ព្រះវិហារៈ រាជបណ្ឌិត្យសភាកម្ពុជា កំពុងចងក្រងសៀវភៅ «វត្តមានសត្វស្លាបក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប» ដែលរកឃើញមានសត្វស្លាបជាង ១២០ ប្រភេទ និងសត្វស្លាបមួយចំនួន ជាប្រភេទសត្វស្លាបកម្រ មិនទាន់មានឈ្មោះក្នុងបញ្ជីសត្វស្លាបនៅឡើយ។
លោកស្រី សីហា មន្ត្រីគ្រប់គ្រងរដ្ឋបាលនៃរាជបណ្ឌិត្យសភាកម្ពុជាប្រាប់ ភ្នំពេញ ប៉ុស្តិ៍ នាថ្ងៃនេះថា ក្រុមការងារឧទ្យានបានសហការជាមួយក្រុមការងារថតរូបសត្វស្លាប ចុះថតរូប និងប្រមូលទិន្នន័យ ចងក្រងឯកសារស្តីពីវត្តមានសត្វស្លាបក្នុងឧទ្យាន ដើម្បីផ្សព្វផ្សាយ និងលើកកម្ពស់ការចូលរួមអភិរក្សសត្វព្រៃនិងជម្រករបស់វា។
លោកថា បេសកកម្មជំហានដំបូងក្រុមការងារប្រមូលបានសត្វស្លាបមានចំនួនជាង ១២០ ប្រភេទ ដែលពេលនេះក្រុមការងារថតរូបកំពុងស្រង់ទិន្នន័យសត្វ និងកំណត់ចំណាត់ថា្នក់ទៅតាមប្រភេទរបស់វា។
លោកថ្លែងថា៖ «យើងកំពុងតែចងក្រងទិន្នន័យគោល មានន័យថា ប្រភពសត្វស្លាប ប្រភេទសត្វ ភូមិសាស្ត្ររបស់សត្វ និងជីវសាស្ត្ររបស់វា ដើម្បីចងក្រងជាឯកសារមួយសម្រាប់ធ្វើការបោះពុម្ពជាការស្វែងយល់ ហើយនិងការផ្សព្វផ្សាយ ជំរុញឲ្យមានការអភិរក្សនៅតំបន់នោះ»។
លោក សីហា បញ្ជាក់ថា សៀភៅសត្វស្លាបថ្មីនេះ មានប្រមាណជិត ៣០០ ទំព័រ ដែលមានជាលក្ខណៈរូបភាព អត្ថបទ និងឈ្មោះរបស់សត្វ ទម្រង់ជីវសាស្ត្ររបស់សត្វ ការបំផ្លាស់ទី និងលក្ខខណ្ឌផ្សេងទៀតទាក់ទងនឹងសត្វស្លាប៕