.jpg)
សកម្មភាពលាភថ្នាំនៅទីតាំងវិទ្យាល័យ ហ៊ុន សែន ក្នុងស្រុកសាលាក្រៅ ខេត្តប៉ៃលិន កាលពីម្សិលមិញ ។ រូបថត រដ្ឋបាលខេត្ត
ប៉ៃលិនៈរដ្ឋបាលខេត្ដប៉ៃលិនកាលពីម្សិលមិញបានសម្អាតអនាម័យនិងលាបថ្នាំអគារដើម្បីរៀបចំត្រៀមមណ្ឌលសម្រាប់ធ្វើចត្តាឡីស័កថ្មីបន្ថែមទៀតនៅវិទ្យាល័យ ហ៊ុន សែន សាលាក្រៅស្ថិតក្នុងភូមិអូរអណ្តូង ឃុំអូរអណ្តូង ស្រុកសាលាក្រៅ ដើម្បីត្រៀមដាក់ពលរដ្ឋដែលត្រឡប់មកពីប្រទេសថៃ និងពីខេត្ដនានា ដែលមានការសង្ស័យពាក់ព័ន្ធនឹងជំងឺកូវីដ ១៩។ នេះបើតាមរដ្ឋបាលខេត្ដប៉ៃលិន។
ការរៀបចំត្រៀមមណ្ឌលសម្រាប់ធ្វើចត្តាឡីស័កថ្មីបន្ថែមនេះដឹកនាំដោយលោកស្រី បាន ស្រីមុំ អភិបាលខេត្តប៉ៃលិននិងលោក សៅ សារ៉ាត់ អ្នកតំណាងរាស្ត្រមណ្ឌលប៉ៃលិនជាមួយមន្ដ្រីពាក់ព័ន្ធក្នុងខេត្តនៅទីតាំងវិទ្យាល័យ ហ៊ុន សែន សាលាក្រៅ ស្ថិតក្នុងភូមិអូរអណ្តូង ឃុំអូរអណ្តូង ស្រុកសាលាក្រៅ។
លោកស្រី បាន ស្រីមុំ បានថ្លែងថា ដោយអនុវត្តតាមការណែនាំ និងវិធានការយ៉ាងម៉ឺងម៉ាត់ក្នុងការទប់ស្កាត់ការឆ្លងរីករាលដាលជំងឺកូវីដ ១៩ របស់ប្រមុខរាជរដ្ឋាភិបាលកម្ពុជា និងក្រសួងសុខាភិបាល រដ្ឋបាលខេត្តប៉ៃលិនបានរៀបចំមណ្ឌលចត្តាឡីស័កជាច្រើនកន្លែងសម្រាប់ពលរដ្ឋដែលប៉ះពាល់ផ្ទាល់ជាមួយអ្នកជំងឺកូវីដ ១៩ និងបងប្អូនដែលទើបវិលត្រឡប់មកពីប្រទេសថៃ និងតំបន់ប្រឈមនានាតាមបណ្តារាជធានី/ខេត្ត។
លោកស្រីបានបញ្ជាក់ថា៖ «ក្នុងករណីសង្ស័យបន្ទាប់ពីក្រុមគ្រូពេទ្យជំនាញពិនិត្យសុខភាពជាពិសេសបងប្អូនពលករដែលបានវិលត្រឡប់មកពីក្រៅប្រទេស គឺយើងបានរៀបចំក្រុមការងារដែលមានការចូលរួមពីបណ្តាមន្ទីរ អង្គភាពស្ថាប័នជុំវិញខេត្ត និងក្រុមយុវជនស្ម័គ្រចិត្ដនៅក្នុងខេត្តធ្វើការចម្អិនម្ហូបអាហារសម្រាប់បងប្អូនកំពុងធ្វើចត្តាឡីស័កចំនួន៣ពេលជាប្រចាំថ្ងៃ»។
លោកស្រីអភិបាលខេត្តបានបន្ថែមថា នៅថ្ងៃនេះថ្នាក់ដឹកនាំ មន្ត្រីរាជការ អង្គភាពស្ថាប័នជំនាញជុំវិញខេត្តបានរួមគ្នាសម្អាតអនាម័យបរិស្ថាននិងលាបថ្នាំអគារនៅមណ្ឌលចត្តាឡីស័កត្រៀមថ្មីនេះ គឺក្នុងគោលបំណងទី១ចង់បង្ហាញជាគំរូដ៏ល្អសម្រាប់ប្រជាពលរដ្ឋក្នុងការចូលរួមទប់ស្កាត់ការចម្លជំងឺកូវីដ ១៩ និងទី២ ដើម្បីបង្កើនសាមគ្គីភាព ឯកភាពប្រកបដោយភាពស្និទ្ធស្នាល និងការទទួលខុសត្រូវខ្ពស់ក្នុងនាមជាមន្ត្រីរាជការបម្រើជាតិ និងប្រជាជន។
ជាមួយគ្នានេះលោកស្រីបានថ្លែងអំណរគុណចំពោះកងកម្លាំងសមត្ថកិច្ច និងក្រុមគ្រូពេទ្យជំនាញព្រមទាំងមន្ត្រីរាជការដែលកំពុងបំពេញបេសកកម្មដ៏ថ្លៃថ្លាសម្រាប់ប្រជាជន និងប្រទេសជាតិនៅតាមគោលដៅ និងតាមមណ្ឌលចត្តាឡីស័កនានាក្នុងខេត្តប្រកបដោយការទទួលខុសត្រូវខ្ពស់ដើម្បីរួមគ្នាប្រយុទ្ធប្រឆាំងនឹងការរីករាលដាលជំងឺកូវីដ ១៩៕
វីដេអូ៖
