ភ្នំពេញៈ សមត្ថកិច្ចនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) នៃក្រសួងមហាផ្ទៃកំពុងបន្តស្វែងរកចាប់ខ្លួនអ្នកពាក់ព័ន្ធនឹងអាល់កុលក្លែងក្លាយ ឬសារធាតុមេតាណុលជាង ៧៤ ០០០ លីត្រ ដើម្បីយកមកផ្តន្ទាទោស បន្ទាប់ពីសហការចុះបង្ក្រាប និងរឹបអូសបាននៅទីតាំងឃ្លាំងចំនួន ៣ ក្នុងសង្កាត់ស្ទឹងមានជ័យ ២ ខណ្ឌមានជ័យកាលពីថ្ងៃទី ១ ខែមិថុនា។
តាមសេចក្ដីប្រកាសព័ត៌មានរបស់ គ.ប.ផ.ក កាលពីថ្ងៃទី ២ ខែមិថុនា បានឱ្យដឹងថា ការចុះបង្ក្រាបទីតាំងឃ្លាំងស្តុកអាល់កុលទាំង ៣ នេះ កម្លាំងចម្រុះរបស់ គ.ប.ផ.ក បានរកឃើញវត្ថុតាងអាល់កុលចំនួន ១ ៥០៨ កាន និងសារធាតុមេតាណុលចំនួន ១៣១ ធុង ស្មើនឹងចំនួន ៧៤ ០៦០ លីត្រ។
អាល់កុលដែលរឹបអូសបានទាំងនេះ ទី ១ ជាអាល់កុលក្លែងក្លាយ ទី ២ គ្មានគុណប្រយោជន៍អ្វីទាំងអស់ សម្រាប់ប្រើប្រាស់ក្នុងផ្នែកវេជ្ជសាស្ត្រ ឬសម្រាប់សម្លាប់មេរោគផ្សេងៗជាពិសេសមេរោគកូវីដ ១៩ និងទី ៣ ពុំមានច្បាប់អនុញ្ញាត។
គ.ប.ផ.ក បញ្ជាក់ថា៖ «សម្តេចតេជោ ហ៊ុន សែន នាយករដ្ឋមន្ត្រីកាលពីថ្ងៃទី ៣០ ខែមីនា ឆ្នាំ ២០២០ បានប្រកាសដាក់បទបញ្ជាយ៉ាងម៉ឺងម៉ាត់ឱ្យក្រសួងមហាផ្ទៃសម្របសម្រួលដឹកនាំការបង្ក្រាបផលិតផលឱសថសាស្ត្រ និងវេជ្ជសាស្ត្រ បង្ការទប់ស្កាត់ និងព្យាបាលជំងឺកូវីដ ១៩ ក្លែងក្លាយ និងគ្មានគុណភាព។ សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃតែងតែដឹកនាំចង្អុលទិសក្នុងការចុះអនុវត្តអនុសាសន៍ខាងលើនេះដែលស្តែងចេញឡើងនូវសកម្មភាពបង្ក្រាបនេះ»។
សេចក្ដីប្រកាសព័ត៌មានដដែលបញ្ជាក់ថា ដោយឃើញទីតាំងខុសច្បាប់នេះមិនអនុលោមតាមច្បាប់ ព្រះរាជអាជ្ញាអមសាលាដំបូងរាជធានីភ្នំពេញបានសម្រេចឱ្យ គ.ប.ផ.ក បិទទីតាំងទាំង ៣ នេះ និងផ្អាកអាជីវកម្មជាបណ្ដោះអាសន្ន។ «បច្ចុប្បន្ន សមត្ថកិច្ចកំពុងបន្តស្វែងរកចាប់ជនសង្ស័យពាក់ព័ន្ធ ដើម្បីផ្តន្ទាទោសតាមច្បាប់»។
បើតាម គ.ប.ផ.ក ការចុះបង្ក្រាបទីតាំងស្តុកទុកចែកចាយ អាល់កុលក្លែងក្លាយដ៏ធំ និងច្រើនសន្ធឹកសន្ធាប់នេះគឺជាករណីពុំធ្លាប់មាននាពេលកន្លងមក។
គ.ប.ផ.ក បញ្ជាក់ថា៖ «យើងសង្កេតឃើញថា មានជនខិលខូចមួយចំនួនបាននាំចូលស្ដុកទុក និងចែកចាយអាល់កុលក្លែងក្លាយនៅលើទីផ្សារកម្ពុជាស្របពេលកំពុងជួបវិបត្តិកូវីដ ១៩ ដែលអ្នកប្រើប្រាស់កំពុងមានតម្រូវការច្រើន។ កត្ដានេះជាហានិភ័យងាយរងផលប៉ះពាល់ដល់សុខភាពពលរដ្ឋផងដែរ»។
