កំពង់ស្ពឺៈ លោក វ៉ី សំណាង អភិបាលខេត្តកំពង់ស្ពឺ បានឲ្យដឹងថា សកម្មភាពនៃការរុះរើដោយស្ម័គ្រចិត្តនូវស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទ សម្រេចបានជិត ៩០ ភាគរយ ខណៈទុកពេលឲ្យក្រុមហ៊ុនស្រាបៀ ដែលមិនទាន់ធ្វើការរុះរើ ត្រឹមពាក់កណ្តាលខែនេះ។
លោក វ៉ី សំណាង បានប្រាប់ ភ្នំពេញ ប៉ុស្តិ៍ នៅថ្ងសទី ៨ មិថុនាថា ការរុះរើស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទនៅតាមផ្ទុះ របស់ប្រជាពលរដ្ឋគឺបានធ្វើឡើងយ៉ាងសកម្ម ដោយមានការចូលរួមពីប្រជាពលរដ្ឋគ្រប់ៗគ្នា។
ចំណែក ស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទ នៅតាមទីសាធារណៈវិញ ក្រុមហ៊ុនស្រាទាំងនោះ ក៏បានធ្វើជាបន្តបន្ទាប់ផងដែរ ដោយសារតែក្រុមការងារនៃក្រុមហ៊ុនទាំងនោះ មានកម្រិត ទើបរដ្ឋបាលខេត្ត ទុកពេលឲ្យធ្វើការរុះរើ ត្រឹមថ្ងៃទី ១៥ មិថុនា។
លោកបញ្ចាក់ថា៖ «ភាគច្រើនពលរដ្ឋគាត់រើ បានច្រើនហើយ ៨០ ទៅ ៩០ ភាគរយ នៅទូទាំងខេត្ត។ នៅសល់តែស្លាករបស់ក្រុមហ៊ុន ស្រាបៀ នៅកន្លែងសាធារណៈ ដែលមិនទាន់រុះរើបានច្រើន ដែលយើងទុកពេលឱ្យត្រឹមថ្ងៃទី ១៥ មិថុនា។ បើក្រុមហ៊ុនរុះរើមិនទាន់ត្រឹមថ្ងៃកំណត់ទេ យើងនឹងឲ្យក្រុមការងារចុះជួយរុះរើ ដោយថ្លៃរុះរើ និងថ្លៃខូចខាតក្រុមហ៊ុនជាអ្នករ៉ាប់រង»។
កាលពីថ្ងៃទី ២៤ ឧសភា រដ្ឋបាលខេត្តកំពង់ស្ពឺ បានចេញសេចក្តីជូនដំណឹងឱ្យម្ចាស់អាជីវកម្ម ដែលបានលើកតាំងស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទនៅតាមទីសាធារណៈត្រូវរុះរើចេញជាបន្ទាន់ ជាមួយនឹងការព្រមានថា បើពុំព្រមរុះរើចេញទេ អាជ្ញាធរខេត្តនឹងចាត់វិធានការរដ្ឋបាល ហើយរាល់ការចំណាយ និងការខូចខាតគឺជាបន្ទុករបស់ម្ចាស់អាជីវកម្ម៕