.jpg)
ពលរដ្ឋកំពុងសម្រាកព្យាបាលក្នុងមន្ទីរពេទ្យ ក្រោយពីផឹកស្រាសមានសារធាតុមេតាណុលខ្ពស់។ រូបថត រដ្ឋបាលខេត្តពោធិសាត់
ពោធិសាត់ៈ តុលាការខេត្តពោធិ៍សាត់ បានចោទប្រកាន់ និងឃុំខ្លួនជាបណ្តោះអាសន្ន ចំពោះជនសង្ស័យ ២ នាក់ប្តីប្រពន្ធ ដែលបានផលិតនិងលក់ស្រាដែលមានសារជាតិពុលខ្ពស់ បានបណ្តាលឲ្យមនុស្សប្រុសស្រីស្លាប់ចំនួន ១០ នាក់ និងរងគ្រោះជិត ១០០ នាក់ ក្រោយពីបានផឹកស្រានៅកន្លែងកើតហេតុ នៅក្នុងភូមិចំនួន ៤ ស្ថិតក្នុងឃុំអន្សាចំបក់ ស្រុកក្រគរ។
ជនសង្ស័យទាំងពីរនាក់ប្តីប្រពន្ធ គឺមានឈ្មោះ ស៊ុយ គឹមទៀង ភេទប្រុស អាយុ ៧១ ឆ្នាំ ត្រូវជាប្តី និងឈ្មោះ ទ្រី វណ្ណា អាយុ ៦១ ឆ្នាំ មានទីលំនៅភូមិសានសរ ឃុំអន្សាចំបក់ ស្រុកក្រគរ ខេត្តពោធិ៍សាត់ ហើយត្រូវបានសមត្ថកិច្ចឃាត់ខ្លួន កាលពីថ្ងៃទី ២ មិថុនា។
នៅចន្លោះថ្ងៃទី ២៨ ខែឧសភា និងថ្ងៃទី ២ ខែ មិថុនា ឆ្នាំ ២០២១ មានពលរដ្ឋដែលមានអាយុចន្លោះពី ៣០ ទៅ ៦០ ឆ្នាំ ត្រូវបានរាយការណ៍ថា មានអាការៈពុលស្រាស បន្ទាប់ពីពួកគេ បានផឹកស្រាសដែលមានប្រភពផលិតតែមួយ និងត្រូវបានចែកចាយលក់បន្តទូទាំងឃុំដោយបុគ្គលទាំង ២ នាក់ ដែលជាជនសង្ស័យត្រូវបានចោទប្រកាន់។
លោក ហេង ដូនីន អ្នកនាំពាក្យសាលាដំបូងខេត្តពោធិ៍សាត់ បានប្រាប់ ភ្នំពេញ ប៉ុស្តិ៍ នៅថ្ងៃទី ៦ មិថុនាថា ក្រោយពីទទួលសំណុំរឿងនៃការចោទប្រកាន់ពីព្រះរាជអាជ្ញា ចៅក្រមស៊ើបសួរបានសម្រេចឃុំខ្លួនជនសង្ស័យ ២ នាក់ប្តីប្រពន្ធនោះ ដាក់ពន្ធនាគារជាបណ្តោះនៅពន្ធនាគារខេត្ត។
លោក ដូនីន បញ្ជាក់ថា៖ «ពេលនេះ ពួកគាត់ កំពុងស្ថិតនៅក្នុងពន្ធនាគាខេត្ត។ សំណុំរឿងនេះ គឺកំពុងស្ថិតក្នុងការស៊ើបអង្កេតបន្តរបស់ចៅក្រមស៊ើបសួរ ដែលយើងមិនទាន់អាចបង្ហាញថា មានអ្នកណាខ្លះទៀតពាក់ព័ន្ធក្រៅពីហ្នឹងបានទេ»។
លោកបន្តថា ពួកគេទាំង ២ នាក់ ត្រូវបានចោទប្រកាន់ពីបទ «ហិង្សាដោយចេតនាដោយប្រើប្រាស់អាហារមានជាតិពុលបណ្តាលឱ្យជនរងគ្រោះស្លាប់ ដោយមានស្ថានទម្ងន់ទោស» តាមមាត្រា ២២៦ និងមាត្រា ២២៤ នៃក្រមព្រហ្មទណ្ឌ ខណៈចៅក្រមស៊ើបសួរ បន្តការស៊ើបអង្កេត ក្នុងសំណុំរឿងនេះ ដើម្បីស្វែងរកអ្នកពាក់ព័ន្ធបន្ថែមទៀត។
