ភ្នំពេញៈ ម៉ាហ្កាវ៉ា (Magawa) កណ្តុរហិតមីនកម្ពុជាដំបូងបង្អស់ ដែលទទួលបានមេដាយមាសពីអង់គ្លេសត្រូវបានដាក់ឱ្យចូលនិវត្តន៍ ដោយសារវ័យកាន់តែចាស់ ក្រោយបំពេញការងារអស់រយៈពេល ៥ ឆ្នាំនៅកម្ពុជា ខណៈមជ្ឈមណ្ឌលកំចាត់មីនកម្ពុជាបានតៀមកណ្តុរចំនួន ២០ ក្បាលថ្មីទៀតឱ្យបន្តសកម្មភាពនេះ។
ម៉ាហ្កាវ៉ាដែលមានអាយុជាង ៧ ឆ្នាំត្រូវបានហ្វឹកហាត់ដោយក្រុមអ្នកជំនាញស្ម័គ្រចិត្តបែលហ្ស៊ិករបស់អង្គការ APOPO ដែលមានមូលដ្ឋាននៅប្រទេសតង់ហ្សានី។ វាត្រូវបានបញ្ជូនមកកម្ពុជាតាំងពីអាយុ ៩ ខែ ដើម្បីបន្តការហ្វឹកហ្វឺន និងបំពេញបេសកកម្មដ៏គ្រោះថ្នាក់ក្នុងការដោះមីននៅក្នុងប្រទេសកម្ពុជា។
ម៉ាហ្កាវ៉ា ត្រូវបានប្រសិទ្ធនាមថា ជាវីរបុរសកណ្តុរ (HeroRATs) ដោយបានចូលរួមចំណែករុករកគ្រាប់មីនលើដី ៧១ ហិកតា និងរំដោះបានគ្រាប់មិនទាន់ផ្ទុះរាប់ពាន់គ្រាប់នៅក្នុងប្រទេស ហើយកាលពីខែកញ្ញា ឆ្នាំ ២០២០ ម៉ាហ្កាវ៉ាក៏បានទទួលមេដាយមាសការងារពីអង្គការសប្បុរសធម៌សត្វព្រៃនៃប្រទេសអង់គ្លេស (PDSA)។
លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានប្រាប់ភ្នំពេញប៉ុស្តិ៍នៅថ្ងៃទី ៦ មិថុនាថា ក្រោយពេលដាក់ឱ្យចូលនិវត្តន៍ ម៉ាហ្កាវ៉ា នឹងត្រូវរក្សាទុកនៅក្នុងមណ្ឌលដោះមីន នាខេត្តសៀមរាបជាមួយនឹងកណ្តុរដទៃ ដែលអាចចូលរួមជួយហ្វឹកហ្វឺនអ្នកកាន់កណ្តុរដទៃទៀតព្រោះម៉ាហ្កាវ៉ាមានបទពិសោធច្រើន។
លោកបញ្ជាក់ថា៖ «ម៉ាហ្កាវ៉ា នឹងលែងក្លាយជាកណ្តុរប្រតិបត្តិការហើយ តែគាត់នឹងក្លាយទៅជាកណ្តុរហ្វឹកហ្វឺនវិញម្តង ព្រោះគាត់មានបទពិសោធច្រើន ដូច្នេះនឹងឱ្យមន្ត្រីយើងដែលជាអ្នកកាន់កណ្តុរថ្មី ងាយស្រួលហ្វឹកហ្វឺនជាងកណ្តុរទើបបង្ហាត់ថ្មី»។
ជាមួយនឹងការចូលនិវត្តន៍របស់ម៉ាហ្កាវ៉ា ស៊ីម៉ាក់ ក៏នឹងបង្កើតក្រុមដោះមីនថ្មី ដែលមានកណ្តុរចំនួន ២០ ក្បាលដែលទើបប្រឡងជាប់ ដើម្បីចូលរួមចុះប្រតិបត្តិការក្នុងការដោះមីនបន្ថែមពីកណ្តុរដែលមានស្រាប់ចំនួន ២០ ក្បាលផងដែរ។
លោក ហេង រតនា រៀបរាប់ថា៖ «កណ្តុរ បានចូលរួមក្នុងការពន្លឿនល្បឿននៃការបោសសម្អាតមីន បង្កើនប្រសិទ្ធភាពនៃកិច្ចប្រតិបត្តិការកាន់តែប្រសើរ ព្រោះកណ្តុរ គឺពួកគាត់ រុករកតែសារធាតុផ្ទុះទេ ដោយសារតែយុទ្ធភណ្ឌមិនទាន់ផ្ទុះ ឬគ្រាប់មីន គឺមានជាតិផ្ទុះ ដែលធ្វើឱ្យឧបករណ៍អេឡិចត្រូនិករុករកជាតិដែក គឺរកមិនឃើញ»។
បើតាមលោក ហេង រតនា បច្ចុប្បន្នកម្ពុជាមានកណ្តុរដោះមីនកំពុងបំពេញប្រតិបត្តិការ និងកំពុងហ្វឹកហ្វឺនចំនួន ៤០ ក្បាល ហើយកណ្តុរដែលបានស្លាប់ និងចូលនិវត្តន៍ជាបន្តបន្ទាប់មានចំនួន ១៦ ក្បាល ខណៈផ្ទៃដីដែលនៅសេសសល់ យុទ្ធភណ្ឌមិនទាន់ផ្ទុះមានជាង ៨០០ គីឡូម៉ែត្រក្រឡា។
ផ្ទៃដីនេះ បានថយចុះប្រមាណ ១០០ គីឡូម៉ែត្រក្រឡាជារៀងរាល់ឆ្នាំ តាមរយៈយុទ្ធនាការរបស់មជ្ឈមណ្ឌលកំចាត់មីនកម្ពុជា ដែលតាមផែនការជាតិរបស់កម្ពុជានឹងធ្វើឱ្យកម្ពុជា ក្លាយជាប្រទេសគ្មានគ្រាប់មីន នៅឆ្នាំ ២០២៥៕
វីដេអូ៖