ព្រះសីហនុៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនដឹកនាំគណៈប្រតិភូក្រសួងចុះត្រួតពិនិត្យវឌ្ឍនភាពនៃការសាងសង់ផ្លូវជាតិលេខ ១៤៦B និងផ្លូវជាតិលេខ ១៤៨ ខេត្តព្រះសីហនុ ដោយលោកណែនាំដល់ក្រុមហ៊ុនស្ថាបនាផ្លូវទាំងអស់ឱ្យយកចិត្តទុកដាក់ខ្ពស់ចំពោះគុណភាព។
តាមទំព័រហ្វេសប៊ុករបស់ក្រសួងសាធារណការ និងដឹកជញ្ជូននៅថ្ងៃទី ៧ មិថុនា បានឱ្យដឹងថា ការដឹកនាំមន្ត្រីក្រសួងចុះត្រួតពិនិត្យនេះបានធ្វើឡើង ដើម្បីតាមដានការងារបច្ចេកទេសសាងសង់របស់ក្រុមហ៊ុនសំដៅឱ្យការសាងសង់ប្រព្រឹត្តទៅស្របតាមបទដ្ឋានបច្ចេកទេស និងកិច្ចសន្យាសាងសង់ ដោយធានាឱ្យផ្លូវនេះមានគុណភាពរឹងមាំអាចប្រើប្រាស់ជាប់បានយូរអង្វែង។
ទំព័រហ្វេសប៊ុកដដែលបានបញ្ជាក់ថា៖ «ឯកឧត្តមទេសរដ្ឋមន្ត្រីបានចុះពិនិត្យម៉ាស៊ីនលាយបេតុងស៊ីម៉ងត៍ស្វ័យប្រវត្តិដែលអាចសាងសង់បានប្រវែង ៥០០ ម៉ែត្រ ក្នុង ១ ថ្ងៃ និងកម្រាស់ ២៦ សង់ទីម៉ែត្រ និងពិនិត្យម៉ាស៊ីនតេស្តគុណភាពទ្រនាប់ផ្លូវផ្នែកខាងក្រោម ( Bases Course)។ ឯកឧត្តមទេសរដ្ឋមន្ត្រីបានបន្តដំណើរចុះពិនិត្យការដ្ឋានផ្លូវល្បឿនលឿនភ្នំពេញ-ព្រះសីហនុត្រង់ចំណុចប្រសព្វផ្លូវ ១៤៦B»។
ក្នុងឱកាសនោះដែរលោក ស៊ុន ចាន់ថុល ក៏បានធ្វើការណែនាំទៅដល់ក្រុមហ៊ុនសាងសង់ និងត្រួតពិនិត្យលក្ខណៈបច្ចេកទេសឱ្យធ្វើការយកចិត្តទុកដាក់ខ្ពស់ទៅលើគុណភាពនៃការស្ថាបនាផ្លូវ ខណៈលោកក៏បានរំឭកដល់ប្រជាពលរដ្ឋ និងក្រុមហ៊ុនដឹកជញ្ជូនឱ្យគោរពច្បាប់ចរាចរណ៍ កុំបើកបរលើសល្បឿន ឬដឹកលើសទម្ងន់ ដែលជាកត្តាបង្កឱ្យមានការខូចខាតផ្លូវមុនអាយុកាល ការគ្រោះថ្នាក់ចរាចរណ៍នាំឱ្យបាត់បង់អាយុជីវិត និងបាត់បង់ថវិកាជាតិផងដែរ។
ផ្លូវជាតិលេខ ១៤៦B ចាប់ផ្តើមពីចំណុចប្រសព្វលើផ្លូវជាតិលេខ ៤ (ត្រង់គីឡូម៉ែត្រ ១៧៨ +១៦៥) រួចឆ្លងកាត់លើផ្លូវខេត្តលេខ ១៤៨ បញ្ចប់ក្នុងចំណុចប្រសព្វលើផ្លូវជាតិលេខ ៤ (ត្រង់គីឡូម៉ែត្រ ២២៥+៥៥០) គឺមានប្រវែងសរុប ៤៣,០២៥ គីឡូម៉ែត្រ ហើយបានចុះកិច្ចសន្យាសាងសង់កាលពីថ្ងៃទី ១០ ខែ មីនា ឆ្នាំ ២០២០ ដែលចាប់ផ្តើមសាងសង់ក្នុងអំឡុងខែមេសា ឆ្នាំ ២០២០ និងគ្រោងបញ្ចប់នៅក្នុងខែសីហា ឆ្នាំ ២០២២។
