នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈក្រសួងមហាផ្ទៃ បានឲ្យដឹងថា ក្នុងរយៈពេល ១ ថ្ងៃនៃថ្ងៃទី ៣ មិថុនា សមត្ថកិច្ច បានផាកយានជំនិះល្មើសច្បាប់ជាង ៧០០ គ្រឿង ខណៈគ្រោះថ្នាក់ចរាចរណ៍ទូទាំងប្រទេស បានបណ្ដាលឲ្យស្លាប់មនុស្ស ៥ នាក់ និងរបួសធ្ងន់ស្រាលចំនួន ១៣ នាក់។
តាមរបាយការណ៍ស្តីពីការរឹតបន្ដឹងច្បាប់ចរាចរណ៍ផ្លូវគោក នៅថ្ងៃទី ០៣ ខែមិថុនា ឆ្នាំ ២០២១ បានឲ្យដឹងថា ចំនួនយានយន្តដែលត្រូវបានឃាត់ផាកពិន័យនេះ គឺនៅចំណុចគោលដៅសរុប ១៨៩ គោលដៅទូទាំងប្រទេស។
របាយការណ៍ដដែលបានបន្តថា «ក្នុងនោះមានយានយន្តចូលគោលដៅចំនួន ៥ ១៣១ គ្រឿង ម៉ូតូ ២ ៧៤៣ គ្រឿង ហើយរកឃើញយានយន្តល្មើសសរុបចំនួន ៤២២ គ្រឿង មានម៉ូតូចំនួន ២៨៨ គ្រឿង ត្រូវបានផាកពិន័យតាមអនុក្រឹត្យលេខ ៣៩. អនក្រ.បក នៅទូទាំងប្រទេស»។
ដោយឡែកក្នុងរយៈពេល ០៣ ថ្ងៃគឺចាប់ពីថ្ងៃទី ០១ ដល់ ថ្ងៃទី ០៣ ខែមិថុនា ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោកមានយានយន្តចូលគោលដៅមានចំនួន ១៦៩,៧១២ គ្រឿងក្នុងនោះរកឃើញយានយន្តល្មើសសរុបចំនួន ១ ១៦៣ គ្រឿង មានម៉ូតូចំនួន ៧៨៧ គ្រឿង ត្រូវបានផាកពិន័យតាមអនុក្រឹត្យលេខ ៣៩ អនក្រ.បក នៅទូទាំងប្រទេស ។
នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានវាយតម្លៃក្នុងរយៈពេល ០៣ ថ្ងៃនៃខែមិថុនានេះឃើញថា ការអនុវត្តតាមអនុក្រឹត្យថ្មីក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ ទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់បានចូលរួមគោរពច្បាប់ចរាចរណ៍យ៉ាងល្អប្រសើរ។
ជាមួយនឹងការផាកពិន័យនេះ យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសនៅថ្ងៃទី ០៣ ខែមិថុនានេះ គឺបណ្តាលឲ្យមនុស្សស្លាប់ចំនួន ០៥ នាក់ របួសធ្ងន់ ០៧ នាក់ (ស្រី ០៣ នាក់) របួសស្រាល ០៦ នាក់ (ស្រី ០៣ នាក់) ។
យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសចេញដោយនាយកដ្ឋាននគរបាលចរាចរណ៍ និងសណ្តាប់សាធារណៈនៃអគ្គស្នងការដ្ឋាននគរបាលជាតិបានបញ្ជាក់ថា៖ «នៅថ្ងៃទី ០៣ ខែមិថុនា បានបញ្ជាក់ថា គ្រោះថ្នាក់ដែលបង្កឲ្យមានមនុស្សស្លាប់ និងរបួសសរុបចំនួន ១៨ នាក់ គឺកើតឡើងដោយសារការប៉ះទង្គិចគ្នា ចំនួន ០៩ លើក»៕