.jpg)
អ្នកកាសែតប្រុស-ស្រី ៨ នាក់ ត្រូវបានសមត្ថកិច្ចឃាត់ខ្លួនកាលពីម្សិលមិញ ពាក់ព័ន្ធករណីគំរាមយកលុយពីម្ចាស់ដេប៉ូលក់ឈើ ១ កន្លែង ស្ថិតក្នុងភូមិក្រាំងដូង ឃុំព្រះឃ្លាំង ស្រុកត្បែងមានជ័យ។ រូបថត ប៉ូលិស
ព្រះវិហារៈ អយ្យការអមសាលាដំបូងខេត្តព្រះវិហារបានចោទប្រកាន់អ្នកកាសែតប្រុសស្រី ៨ នាក់ (ស្រី ២ នាក់) នៅរសៀលម្សិលមិញ បន្ទាប់ពីចាប់ខ្លួនពាក់ព័ន្ធនឹងការគំរាមយកលុយពីម្ចាស់ដេប៉ូលក់ឈើ ១ កន្លែង ស្ថិតក្នុងភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ ខណៈអ្នកនាំពាក្យក្រសួងព័ត៌មានអះអាងថា ករណីបែបនេះ បើខុសវាអស់តម្លៃរបស់បុគ្គលនោះ។
លោក វុធ សាវី ជាព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តព្រះវិហារឱ្យ ភ្នំពេញ ប៉ុស្តិ៍ ដឹងកាលពីម្សិលមិញថា ករណីអ្នកកាសែតចំនួន ៨ នាក់ក្នុងនោះ ២ នាក់ ជាស្ត្រីត្រូវបានតំណាងអយ្យការអមសាលាដំបូងខេត្តព្រះវិហារ ចោទប្រកាន់ពីបទកំហែងយកដែលការសម្រេចចោទនេះ ធ្វើឡើងនៅប៉ុន្មានម៉ោង ក្រោយពីនគរបាលខេត្តបញ្ជូនពួកគេដល់សាលាដំបូងខេត្តព្រះវិហារនៅព្រឹកថ្ងៃទី ៦ មិថុនា។
លោកមានប្រសាសន៍ថា៖ «រឿងហ្នឹងត្រូវបានតំណាងអយ្យការចោទបទកំហែងយកតាមបញ្ញត្តិមាត្រា ៣៦៤ នៃក្រមព្រហ្មទណ្ឌ ហើយនឹងបញ្ជូនបន្តទៅចៅក្រមស៊ើបសួរ ដើម្បីបន្តនីតិវិធីទៀត»។
យោងមាត្រា ៣៦៤ នៃក្រមព្រហ្មទណ្ឌនេះ ប្រសិនបើតុលាការរកឃើញថាពិតជាមានបទល្មើសដូចការចោទមែននោះ អ្នកកាសែតទាំងនោះនឹងត្រូវប្រឈមជាប់ពន្ធនាគារពី ២ ឆ្នាំទៅ ៥ ឆ្នាំ និងពិន័យជាប្រាក់ពី ៤ លានរៀលទៅ ១០ លានរៀលក្នុងម្នាក់។
លោក រិទ្ធ សូណា អធិការនគរបាលស្រុកត្បែងមានជ័យឱ្យដឹងពីម្សិលមិញដែរថា ឈ្មោះ ហ៊ឹម ឆេងហ៊ាន ជាមេការដេប៉ូឈើ ១ កន្លែង បានប្តឹងមកសមត្ថកិច្ចរបស់លោកថា មានអ្នកកាសែត ១ ក្រុម មានគ្នា ៨ នាក់បានជំរិតទារប្រាក់ពីគាត់ក្នុងម្នាក់ៗយក ១០០ ដុល្លារ។
ដោយសារតែមិនចង់ឱ្យមានការរំខានជនរងគ្រោះបានព្រមឱ្យក្នុងម្នាក់ ៥០ ដុល្លារ តែក្រុមអ្នកកាសែតទាំងនោះមិនព្រមយក ហើយជនរងគ្រោះបានប្តឹងមកសមត្ថកិច្ចរបស់លោកតែម្តង។
