ព្រះវិហារៈ មន្ត្រី​រាជបណ្ឌិត្យសភា​កម្ពុជា​កំពុង​ចងក្រង​សៀវភៅ​ «​វត្តមាន​សត្វ​ស្លាប​ក្នុង​ឧទ្យាន​រាជបណ្ឌិត្យសភា​កម្ពុជា​តេជោសែន​ឫស្សី​ត្រឹប​» បន្ទាប់ពី​បាន​រកឃើញ​មាន​សត្វ​ស្លាប​ជាង​ ១២០ ​ប្រភេទ​ ដែល​ក្នុងនោះ​មាន​សត្វ​ស្លាប​មួយចំនួន​ជា​ប្រភេទ​កម្រ និង​មិនទាន់​មាន​ឈ្មោះ​ក្នុង​បញ្ជី​សត្វ​ស្លាប​កម្ពុជា និង​ពិភពលោក​នៅឡើយ​។

លោក ស្រី សីហា មន្ត្រី​គ្រប់គ្រង​រដ្ឋបាល​នៃ​រាជបណ្ឌិត្យ​សភា​កម្ពុជា​ឱ្យដឹង​កាលពី​ម្សិលមិញ​ថា ក្រុមការងារ​ឧទ្យាន​បាន​សហការ​ជាមួយ​ក្រុម​ការងារ​ថត​រូប​សត្វ​ស្លាប​ចុះ​ថតរូប និង​ប្រមូល​ទិន្នន័យ​សម្រាប់​ចងក្រង​ឯកសារ​ស្តីពី​វត្តមាន​សត្វ​ស្លាប​ក្នុង​ឧទ្យាន​ ដើម្បី​ផ្សព្វផ្សាយ និង​លើកកម្ពស់​ការចូលរួម​អភិរក្ស​សត្វព្រៃ និង​ជម្រក​របស់​វា​។

លោក​ថា បេសកកម្ម​ជំហាន​ដំបូង ក្រុម​ការងារ​ប្រមូល​បាន​សត្វ​ស្លាបមាន​ចំនួន​ជាង​ ១២០ ​ប្រភេទ​ ដែល​ពេលនេះ​ក្រុមការងារ​ថតរូប និង​អ្នកជំនាញ​សត្វ​ស្លាប​កំពុង​ស្រង់​ទិន្នន័យ​សត្វ និង​កំណត់​ចំណាត់​ថា្នក់​ទៅតាម​ប្រភេទ​របស់​វា​។

លោក​ថ្លែងថា​៖ «​យើង​កំពុងតែ​ចងក្រង​ទិន្នន័យ​គោល​មានន័យថា ស្រង់​ប្រភព​សត្វ​ស្លាប​ប្រភេទ​សត្វ ភូមិសាស្ត្រ​​របស់​សត្វ និង​ជីវសាស្ត្រ​របស់​វា ដើម្បី​ចងក្រង​ជា​ឯកសារ​មួយ​សម្រាប់​បោះពុម្ព​​ជា​ការស្វែងយល់ និង​ការផ្សព្វផ្សាយ​ជំរុញ​ឱ្យ​មាន​ការអភិរក្ស​នៅ​តំបន់​នោះ​»​។

បើ​តាម​លោក សីហា ការចុះទៅ​ថតរូប​សត្វ​ស្លាប​ក្នុង​តំបន់​ឧទ្យាន​រាជបណ្ឌិត្យ​សភា​កម្ពុជា​តេជោសែន​ឫស្សីត្រឹប​ចាប់ផ្តើម​តាំងពី​ពាក់កណ្តាល​ឆ្នាំ​ ២០២០ រហូត​មកដល់​បច្ចុប្បន្ន​។

ក្នុង​​ចំណោម​សត្វ​ស្លាប​ដែល​ថត​បាន មាន​សត្វ​ស្លាប​ប្រមាណ​ ១០ ​ទៅ​ ២០ ​ប្រភេទ​ដែល​មិនទាន់​ស្គាល់ឈ្មោះ និង​មិនមាន​ឈ្មោះ​ក្នុង​បញ្ជី​សត្វ​ស្លាប​កម្ពុជា និង​ពិភពលោក​។ ចំពោះ​ការផ្សព្វផ្សាយ ក្រុមការងារ​នឹង​ពិភាក្សា​គ្នា​បន្តទៀត ដោយ​ក្នុងនោះ​អាច​នឹង​មាន​ការផ្សព្វផ្សាយ​តាមរយៈ​ទូរទស្សន៍​ ឬ​សារព័ត៌មាន​ផ្សេងៗ​។

