.jpg)
ឆៀកយានយន្តចល័តនៅខេត្តស្វាយរៀង កាលពីខែឧសភា។ រូបថត MPWT
ភ្នំពេញៈ ក្រសួងសាធារណការ និងដឹកជញ្ជូន បានណែនាំដល់មន្ត្រីនៃមន្ទីរសាធារណការ និងដឹកជញ្ជូនរាជធានី-ខេត្តទូទាំងប្រទេស ត្រូវធ្វើការបែងបែកការងារឲ្យបានច្បាស់លាស់ ទាក់ទងនឹងការផ្តល់សេវាសាធារណៈលើមុខងារក្នុងវិស័យដឹកជញ្ជូនផ្លូវគោក។
ការណែនាំនេះ បានធ្វើឡើងក្នុងកិច្ចប្រជុំស្តីពីការផ្តល់សេវាសាធារណៈ លើមុខងារក្នុងវិស័យដឹកជញ្ជូនផ្លូវគោកនៅអគ្គនាយកដ្ឋានដឹកជញ្ជូនផ្លូវគោក និងតាមរយៈប្រព័ន្ធវីដេអូ កាលពីរសៀលថ្ងៃទី ៣ ខែមិថុនា។
កិច្ចប្រជុំនេះ មានការចូលរួមពីសំណាក់អគ្គនាយករង ប្រធានាយកដ្ឋាន អនុប្រធាននាយកដ្ឋាន តំណាងមន្ទីរសាធារណការ និងដឹកជញ្ជូនរាជធានី-ខេត្ត និងមន្ត្រីពាក់ព័ន្ធជាច្រើនរូប។
លោក ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោកបានប្រាប់ ភ្នំពេញ ប៉ុស្តិ៍ នៅថ្ងៃទី ៤ មិថុនាថា កិច្ចប្រជុំ គឺមានគោលបំណងណែនាំទៅដល់មន្ត្រីនៃមន្ទីរសាធារណការ និងដឹកជញ្ចូនទូទាំងប្រទេស ឲ្យធ្វើការបែងចែកការងារពាក់ព័ន្ធនឹងការផ្តល់សេវាសាធារណៈលើមុខងារក្នុងវិស័យដឹកជញ្ជូនផ្លូវគោកឲ្យបានប្រសើរ។
លោកបញ្ជាក់ថា៖ «យើងត្រូវណែនាំឲ្យពួកគាត់បែងចែកការងារពាក់ព័ន្ធនឹងប្រតិភូកម្មអំណាចមួយចំនួនទៅថ្នាក់ក្រោមជាតិ ព្រោះការងារមួយចំនួន មន្ទីរនៅតែត្រូវអនុវត្តក្រោមរដ្ឋបាលកណ្តាលរបស់ក្រសួង»។
នៅពេលនេះ គ្រប់មន្ទីរលោក គឺជាសេនាធិការទៅឲ្យរដ្ឋបាលថ្នាក់ក្រោមជាតិផង និងរដ្ឋបាលកណ្តាលរបស់ក្រសួងផង។ ដូច្នេះទើបមានកិច្ចប្រជុំណែនាំ ដើម្បីបែងចែកភារកិច្ចការងារខ្លះ។
បើតាមលោក ឈួន វ៉ន់ ការបែងចែកការងារទាក់ទងនឹងការផ្តល់សេវាសាធារណៈ លើមុខងារក្នុងវិស័យដឹកជញ្ជូនផ្លូវគោកនេះ គឺមានដូចជា ការចុះបញ្ជីឡាន ការធ្វើឆៀក ការងារចុះបញ្ជីធ្វើអាជីវកម្ម ការចេញលិខិតបញ្ជាក់បណ្ណបើកបរ និងការប្រឡងយកបណ្ណបើកបរជាដើម៕
