ភ្នំពេញៈ សមត្ថកិច្ចគ្រោងបញ្ជូនជនសង្សយម្នាក់ក្នុងចំណោម២នាក់ទៅសាលាដំបូងរាជធានីភ្នំពេញនៅថ្ងៃទី ៧ មិថុនានេះ បន្ទាប់ពីចាប់ខ្លួនបាន៣ថ្ងៃពាក់ព័ន្ធករណីប្រើកាំបិតប៉័ងតោកាប់យុវជនម្នាក់ស្លាប់កាលពីយប់ថ្ងៃទី ១ មិថុនា នៅសង្កាត់ចាក់អង្រែលើខណ្ឌមានជ័យ ខណៈបក្ខពួកគេម្នាក់ទៀត សមត្ថកិច្ចកំពុងបន្តស្វែងរកចាប់ខ្លួន។
លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានប្រាប់ ភ្នំពេញ ប៉ុស្តិ៍ នៅថ្ងៃទី ៦ មិថុនាថា ជនសង្ស័យឈ្មោះ សុខ ហៃ អាយុ ១៨ ឆ្នាំ ត្រូវបានសមត្ថកិច្ចឃាត់ខ្លួនពីថ្ងៃទី ៤ មិថុនា ពាក់ព័ន្ធករណីកាប់យុវជនម្នាក់ស្លាប់កាលពីថ្ងៃទី ១ មិថុនា ឆ្នាំ ២០២១។ ចំណែកជនរងគ្រោះឈ្មោះ គិន សុខឃឿង អាយុ១៩ឆ្នាំ រស់នៅគីឡូម៉ែត្រលេខ ៩ ខណ្ឌឫស្សីកែវ រាជធានីភ្នំពេញ។
លោកបានបញ្ជាក់ថា៖ «សមត្ថកិច្ចកំពុងសាកសួរនិងរៀបចំសំណុំរឿងបញ្ជូនទៅតុលាការ ដើម្បីអនុវត្តបន្តតាមច្បាប់នៅពេលសមត្ថកិច្ចជំនាញបញ្ចប់នីតិវិធីរួចរាល់»។
លោក គឹម កល្យាណ អធិការរងនគរបាលទទួលផែកការងារនគរបាលព្រហ្មទណ្ឌនៃអធិការដ្ឋាននគរបាលខណ្ឌមានជ័យប្រាប់ ភ្នំពេញ ប៉ុស្តិ៍ នៅថ្ងៃទី ៦ មិថុនាថា សំណុំរឿងជនសង្ស័យឈ្មោះ សុខ ហៃ ម្នាក់នេះកំពុងដំណើរការនីតិវិធីនៅស្នងការដ្ឋាននគរបាលរាជធានីភ្នំពេញនៅឡើយ ហើយគ្រោងបញ្ជូនទៅសាលាដំបូងរាជធានីភ្នំពេញនៅថ្ងៃទី ៧ មិថុនា។
លោកថា៖ «រឿងនេះយ៉ាងយូរត្រឹមថ្ងៃស្អែក (ថ្ងៃទី ៧ មិថុនា) សមត្ថកិច្ចបញ្ជូនជនសង្ស័យទៅតុលាការហើយប៉ុន្តែថ្ងៃទី ៦ មិថុនា ធ្វើអត់ទាន់ទេ»។
លោក ជា រតនា នាយនគរបាលប៉ុស្តិ៍រដ្ឋបាលសង្កាត់ចាក់អង្រែលើប្រាប់នៅថ្ងៃទី ៦ មិថុនាថា ការឃាត់ខ្លួនជនសង្ស័យម្នាក់នេះធ្វើឡើងបន្ទាប់ពីមានការដឹកនាំស្រាវជ្រាវពីលោក ម៉េង វិមានតារា អធិការនគរបាលខណ្ឌច្បារអំពៅ រួមសហការជាមួយនគរបាលសង្កាត់ចាក់អង្រែ។ ការស្រាវជ្រាវនេះ គឺសមត្ថកិច្ចប្រមូលព័ត៌មានបានពីកាមេរ៉ាសុវត្ថិភាពដែលបំពាក់នៅតាមផ្ទះពលរដ្ឋនៅជិតទីតាំងកើតហេតុ និងការប្រមូលព័ត៌មានពីសាក្សីនៅជុំវិញកន្លែងកើតហេតុ។
លោកបន្តថា ក្រោយពីកំណត់បានអត្តសញ្ញាណជនល្មើសទាំង២នាក់ហើយ លោកអធិការ ម៉េង វិមានតារា បានកំណត់គោលដៅចុះឃាត់ខ្លួនជនសង្ស័យបានម្នាក់ ឈ្មោះ សុខ ហៃ នៅចំណុចភូមិបឹងព្រលិត ក្នុងភូមិសាស្ត្រសង្កាត់ព្រែកប្រា ខណ្ឌមានជ័យ នៅវេលាយប់ថ្ងៃទី ៤ មិថុនា។ រីឯជនសង្ស័យម្នាក់ទៀតជាបក្ខពួកសមត្ថកិច្ចកំពុងតាមចាប់ខ្លួនបន្តទៀតលោកបានឱ្យដឹងថា ចំពោះមូលហេតុនៃការកាប់សម្លាប់ជនរងគ្រោះនេះ បើតាមសម្តីជនសង្ស័យឈ្មោះ សុខ ហៃ ប្រាប់សមត្ថកិច្ចថាមិត្តភក្តិរបស់គេមាននារីម្នាក់ជាសង្សារ។
ប៉ុន្តែមួយរយៈកន្លងមកពួកគេចេះតែឈ្លោះគ្នាហើយនារីជាសង្សារម្នាក់នោះចេះតែសុំបែកគ្នាជាមួយមិត្តភក្តិរបស់គេ។ ចៃដន្យនៅយប់ថ្ងៃទី ១ មិថុនា ដែលជាថ្ងៃកើតហេតុ មិត្តភក្ដិរបស់គេបានឃើញជនរងគ្រោះជិះម៉ូតូឌុបនារីជាសង្សារខ្លួនទើបមានអារម្មណ៍ខឹងហើយក៏ដេញតាមកាប់តែម្តងទៅ។
លោកបញ្ជាក់ថា នៅយប់ថ្ងៃកើតហេតុ ពេលពួកគេដេញតាមជនរងគ្រោះ ប្រហែលជាគាត់ភ័យក៏ជិះម៉ូតូទៅបុកបង្គោលភ្លើងដួលជាមួយនារីម្នាក់នោះ។ភ្លាមៗនោះដោយឃើញជនរងគ្រោះដួលម៉ូតូ ពួកគេបានយកកាំបិតប៉័ងតោដែលដាក់តាមខ្លួនចំនួន ១ កាប់បន្ថែមទៅលើខ្លួនរបស់ជនរងគ្រោះរហូតស្លាប់។ បន្ទាប់ពីកាប់ជនរងគ្រោះរួចពួកគេបានដឹកនារីជាសង្សារយកទៅព្យាបាលរបួសនៅឯគ្លីនិកឯកជន ១ កន្លែងហើយនាំគ្នាបំបែកគ្នាគេចខ្លួនតែម្តង៕