ពោធិ៍សាត់៖ ក្រសួងសុខាភិបាលទទូចឱ្យប្រជាពលរដ្ឋបញ្ឈប់ការពិសាស្រា ដែលគ្មានប្រភពច្បាស់លាស់ ខណៈនៅក្នុងត្រីមាសទី១ នៃឆ្នាំ ២០២១ នេះ កើតមានករណីពុលស្រា ដែលបណ្តាលឱ្យមនុស្សស្លាប់ចំនួន ៣១ នាក់។
សេចក្តីជូនព័ត៌មានរបស់ក្រសួងសុខាភិបាលចេញផ្សាយនៅថ្ងៃទី ៣ ខែមិថុនា បានធ្វើឡើងបន្ទាប់ពីមានហេតុការណ៍ពុលស្រាជាថ្មីទៀត នៅក្នុងខេត្តពោធិ៍សាត់ ដែលបណ្តាលឱ្យមនុស្សយ៉ាងតិចចំនួន ៧ នាក់បានស្លាប់។
ក្រសួងសុខាភិបាលបានបញ្ជាក់ក្នុងលិខិតរបស់ខ្លួនចុះថ្ងៃទី ៣ មិថុនាថា រហូតមកដល់ថ្ងៃទី ៣ ខែមិថុនា ក្រុមស្រាវជ្រាវបានរកឃើញអ្នកប៉ះពាល់សរុប ៩៦ នាក់ ក្នុងហេតុការណ៍ពុលស្រានៅខេត្តពោធិ៍សាត់ បានបញ្ចូនទៅមន្ទីរពេទ្យបង្អែកស្រុក-ខេត្ត និងមន្ទីរពេទ្យរាជធានីភ្នំពេញ ដោយផ្អែកលើស្ថានភាពសុខភាពរបស់គាត់មួយចំនួនបានជាសះស្បើយ និងមួយចំនួនទៀត បាននិងកំពុងសម្រាកនៅមន្ទីរពេទ្យនៅឡើយ។
គិតត្រឹមត្រីមាសទី១ នៃឆ្នាំ ២០២១ ករណីស្លាប់ដោយសារតែការពិសាស្រា មានសារធាតុមេតាណុលខ្ពស់នោះ នៅតែបន្តកើតមានឡើងជាដដែលៗ ដោយសរុបចំនួន ៣ ករណី ដែលបានកើតឡើងនៅខេត្តកំពត ពោធិ៍សាត់ និងខេត្តកណ្តាលនោះ គឺមានអ្នកស្លាប់ ៣១ នាក់ និងរងគ្រោះរាប់រយនាក់។ នេះបើតាមក្រសួងសុខាភិបាល។
ក្រសួងបានបញ្ជាក់ថា៖ «ករណី (ពុលស្រា) ទាំងអស់ ចាប់ផ្ដើមឡើងដោយមានរោគសញ្ញាដូចជា ស្រវាំងភ្នែក ព្រឹលភ្នែក ណែនដើមទ្រូង ចុកទ្រូង ថប់ដង្ហើម ត្រជាក់ដៃជើង វិលមុខ ក្អួត ឈឺក្បាល ធីងធោង អស់កម្លាំង ទន់ដៃទន់ជើង និងសន្លប់»។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានក្រើនរំឭក និងអំពាវនាវដោយទទូចដល់ប្រជាពលរដ្ឋ និងអ្នកពាក់ព័ន្ធនៅទូទាំងប្រទេសឱ្យអនុវត្តវិធានការមួយចំនួន ដើម្បីការពារការពុលស្រា ដែលបិតមិនត្រឹមត្រូវតាមបច្ចេកទេស និងរក្សាជីវិតរបស់ខ្លួន។
លោកបានបញ្ជាក់ថា៖ «ចូលរួមកុំពិសាស្រាដែលបិត ឬលាយគ្មានបច្ចេកទេសត្រឹមត្រូវ និងគ្មានការត្រួតពិនិត្យជាពិសេសគឺ ពិសាស្រាស ឬស្រាថ្នាំ ដែលយកមេតាណុលមកលាយនេះតែម្ដង។ ចំពោះអ្នកប្រកបអាជីវកម្មហាមដាច់ខាត កុំយកសារធាតុមេតាណុលមកលាយធ្វើស្រាស ដែលបង្កឱ្យពុល និងស្លាប់បាត់បង់ជីវិត»។
លោក ម៉ម ប៊ុនហេង ក៏បានណែនាំឱ្យអាជ្ញាធរមូលដ្ឋានចាត់តាំងកម្លាំងគ្រប់គ្រង ឃ្លាំមើល និងទប់ស្កាត់ការលក់ស្រា ឬលាយស្រាគ្មានបច្ចេកទេសត្រឹមត្រូវ និងណែនាំប្រជាពលរដ្ឋ ចៀសវាងយកសារធាតុ មេណុលលាយធ្វើស្រាដែលបង្កឱ្យពុល និងស្លាប់បាត់បង់ជីវិត។
បន្ថែមពីនេះ លោកជំរុញឱ្យប្រជាពលរដ្ឋ ប្រសិនបើមានបញ្ហាសុខភាព ឬមានរោគសញ្ញានៃការពុលស្រាដូចជាឈឺក្បាល ក្អួត ឈឺពោះ វិលមុខ ស្រវាំងភ្នែក សន្លប់ ប្រកាច់ ពិបាកដកដង្ហើម ឬសង្ស័យថា មានការឆ្លងជំងឺដទៃទៀត សូមប្រញាប់ទៅស្វែងរកការពិនិត្យ ពិគ្រោះព្យាបាលនៅមន្ទីរពេទ្យរដ្ឋដែលនៅជិតផ្ទះរបស់លោកអ្នក។
សូមជម្រាបថា ស្រាស និងស្រាថ្នាំ ដែលបណ្តាលឱ្យប្រជាពលរដ្ឋពុលស្លាប់ និងរងគ្រោះជាច្រើនករណីនេះ គឺត្រូវបានរកឃើញថា មានសារធាតុមេតាណុល លើសកម្រិតខ្ពស់ចម្លោះពី ៧ ភាគរយ ដល់ ១៥ ភាគរយ ខណៈកម្រិតមេតាណុលមិនពុលក្នុងស្រានោះ គឺមិនត្រូវលើសពី ០,១% ឡើយ។ នេះបើតាមលទ្ធផលពីមជ្ឈមណ្ឌលជាតិមន្ទីរពិសោធន៍សុខាភិបាល៕