើម្បីបោកបញ្ឆោតយកប្រាក់កាស ឬដើម្បីលួចយកលេខបណ្ណឥណទានរបស់លោកអ្នក»។
លោក ង៉ែត ម៉ូសេ អ្នកប្រឹក្សាផ្នែកសន្តិសុខឌីជីថលថ្លែងថា លោកបានសាកល្បងធ្វើតេស្តផ្ទាល់តាមអ្វីដែលអ្នកបោកប្រាស់បានផ្ញើសារមកតាមបណ្តាញសង្គម។ ជាលទ្ធផលបង្ហាញថា នៅក្នុងសារនោះគឺជាការបោកប្រាស់ ដែលនាំឱ្យមានការខាតបង់ប្រយោជន៍សម្រាប់អ្នកប្រើប្រាស់មួយចំនួន ដែលខ្វះការយល់ដឹង។ ជនបោកប្រាស់បានយកឈ្មោះ កូកាកូឡា ទៅដាក់នៅលើផ្ទាំងផ្សាយ ហើយផ្ញើសារតាមរយៈបណ្តាញសង្គមអេឡិចត្រូនិក។ «បុគ្គលទុច្ចរិតលាក់មុខ បង្កើតការបោកប្រាស់បែបហ្នឹង គឺមានចេតនាផ្សព្វផ្សាយឱ្យបានទូលំទូលាយលំដាប់ពិភពលោក ព្រោះប្រទេសណា ដែលបើកសារនោះ វានឹងចេញជាភាសារបស់ប្រទេសហ្នឹងអ៊ីចឹងអ្នករងគ្រោះអាចមាននៅក្នុងប្រទេសយើងផង ឬប្រទេសផ្សេងៗទៀតផងដែរ»។
អ្នកប្រឹក្សាផ្នែកសន្តិសុខឌីជីថល រូបនេះថា ការស្រាវជ្រាវរកជនល្មើសបច្ចេកវិទ្យាដែលបង្កើតសារបោកប្រាស់នេះមិនមែនជាការងាយទេ។ «ខ្ញុំមើលទៅ ខ្ញុំអត់ដឹងថា ឧក្រិដ្ឋជននៅទីតាំងណាទេ ប៉ុន្តែតំណភ្ជាប់ដែលខ្ញុំចូលទៅមើលហ្នឹង គឺឃើញថា ជា អាយភី ដែលសឺវ័រ វាហោះនៅអាមេរិក ប៉ុន្តែមិនមែនមានន័យថា ពួកក្រុមឧក្រិដ្ឋជននៅអាមេរិកនោះទេ»៕
វីដេអូ៖