លោក មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយបានឱ្យដឹងពីម្សិលមិញថា បច្ចុប្បន្នសមត្ថកិច្ចមានសាវតារអ្នកពាក់ព័ន្ធករណីលក់អាល់កុលក្លែងក្លាយនេះរួចហើយ និងកំពុងបន្តស្រាវជ្រាវឃាត់ខ្លួនមកអនុវត្ដតាមច្បាប់។
លោកថ្លែងថា៖ «ឥឡូវកម្លាំងសមត្ថកិច្ចយើងកំពុងតែបន្តស្រាវជ្រាវរកម្ចាស់អាល់កុលក្លែងក្លាយនេះមកទទួលខុសត្រូវតាមច្បាប់។ នៅពេលដែលសមត្ថកិច្ចយើងចូលទៅបង្ក្រាបនោះ គឺមានតែកម្មករ ប៉ុន្ដែទោះបីជាយ៉ាងណាក៏យើងមានភ័ស្ថុតាង និងស្គាល់សាវតារ អត្ដសញ្ញាណជនសង្ស័យហើយ។ ករណីនេះយើងនឹងមិនអនុញ្ញាតឱ្យជនល្មើសរួចខ្លួនទេ គឺត្រូវតែអនុវត្ដតាមច្បាប់ហើយ»។
លោកបានឱ្យដឹងទៀតថា ពេលនេះលោកកំពុងបញ្ជាសមត្ថកិច្ចឱ្យចុះស្រាវជ្រាវរឹបអូសអាល់កុលក្លែងក្លាយដែលជនខិលខូចបានចែកចាយបន្តលើទីផ្សារមកវិញតាមរយៈវិក្កយបត្រទិញ-លក់ ដែលសមត្ថកិច្ចស្រាវជ្រាវរកឃើញ។
ចាប់តាំងពីមានករណីផ្ទុះរីករាលដាលជំងឺកូវីដ ១៩ ក្នុងព្រឹត្ដិការណ៍ ២០ កុម្ភៈ រហូតមក មន្ដ្រីនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្មសាខារាជធានី-ភ្នំពេញបានបង្ក្រាប និងរឹបអូសអាល់កុលក្លែងក្លាយបានជាង ៤០ តោន និងបានយកទៅបំផ្លាញចោលជាបន្តបន្ទាប់។
លោក ហេង មាលី ប្រធានសាខា ក.ប.ប រាជធានីភ្នំពេញបានឱ្យដឹងកាលពីម្សិលមិញដែរថា មន្ដ្រី ក.ប.ប រាជធានីភ្នំពេញតែងចុះត្រួតពិនិត្យនៅតាមកន្លែងលក់ដូរជាប្រចាំ ដើម្បីពិនិត្យលើគុណភាពទំនិញ និងអាល់កុលក្លែងក្លាយ កុំឱ្យមានការលក់បន្លំ។
លោកបានបន្តថា៖ «ចំពោះអ្នកពាក់ព័ន្ធក្នុងការលក់អាល់កុលក្លែងក្លាយនេះយើងក៏បានកសាងសំណុំរឿងបញ្ជូនទៅតុលាការ ដើម្បីទុកឱ្យតុលាការចាត់វិធានការតាមច្បាប់ជាច្រើនករណីដែរ»។
បើតាមអគ្គនាយកដ្ឋាន ក.ប.ប អាល់កុល ឬអេតាណុលគឺជាសារធាតុដែលគេយកមកប្រើសម្រាប់សម្លាប់មេរោគពិសេសក្នុងដំណាក់កាលជំងឺកូវីដ ១៩ កំពុងរីករាលដាលខ្លាំងធ្វើឱ្យមានតម្រូវការខ្ពស់។ ហេតុនេះនាំឱ្យមានបុគ្គលខ្លះឆ្លៀតឱកាសបន្លំយកសារធាតុមេតាណុលមកលក់ជូនពលរដ្ឋដើម្បីយកទៅសម្លាប់មេរោគ ឬធ្វើជាសារធាតុផ្សំសម្រាប់ផលិតជាជែលសម្លាប់មេរោគ។
ប៉ុន្ដែសារធាតុមេតាណុល គឺជាសារធាតុពុលដែលគេច្រើនប្រើធ្វើជាសារធាតុសម្រាប់រំលាយ។ ការប្រើមេតាណុលធ្វើជាសារធាតុសម្លាប់មេរោគមិនត្រឹមតែគ្មានប្រសិទ្ធភាពប៉ុណ្ណោះទេ តែថែមទាំងបណ្តាលឱ្យប៉ះពាល់ដល់សុខភាពអ្នកប្រើទៀតផង ដូចជា ធ្វើឱ្យរលាកស្បែក រលាកភ្នែក ឈឺក្បាល វិលមុខ ស្រវាំងភ្នែក ងងុយដេក បាត់បង់ស្មារតី ក្អួតចង្អោរ រំខានដល់ការរំលាយអាហារ ឬបណ្តាលឱ្យស្លាប់បាន បើយកទៅលាយជាមួយស្រាហើយបរិភោគលើសកម្រិត៕