ភ្នំពេញ៖ កម្ពុជាបានប្រកាសដាក់ឱ្យអនុវត្តគម្រោងដកស្រង់មេរៀនបទពិសោធពីប្រទេសចិន ដើម្បីលើកកម្ពស់សមត្ថភាពឆ្លើយតបនឹងជំងឺកូវីដ ១៩ នៅតំបន់អាស៊ី និងប៉ាស៊ីហ្វិក ដោយកម្មវិធីនេះ ជាជំនួយរបស់រដ្ឋាភិបាលចិន តាមរយៈកម្មវិធីអភិវឌ្ឍន៍អង្គការសហប្រជាជាតិ (UNDP) ជូនរាជរដ្ឋាភិបាល។
ពិធីប្រកាសដាក់ឱ្យអនុវត្តគម្រោងដកស្រង់មេរៀនបទពិសោធពីប្រទេសចិននេះ បានធ្វើឡើងនៅថ្ងៃទី ៤ ខែ មិថុនា តាមរយៈវីដេអូដែលមានការចូលរួមពី លោក ម៉ម ប៊ុនហេង រដ្ឋមន្ត្រីក្រសួងសុខាភិបាល លោក តាំង មិនធៀន ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំកម្ពុជា និងលោក Nick Beresford ប្រធានកម្មវិធី UNDP។
សេចក្ដីប្រកាសព័ត៌មានរបស់ក្រសួងសុខាភិបាលចុះថ្ងៃទី ៤ មិថុនា បានឱ្យដឹងថា៖ «ប្រកាសដាក់ឱ្យអនុវត្តគម្រោងដកស្រង់មេរៀនបទពិសោធពីប្រទេសចិន ដើម្បីលើកកម្ពស់សមត្ថភាពឆ្លើយតបនឹងជំងឺកូវីដ ១៩ នៅតំបន់អាស៊ី និងប៉ាស៊ីហ្វិក ស្តីពីការគ្រប់គ្រងសំណល់វេជ្ជសាស្ត្រ និងប្រគល់-ទទួលឧបករណ៍បរិក្ខារវេជ្ជសាស្ត្រ»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានគូសបញ្ជាក់ថា ក្នុងភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិន មានជំនួយឥតសំណងជាច្រើន ត្រូវបានផ្តល់ជូនក្រសួងសុខាភិបាល ដើម្បីចូលរួមចំណែកពង្រឹង និងពង្រីកវិស័យសុខាភិបាលកម្ពុជា។
លោកបានបន្តថា តាមរយៈកម្មវិធីអភិវឌ្ឍន៍អង្គការសហប្រជាជាតិប្រចាំប្រទេសកម្ពុជា រដ្ឋាភិបាលនៃសាធារណរដ្ឋប្រជាមានិតចិន គឺបានផ្ដល់នូវឧបករណ៍បរិក្ខារវេជ្ជសាស្ត្រសម្រាប់ការគ្រប់គ្រងសំណល់វេជ្ជសាស្ត្រចំនួន ១២ មុខ ដើម្បីពង្រឹងសមត្ថភាពការគ្រប់គ្រងសំណល់វេជ្ជសាស្ត្រនៅកម្ពុជា។
លោកបញ្ជាក់ថា៖ «ពិធីប្រកាសដាក់ឱ្យអនុវត្តគម្រោង និងការប្រគល់នូវឧបករណ៍បរិក្ខារវេជ្ជសាស្ត្រនាពេលនេះ ជាការរួមចំណែកយ៉ាងសំខាន់ក្នុងការជំរុញការទប់ស្កាត់ការរីករាលដាលនៃជំងឺកូវីដ ១៩ បានឆាប់រហ័ស»។
លោក ម៉ម ប៊ុនហេង ក៏សង្ឃឹមថា នឹងមានគម្រោងថ្មីៗជាបន្តទៀត ដើម្បីជាការចូលរួមចំណែកដល់កិច្ចការងាររបស់ថ្នាក់ដឹកនាំ មន្ត្រីរាជការ បុគ្គលិកសុខាភិបាលទាំងអស់ ដើម្បីប្រយុទ្ធប្រឆាំងនឹងជំងឺកូវីដ ១៩ ក្នុងពេលនេះ៕