.jpg)
គណៈកម្មាធិការអចិន្ត្រៃយ៍រដ្ឋសភា បង្ហាញលទ្ធផលនៃកិច្ចប្រជុំរបស់ខ្លួននៅថ្ងៃសុក្រនេះ។ រូបថត រដ្ឋសភា
គណៈកម្មាធិការអចិន្ត្រៃយ៍រដ្ឋសភា បង្ហាញលទ្ធផលនៃកិច្ចប្រជុំរបស់ខ្លួននៅថ្ងៃសុក្រនេះ ដោយសម្រេចអនុម័តបញ្ចូនសេចក្តីព្រាងច្បាប់មួយចំនួនទៅគណៈកម្មការសាមីធ្វើការពិនិត្យបន្ត ខណៈអនុម័តបញ្ចូលសេចក្តីព្រាងច្បាប់មួយចំនួនក្នុងរបៀបវារៈសម័យប្រជុំរដ្ឋសភាលើកទី ៦ នីតិកាលទី ៦ នាពេលខាងមុខ។
លិខិតរបស់រដ្ឋសភា ស្តីពីលទ្ធផលកិច្ចប្រជុំចុះថ្ងៃទី ៤ មិថុនា បានឲ្យដឹងថា គណៈកម្មាធិការអចិន្ត្រៃយ៍បានបើកកិច្ចប្រជុំនៅថ្ងៃនេះតាមប្រព័ន្ធវីដេអូ ដោយដឹកនាំដោយលោក ហេង សំរិន ប្រធានរដ្ឋសភា។
រដ្ឋសភាបានឲ្យដឹងបន្តថា អង្គប្រជុំបានធ្វើការពិភាក្សា និងអនុម័តតាមរបៀបវារៈ ដោយបានអនុម័តប្រគល់សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ជូនគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម ដោយសហការជាមួយគណៈកម្មការពាក់ព័ន្ធពិនិត្យ ដោយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ។
បន្ថែមពីនេះ អង្គប្រជុំក៏បានអនុម័តប្រគល់សេចក្តីព្រាងច្បាប់ស្តីពី វិសោធនកម្មមាត្រា ១៤ ថ្មីនៃច្បាប់ស្ដីពី វិសោធនកម្មមាត្រា ១៨ នៃច្បាប់ស្ដីពីសវនកម្មនៃព្រះរាជាណាចក្រកម្ពុជា ជូនគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភាធ្វើការពិនិត្យ សិក្សា ដោយធ្វើរបាយការណ៍ជូនគណៈកម្មាធិការវិញ។
អង្គប្រជុំនៃគណៈកម្មាធិការអចិន្ត្រៃយ៍នរដ្ឋសភា ថែមទាំងបានអនុម័តយល់ព្រមនូវសេចក្តីព្រាងសេចក្តីសម្រេចស្តីពីការកំណត់បែបបទ និង នីតិវិធីនៃការជ្រើសរើសបេក្ខជន ប្រធានគណៈកម្មាធិការជាតិរៀបចំការបោះឆ្នោត និងប្រគល់ភារកិច្ច ជូនអគ្គលេខាធិការដ្ឋានរដ្ឋសភា ធ្វើសេចក្តីជូនដំណឹងជ្រើសរើសបេក្ខជន ហើយធ្វើរបាយការណ៍ជូន គណៈកម្មាធិការអចិន្ត្រៃយ៍រដ្ឋសភាវិញផងដែរ។
ជាមួយនឹងការបញ្ចូលសេចក្តីព្រាងច្បាប់ទាំងនេះ ទៅគណៈកម្មការសាមីពិនិត្យ អង្គប្រជុំគណៈកម្មាធិការអចិន្ត្រៃយ៍នរដ្ឋសភា បានអនុម័តយល់ព្រមបញ្ចូលក្នុងរបៀបវារៈសម័យប្រជុំរដ្ឋសភាលើកទី ៦ នីតិកាលទី ៦ នាពេលខាងមុខដោយសេចក្តីព្រាងច្បាប់មួយចំនួន។
តាមសេចក្តីប្រកាសរបស់រដ្ឋសភា សេចក្តីព្រាងច្បាប់ទាំងនេះរួមមានសេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាល នៃព្រះរាជាណាចក្រកម្ពុជាឱ្យក្រុមហ៊ុន ស្មើថោក ខូអិលធីឌី សម្រាប់គម្រោងអភិវឌ្ឍខ្សែបណ្តាញ បញ្ជូនអគ្គិសនី តង់ស្យុង ៥០០ គីឡូវ៉ុល ពីខេត្តបាត់ដំបង ទៅកាន់ព្រំដែនកម្ពុជា-ថៃ។
សេចក្តីព្រាងច្បាប់ស្ដីពីការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុន ស្មើចេក ខូ អិលធឺឌី សម្រាប់គម្រោងអភិវឌ្ឍខ្សែបណ្តាញ បញ្ជូនអគ្គិសនីតង់ស្យុង ៥០០ គីឡូវ៉ុល ពីរាជធានីភ្នំពេញ ទៅកាន់ព្រំដែនកម្ពុជា-ឡាវ។
សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុនអគ្គិសនីវៀតណាមនៃសាធារណរដ្ឋសង្គមនិយមវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាម។ ព្រមទាំងសេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលកម្ពុជា ឱ្យក្រុមហ៊ុន ឆាយណា ណេសិនណល យោវី ម៉ាស៊ីនណរី ខបភើរេសិន សម្រាប់គម្រោងអភិវឌ្ឍវារីអគ្គិសនីស្ទឹងតាតៃលើ អានុភាព ១៥០ មេហ្គាវ៉ាត់ ខេត្តកោះកុង។ នេះបើតាមសេចក្តីប្រកាសដដែល៕
