ភ្នំពេញៈ ក្រសួងអប់រំ យុវជន និងកីឡា អនុញ្ញាតឱ្យគ្រឹះស្ថានសិក្សាចំណេះដឹងទូទៅ ឯកជន ដែលជាសមាជិកសមាគមគ្រឹះស្ថានឧត្តមសិក្សាកម្ពុជា រៀបចំការប្រឡងបញ្ចប់បឋមសិក្សាថ្នាក់ទី ៦ និងមធ្យមសិក្សាបឋមភូមិថ្នាក់ទី ៩ សម្រាប់ឆ្នាំសិក្សា ២០២០-២០២១ ទៅតាមប្រតិទិនប្រឡងរៀងៗខ្លួន។
ការប្រកាសឲ្យមានការរៀបចំការប្រឡងតាមប្រតិទិនប្រឡងរៀងៗខ្លួននេះ ស្របពេលដែលសាលារៀន នៅទូទាំងប្រទេសមិនទាន់ត្រូវបានអនុញ្ញាតឲ្យចូលរៀនវិញនោះទេ ហើយការរៀនទាំងអស់ គឺត្រូវធ្វើឡើងតាមរយៈអនឡាញ។
យោងតាមសេចក្ដីជូនដំណឹងចុះហត្ថលេខាដោយលោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡានៅថ្ងៃទី ៣ មិថុនាបានឱ្យដឹងថា ក្រសួងអប់រំបានយល់ព្រមតាមសំណើរបស់សមាគមគ្រឹះស្ថានឧត្តមសិក្សាកម្ពុជា ដោយអនុញ្ញាតឱ្យគ្រឹះស្ថានសិក្សាចំណេះទូទៅឯកជន ដែលជាសមាជិករបស់សមាគមអាចរៀបចំការប្រឡងបញ្ចប់បាន។
ក្រសួងបានបញ្ជាក់ថា ចំពោះការប្រឡងបញ្ចប់គឺធ្វើឡើងចំពោះសាលាបឋមសិក្សាថ្នាក់ទី ៦ និងសញ្ញាបត្រមធ្យមសិក្សាបឋមភូមិ (ថ្នាក់ទី ៩) ឆ្នាំសិក្សា ២០២០-២០២១ ដោយគ្រឹះស្ថានសិក្សាសាមីជាអ្នកទទួលខុសត្រូវ ទៅតាមប្រតិទិនប្រឡងរៀងៗខ្លួន។
ជាមួយគ្នានេះ ក្រសួងអប់រំក៏បានប្រកាសផ្តល់ការទទួលស្គាល់ ចំពោះលទ្ធផលនៃការប្រឡងនេះ និងធ្វើអធិការកិច្ច ប្រសិនបើមានករណីចាំបាច់ផងដែរ៕
វីដេអូ៖