លោកបានឱ្យដឹងដែរថា ចំពោះវត្ថុតាងដែលសមត្ថកិច្ចបានដកហូតមានរថយន្តចំនួន ៤ គ្រឿង បណ្ណព័ត៌មានចំនួន ៨ សន្លឹក ទូរស័ព្ទដៃចំនួន ១៨ គ្រឿង និងសម្ភារឯកសារខ្សែក និងថវិកាមួយចំនួនធំទៀត។
លោកបានបញ្ជាក់ថា៖ «ខ្ញុំឃាត់ខ្លួនពួកគេតាមបណ្តឹងរបស់ជនរងគ្រោះហើយសមត្ថកិច្ចខ្ញុំអនុវត្តទៅតាមច្បាប់ប៉ុណ្ណោះ»។
ពាក់ព័ន្ធការឃាត់ខ្លួនអ្នកសារព័ត៌មាននេះ ត្រូវបានលោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មានវិទ្យា និងសោតទស្សន៍នៃក្រសួងព័ត៌មានបានថ្លែងកាលពីម្សិលមិញថា លោកកំពុងតាមដានរឿងនេះដែរ ខណៈក្នុងចំណោមអ្នកកាសែតទាំងនោះមានអ្នកខ្លះកាន់បណ្ណព័ត៌មានចេញដោយអង្គភាព និងខ្លះទៀតកាន់បណ្ណសារព័ត៌មានចេញដោយក្រសួងព័ត៌មាន។
លោកបានបន្តថា ករណីអ្នកសារព័ត៌មានដែលប្រព្រឹត្តផ្ទុយវិជ្ជាជីវៈបែបនេះ ក្រសួងបានសិក្សា ហើយត្រៀមបញ្ចូលចំណុចមួយចំនួនទៅក្នុងអត្ថបទច្បាប់វិសោធនកម្មច្បាប់ស្ដីពីរបបសារព័ត៌មាន។ មានកត្តាច្រើនដែលយើងគួរលើកមកសិក្សា គឺការអប់រំរបស់អ្នកសារព័ត៌មាន ទំនាក់ទំនងរវាងភាគីទាំងសងខាងកន្លងមក ជាដើម។
បើតាម លោក ផុស សុវណ្ណ ករណីនេះបណ្តាលមកពីកត្តា ២ ទី ១ គឺក្រសួងព័ត៌មានបានផ្ទេរសេវាទៅថ្នាក់ក្រោមជាតិ ដើម្បីឱ្យបន្តអាជ្ញាប័ណ្ណមួយចំនួននៅត្រឹមមន្ទីរព័ត៌មានរាជធានី ខេត្ត។ ចំណុចមួយទៀត គឺបណ្តាលមកពីបញ្ហាកូវីដ ១៩ គឺក្រសួងព័ត៌មានមិនអាចជួបជុំ មិនអាចហៅចាងហ្វាង ឬបុគ្គលអ្នកកាសែតមួយចំនួនមកណែនាំអប់រំ។ ហេតុដូច្នេះហើយទើបបុគ្គលអ្នកសារព័ត៌មានខ្លះចេះតែភ្លេចខ្លួនភ្លេចពីការណែនាំរបស់ក្រសួងព័ត៌មាន។
លោកបញ្ជាក់ថា៖ «ភាពថ្លោះធ្លោយច្រើនជាងគេបំផុតពីឆ្នាំ ២០២០ និងឆ្នាំ ២០២១ នេះ គឺយើងនៅឆ្ងាយពីគ្នាក្នុងការអញ្ជើញចាងហ្វាង ឬក៏បុគ្គលនោះមកណែនាំប្រាប់ជាប្រចាំ។ ពីដើមយើងចេះតែក្រើនរំឭក ដូចចន្លុះអ៊ីចឹងចេះតែឆ្កឹះរាល់ថ្ងៃទៅវានៅឆេះល្អដល់យើងខានណែនាំទៅបុគ្គលមួយចំនួនភ្លេចខ្លួន» សម្រាប់អ្នកខុសច្បាប់វិធានការច្បាប់នឹងត្រូវយកមកអនុវត្ត។ ដោយឡែកក្រមសីលធម៌បើខុសវាអស់តម្លៃរបស់បុគ្គលនោះ យើងកំពុងពិនិត្យក្រមសីលធម៌ដាក់បញ្ហានេះចូលសិក្ខាសាលាមួយឆាប់ៗនេះ»៕