គម្រោងនេះសាងសង់ដោយក្រុមហ៊ុនសាជីវកម្មស្ពានថ្នល់ចិន (Brach of China Road and Bridge Cooperation in Cambodia) ក្រោមគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ស្ថិតនៅក្នុងខេត្តព្រះសីហនុក្នុងក្របខ័ណ្ឌប្រើប្រាស់កញ្ចប់ថវិកាសន្សំរបស់ជាតិ។ នេះបើតាមទំព័រហ្វេសប៊ុករបស់ក្រសួងសាធារណការ និងដឹកជញ្ជូន។
កាលពីចុងសប្តាហ៍មុនលោក ស៊ុន ចាន់ថុល បានសម្រេចបញ្ចប់កិច្ចសន្យាជាមួយក្រុមហ៊ុនដេញថ្លៃធ្វើផ្លូវជាតិលេខ ៣ ពីកំពត ទៅវាលរេញ (ប្រវែងប្រហែល ៥៤ គីឡូម៉ែត្រ) បន្ទាប់ពីលោកបានចុះត្រួតពិនិត្យគម្រោងនេះ ដោយរកឃើញថា ក្រុមហ៊ុនខ្វះបច្ចេកទេសក្នុងការស្តារផ្លូវឱ្យរឹងមាំ។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិបានលើកឡើងថា ការចុះពិនិត្យផ្លូវដែលកំពុងសាងសង់តាមរយៈផែនការជាក់លាក់ក្នុងការចុះដោយមិនចាំបាច់ប្រាប់ក្រុមម៉ៅការសាងសង់ផ្លូវទុកជាមុន (Spot-check) គឺជាជំហានធ្វើឱ្យប្រសើរឡើងនូវគុណភាពផ្លូវថ្នល់។
បន្ថែមពីនេះ លោកបញ្ជាក់ថា ការចុះត្រួតពិនិត្យនេះក៏ផ្អែកលើដំណាក់កាលសាងសង់យ៉ាងហ្មត់ចត់ ឧទាហរណ៍ពេលកំពុងរៀបចំស្រទាប់ដីសម្រាំង (Sub-Grade) ស្រទាប់គ្រឹះ (Base Course) ឬស្រទាប់គ្រឹះរង (Sub Base Course) ពេលក្រាលថ្មមិច និងក្រាលកៅស៊ូផងដែរ។
លោកបញ្ជាក់ថា៖ «ជាការពិត បើមានផ្លូវដែលបានសាងសង់ត្រឹមត្រូវតាមស្តង់ដាកំណត់ហើយ ប៉ុន្តែមិនមានការដាក់បញ្ចូល និងពង្រីកកញ្ចប់ថវិកាសម្រាប់កម្មវិធីអប់រំផ្សព្វផ្សាយ និងរឹតបន្តឹងការអនុវត្តច្បាប់ចរាចរណ៍ផ្លូវគោក ដើម្បីអនុវត្តឱ្យបានទូលំទូលាយមុនពេលចាប់ផ្តើមសាងសង់ អំឡុងពេលសាងសង់ និងក្រោយពេលសាងសង់យ៉ាងហោច ២ ឆ្នាំរាល់គ្រប់គម្រោងសាងសង់ ឬជួសជុលផ្លូវថ្នល់នោះទេ ការទប់ស្កាត់ចំនួនអ្នកស្លាប់ និងរបួសធ្ងន់ធ្ងរដោយគ្រោះថ្នាក់ចរាចរណ៍ហ្នឹងនៅតែមានច្រើន»៕
វីដេអូ៖