លោក​ថ្លែងថា​៖ «​ជំហាន​ដំបូង​បំផុត ខ្ញុំ​គិតថា​អាច​នឹង​ផ្សព្វផ្សាយ​ទៅដល់​សហគមន៍​ដើម្បីឱ្យ​ពលរដ្ឋ​បាន​យល់​ពី​គុណតម្លៃ​នៃ​សត្វ​ស្លាប​ទាំងអស់​ហ្នឹង ដើម្បីឱ្យ​គាត់​ចូលរួម​ថែរក្សា និង​អភិរក្ស​»​។

លោក​ សីហា បាន​បញ្ជាក់ថា សៀវភៅ​សត្វ​ស្លាប​ថ្មី​នេះ មាន​កម្រាស់​ប្រមាណ​ជិត​ ៣០០ ​ទំព័រ ដែលមាន​ជា​លក្ខណៈ​រូបភាព អត្ថបទ និង​ឈ្មោះ​របស់​សត្វ ទម្រង់​ជីវសាស្ត្រ​របស់​សត្វ ការបំផ្លាស់ទី និង​លក្ខខណ្ឌ​ផ្សេងទៀត​ទាក់ទង​នឹង​សត្វ​ស្លាប​។

លោក ប៊ូ វរសក្ស នាយក​កម្មវិធី​នៃ​អង្គការ BirdLife International ប្រចាំ​កម្ពុជា ថ្លែងថា ដើម្បីឱ្យ​ការអភិរក្ស និង​រៀបចំ​ផែនការ​គ្រប់គ្រង​មាន​ប្រសិទ្ធភាព​ទាមទារ​ការចូលរួម​ពី​អ្នកជំនាញ​ឱ្យ​បាន​ច្រើន ព្រោះ​ផ្នែក​សត្វស្លាប និង​រុក្ខជាតិ​មាន​អ្នកជំនាញ​ផ្សេងៗ​គ្នា​។

ការចងក្រង​ស្រាវជ្រាវ​អំពី​វត្តមាន​នៃ​សត្វ​ស្លាប​នៅ​ទីតាំង​នោះ​គឺ​ត្រូវការ​អ្នកជំនាញ​ដែល​អាច​ដឹង​ពី​ស្ថានភាព​របស់​ប្រភេទ​សត្វ​នីមួយៗ ដែល​ជិត​ផុត​ពូជ ងាយ​រងគ្រោះ ឬ​ប្រភេទ​កំពុង​រងគ្រោះ​ជាដើម​។

លោក​ថ្លែងថា​៖ «​ការធ្វើ​របស់​រាជបណ្ឌិត្យ​សភា​កម្ពុជា​ក្នុង​ការចងក្រង​ឯកសារ​សត្វ​ស្លាប​ជា​រឿង​ត្រឹមត្រូវ និង​គួរតែ​ធ្វើ ប៉ុន្តែ​ធ្វើ​យ៉ាងម៉េច​ត្រូវ​មាន​ការចូលរួម​ឱ្យបាន​ច្រើន​ពី​អ្នកជំនាញ​។ បើ​និយាយ​​ពី​រុក្ខជាតិ និង​សត្វ​ស្លាប វា​មាន​អ្នក​ជំនាញ​ផ្សេងៗ​គ្នា មិនមែន​ឱ្យតែ​អ្នកចេះ​ខាង​រុក្ខជាតិ ចេះ​សត្វ​ស្លាប​ដែរ​ទេ​។ អ៊ីចឹង បើ​ថា​គាត់​កំពុង​ចងក្រង​ពី​សត្វស្លាប​ហ្នឹង គួរតែ​មាន​អ្នកជំនាញ​សត្វស្លាប​ចូលរួម​ក្នុង​ការស្រាវជ្រាវ​ហ្នឹង​»​។

យ៉ាងណា​ក៏ដោយ ពាក់ព័ន្ធ​នឹង​បញ្ហា​នេះ លោក ស្រី សីហា បាន​អះអាងថា រាជបណ្ឌិត្យ​សភា​កម្ពុជា​មាន​អ្នកជំនាញ​គ្រប់គ្រាន់​ក្នុង​ការស្រាវជ្រាវ និង​បែងចែក​ប្រភេទ​សត្វ​ដែល​មាន​នៅក្នុង​ឧទ្យាន​រាជបណ្ឌិត្យ​សភា​កម្ពុជា​តេជោសែន​ឫស្សីត្រឹប​៕

វីដេអូ៖