លោក ម៉ូ លីដា ស្នងការរងទទួលផែនព្រហ្មទណ្ឌនៃស្នងការនគរបាលខេត្តពោធិ៍សាត់ បានប្រាប់ ភ្នំពេញ ប៉ុស្តិ៍ នៅថ្ងៃទី ៦ មិថុនាថា តាមរយៈការចុះស្រាវជ្រាវចុងក្រោយរបស់សមត្ថកិច្ច គឺតួលេខសរុប មានមនុស្សរងគ្រោះបណ្តាលឲ្យស្លាប់ចំនួន ១០ នាក់ ក្នុងនោះមានស្រី ៨ នាក់ និងមានអ្នកបន្តសម្រាកព្យាបាលនៅមន្ទីរពេទ្យប្រមាណ ១០ នាក់ ដោយសារតែអាការៈធ្ងន់ធ្ងរ។
លោកបន្តថា៖ «និយាយទៅចំនួនអ្នកស្លាប់នេះ គឺមានចំនួនពិតប្រាកដ ដែលខ្ញុំចុះស្រាវជ្រាវកន្លងមកជាមួយព្រះរាជអាជ្ញា មានចំនួន ១០ នាក់ គឺស្រី ៨ នាក់ និងប្រុស ២ នាក់។ ក្រោយមក អ្នកដែលបានផឹកស្រានេះពុល គឺឯកឧត្តអភិបាលខេត្ត បានអំពាវនាវ និងបានតម្រូវឲ្យពួកគាត់ មកសម្រាកព្យាបាលនៅពេទ្យទាំងអស់។ អ្នកហូបតិចតួច ហើយព្យាបាលជាហើយ ឲ្យត្រឡប់ទៅផ្ទះវិញអស់ទៅ»។
តាមលទ្ធផលពីមជ្ឈមណ្ឌលជាតិមន្ទីរពិសោធន៍សុខាភិបាល បានឲ្យដឹងនៅថ្ងៃទី ៣ មិថុនាថា ស្រាដែលបណ្តាលឱ្យប្រជាពលរដ្ឋពុលស្លាប់ និងរងគ្រោះ គឺត្រូវបានរកឃើញថា មានសារធាតុមេតាណុលលើសកម្រិតខ្ពស់ដល់ទៅ ១៥ ភាគរយ ខណៈកម្រិតមេតាណុលមិនពុលក្នុងស្រានោះ គឺមិនត្រូវលើសពី ០,១% ឡើយ។
ក្រសួងសុខាភិបាលក៏បានអះអាងដែរថា ករណីពុលស្រា គឺចាប់ផ្ដើមឡើងដោយមានរោគសញ្ញាដូចជា ស្រវាំងភ្នែក ព្រឹលភ្នែក ណែនដើមទ្រូង ចុកទ្រូង ថប់ដង្ហើម ត្រជាក់ដៃជើង វិលមុខ ក្អួត ឈឺក្បាល ធីងធោង អស់កម្លាំង ទន់ដៃទន់ជើង និងសន្លប់ ក្រោយអ្នកបរិភោគស្រា បានផឹកស្រាដែលមានសារធាតុមេតាណុលនេះចូលទៅតាមកម្រិតតិចឬច្រើន។
កាលពីខែឧសភា មានករណីពុលស្រាចំនួន ២ ករណីផ្ទួនៗ បានកើតឡើងនៅខេត្តកំពត និងខេត្តកណ្តាលបានបណ្តាលមនុស្សស្លាប់ ២៤ នាក់ និងជាច្រើននាក់ទៀតបានរងគ្រោះ។ នេះបើតាមការអះអាងរបស់ក្រសួងសុខាភិបាល។ ចំពោះស្រា ដែលបានបណ្តាលឲ្យពុលក្នុងខេត្តទាំង ២នេះ ត្រូវបានរកឃើញថា មានសារធាតុមេតាណុល ដែលជាសារធាតុពុល ខ្ពស់ចន្លោះពី ៧ ទៅ ១២ ភាគរយប៉ុណ្ណោះ៕
