.jpg)
សកម្មភាពកម្មករ ក្នងការដ្ឋានសាងសង់ផ្លូវ ក្រោយពីរ៉ូឡូកិនកម្មករម្នាក់។ រូបថត នគរបាល
កំពង់ស្ពឺៈ បុរសជាកម្មករធ្វើផ្លូវល្បឿនលឿនម្នាក់ត្រូវរ៉ូឡូកិននៅលើដងផ្លូវពេលដែលកំពុងធ្វើការងារ កាលពីថ្ងៃទី ៧ មិថុនា ដែលកើតហេតុនៅភូមិទួលព្រិច ឃុំត្រពាំងគង ស្រុកសំរោងទង ខេត្តកំពង់ស្ពឺ និងបានស្លាប់ពេលបញ្ជូនដល់មន្ទីរពេទ្យ។
លោក ជុន ចាន់ដេត អធិការងទទួលផែនការងារព្រហ្មទណ្ឌ នៃអធិការដ្ឋាននគរបាលស្រុកសំរោងទង ប្រាប់ភ្នំពេញប៉ុស្តិ៍នៅរសៀលថ្ងៃទី៧មិថុនាថា ជនរងគ្រោះឈ្មោះ មួង សាមឿន ភេទប្រុស អាយុ ៥៧ ឆ្នាំ រស់នៅភូមិជីម្រាក់ ឃុំកំពែង ស្រុកគីរីវង់ ខេត្តតាកែវ ជាកម្មករធ្វើផ្លូវល្បឿនលឿនភ្នំពេញ-ខេត្តព្រះសីហនុ។
លោកបន្តថា៖ «ហេតុការណ៍គ្រោះថ្នាក់ចរាចរណ៍នេះ ជនរងគ្រោះគាត់ស្លាប់នៅមន្ទីរពេទ្យ។ ខាងនគរបាលស្រុកសំរោងទងខ្ញុំកំពុងធ្វើការងារនេះបន្តទៀតទាក់ទងផ្លូវច្បាប់»។
លោករៀបរាប់ដោយយោងសម្តីសាក្សីដែលជាកម្មករនៅកន្លែងកើតហេតុថានៅវេលាម៉ោង ជាង១០ព្រឹកថ្ងៃទី៧មិថុនា ក្រុមកម្មករបានកំពុងធ្វើផ្លូវនៅលើកំណាត់ផ្លូវល្បឿនលឿនដែលស្ថិតក្នុងភូមិទួលព្រិច ឃុំត្រពាំងគង ស្រុកសំរោងទង ខេត្តកំពង់ស្ពឺ។
ខណៈនោះជនរងគ្រោះបានបំពេញការងារដូចសព្វដងហើយជនរងគ្រោះបានអង្គុយនៅលើថ្នល់ដែលកំពុងស្ថាបនាដែលគេឃើញរ៉ូឡូនៅចម្ងាយពីក្រោយជនរងគ្រោះប្រហែល៣ទៅ ៤ ម៉ែត្រប៉ុណ្ណោះ ដែលគេបានឃើញបុរសម្នាក់កំពុងបញ្ជាគ្រឿងចក្រនោះ (រ៉ូឡូ)។ ប៉ុន្តែមិនដឹងជាយ៉ាងម៉េចស្រាប់តែរ៉ូឡូ ១ គ្រឿងនោះទៅកិនជនរងគ្រោះពីក្រោយបណ្តាលឱ្យបែកឈាមរបួសធ្ងន់។
លោកបន្ថែមថា ភ្លាមៗនោះកម្មករធ្វើផ្លូវក៏ផ្អើលឆោឡោទៅជួយជនរងគ្រោះរីឯបុរសអ្នកបើករ៉ូឡូនោះបានរត់គេចខ្លួនបាត់ភ្លាមៗនៅពេលនោះដែរ។ចំណែកជនរងគ្រោះត្រូវបានក្រុមកម្មករ និងខាងអ្នកម៉ៅការនៃក្រុមហ៊ុនធ្វើផ្លូវបានចាត់ចែងដឹកទៅសង្គ្រោះបន្ទាន់នៅមន្ទីរពេទ្យបង្អែកខេត្តកំពង់ស្ពឺតែដោយសាររបួសធ្ងន់ពេកជនរងគ្រោះបានដាច់ខ្យល់ស្លាប់ពេលដល់មន្ទីរពេទ្យ។
លោកថ្លែងថា៖ «តាមព័ត៌មានបឋមពីមូលហេតុគ្រោះថ្នាក់នេះឃើញថា រ៉ូឡូនោះគឺដាច់ហ្វ្រាំងរអិលទៅបុកកិនជនរងគ្រោះ»។
លោកបន្តទៀតថា ពាក់ព័ន្ធនឹងគ្រោះថ្នាក់ដល់ជីវិតនេះ គឺសមត្ថកិច្ចរបស់លោកកំពុងទាក់ទងទៅខាងមេការធ្វើផ្លូវជាជនជាតិចិនតាមរយៈអ្នកបកប្រែភាសាហើយ។ ប៉ុន្តែលោកមិនទាន់បានទទួលព័ត៌មានពីខាងមេការធ្វើផ្លូវនៅឡើយទេ ព្រោះអ្នកបកប្រែភាសាថា កំពុងទាក់ទងជាមួយមេការធ្វើផ្លូវ ដើម្បីសម្របសម្រួលណាមួយពាក់ព័ន្ធបញ្ហាគ្រោះថ្នាក់នេះ។
ចំណែកលោក យ័ន សន នាយនគរបាលប៉ុស្តិ៍រដ្ឋបាល ឃុំត្រពាំងគង បានឱ្យដឹងនៅរសៀលថ្ងៃទី ៧ មិថុនាដែរថា ករណីនេះលោកមិនបានចុះទៅដល់ទីតាំងកើតហេតុទេដោយលោកជាប់យាមប្រចាំការនៅមណ្ឌលចត្តាឡីស័ក ប៉ុន្តែលោកបានចាត់កម្លាំងឱ្យមន្ត្រីរបស់លោកចុះទៅទីនោះ។ បើតាមសេចក្តីរាយការណ៍បឋមពីមន្ត្រីរបស់លោកប្រាប់ថាមូលហេតុគឺរ៉ូឡូនោះដាច់ហ្វ្រាំង។
លោកថា៖ «សភាពគ្រោះថ្នាក់នេះខ្ញុំមិនដឹងច្បាស់ដែរតែតាមរយៈសាកសួរកម្មករនៅកន្លែងកើតហេតុគេប្រាប់ថារ៉ូឡូដាច់ហ្វ្រាំង។ចំពោះពាក់ព័ន្ធផ្លូវច្បាប់យ៉ាងនោះខ្ញុំមិនដឹងទេ»៕
