ភ្នំពេញៈ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានឲ្យដឹងថា អង្គការ APOPO ប្រចាំតំបន់បានស្នើសុំជាវសុនខមួយចំនួនបន្ថែមទៀតពីស៊ីម៉ាក់ ដើម្បីយកទៅបម្រើប្រតិបតិ្តការដោះមីននៅក្នុងប្រទេសមួយចំនួន។
ការស្នើឡើងនេះបានធ្វើឡើងនៅថ្ងៃទី ៧ មិថុនា ក្នុងជំនួបពិភាក្សាការងាររវាងលោក Michael Heiman ប្រធានអង្គការ APOPO ប្រចាំតំបន់ និងនៅកម្ពុជា ជាមួយស៊ីម៉ាក់លើកិច្ចសហប្រតិបតិ្តការរបស់ស្ថាប័នទាំង ២ ក្នុងការអនុវត្តបច្ចេកទេស បោសសម្អាតមីនដោយសត្វកណ្តុរ និងការស្រាវជ្រាវបច្ចេកទេសដោយសុនខ។
លោក ហេង រតនា បានសរសេរលើទំព័រហ្វេសប៊ុករបស់លោកថា៖ «សុនខដែលបានបញ្ជូនពីអង្គភាពស៊ីម៉ាក់ទៅបម្រើការនៅប្រទេសស៊ូដង់ខាងត្បូង ប្រទេសអង់ហ្គោឡា និងប្រទេសតួកគីនោះ គឺបានបំពេញប្រតិបតិ្តការយ៉ាងល្អប្រសើរ ហើយខាងអង្គការ APOPO បានស្នើសុំជាវសុនខមួយចំនួនបន្ថែមទៀតពីស៊ីម៉ាក់ ដើម្បីយកទៅប្រតិបតិ្តការនៅប្រទេសមួយចំនួនផ្សេងទៀត»។
បន្ថែមពីនេះអង្គការ APOPO ក៏បានបញ្ជាក់ពីលទ្ធភាពក្នុងការទទួលជំនួយពីប្រទេសបែលហ្ស៊ិក ដើម្បីគាំទ្រកិច្ចប្រតិបតិ្តការរបស់អង្គភាពស៊ីម៉ាក់ក្នុងរយ:ពេល ៥ ឆ្នាំចាប់ពីឆ្នាំ ២០២២ ដល់ ឆ្នាំ ២០២៦ ដោយផ្តោតគោលដៅសំខាន់លើគម្រោងបន្តអនុវត្តកម្ចាត់គ្រាប់មិនទាន់ផ្ទុះនៅខេត្តព្រះវិហារជាពិសេសតំបន់ប្រាសាទព្រះវិហារ។
បច្ចុប្បន្ននេះ អង្គភាពស៊ីម៉ាក់ និង APOPO បានសហការប្រើប្រាស់កណ្តុរចំនួន ៥៧ ក្បាល សម្រាប់បម្រើឲ្យប្រតិ្តបត្តិការបោសសម្អាតមីន ដែលក្នុងនោះកំពុងប្រតិបតិ្តការចំនួន ៣៤ ក្បាល ដាក់ចូលនិវត្តន៍ ៥ ក្បាល និងកំពុងហ្វឹកហ្វឺនចំនួន ១៨ ក្បាល។
លោក ហេង រតនា បញ្ជាក់ថា ទាំងកណ្តុរ និងសុនខ គឺសុទ្ធតែបានចូលរួមក្នុងការពន្លឿននៃការរុករកគ្រាប់យុទ្ធភណ្ឌមិនទាន់ផ្ទុះនៅក្រោមដី មិនថាក្នុងក្របខ័ណ្ឌប្រទេសកម្ពុជា ឬពិភពលោកនោះទេស្របពេលដែលឧបករណ៍អេឡិចត្រូនិកទំនើបមិនអាចរុករកឃើញនូវគ្រាប់យុទ្ធភណ្ឌមិនទាន់ផ្ទុះមួយចំនួន ដែលស្ថិតនៅក្រោមដី។
គម្រោងអង្គការ APOPO នៅកម្ពុជាបានចាប់ផ្តើមតាំងពីឆ្នាំ ២០១៦ ហើយបច្ចុប្បន្នគម្រោងនេះបានបោសសម្អាតផ្ទៃដីមានមីនបានច្រើនទៅៗជារៀងរាល់ឆ្នាំធំជាងគម្រោងនៅប្រទេសមួយចំនួន។ នេះបើតាមអង្គការ APOPO៕