បាត់ដំបងៈ នគរបាលស្រុកថ្មគោលបានបញ្ជូនយុវជនម្នាក់ទៅស្នងការដ្ឋាននគរបាលខេត្តបាត់ដំបងនៅថ្ងៃទី ៧ មិថុនា ១ ថ្ងៃ បន្ទាប់ពីចាប់ខ្លួនពាក់ព័ន្ធនឹងការល្បួងក្មេងស្រីអាយុ ១៣ ឆ្នាំរួមភេទ នៅភូមិត្រស់ ឃុំអូរតាគី ស្រុកថ្មគោល ហើយស្នងការដ្ឋាននគរបាលខេត្តអាចបញ្ជូនជនសង្ស័យទៅតុលាការខេត្តនាថ្ងៃនេះ។
លោក ហេង ប៊ុនថា អធិការរងទទួលផែនការងារព្រហ្មទណ្ឌនៃអធិការដ្ឋាននគរបាលស្រុកថ្មគោលឱ្យដឹងនៅថ្ងៃទី ៧ មិថុនា ថា ជនសង្ស័យឈ្មោះ ធី សុខឿត ហៅ ផៃ ភេទប្រុស អាយុ ២០ ឆ្នាំរស់នៅភូមិត្រស់ ឃុំអូរតាគី ស្រុកថ្មគោល។ ចំណែកក្មេងស្រីរងគ្រោះឈ្មោះ ញ.ស. អាយុ ១៣ ឆ្នាំរស់នៅភូមិព្រៃទទឹង ឃុំអូរតាគី ស្រុកថ្មគោល។
លោកប្រាប់ថាសមត្ថកិច្ចជំនាញបានបញ្ចប់ការសួរចម្លើយលើជនសង្ស័យម្នាក់នេះ នៅថ្ងៃទី ៧ មិថុនា ហើយលោកបញ្ជូនជនសង្ស័យទៅស្នងការដ្ឋាននគរបាលខេត្តបាត់ដំបងបន្តទៀត ដើម្បីប្រគល់ឱ្យការិយាល័យជំនាញប្រឆាំងការជួញដូរមនុស្ស និងការពារអនីតិជនចាត់ការបន្តទៅសាលាដំបូងខេត្តបាត់ដំបង។
លោកបញ្ជាក់ថា៖ «ជនសង្ស័យឆ្លើយប្រាប់សមត្ថកិច្ចយើងថា គេបានរួមភេទជាមួយនាងបានតែម្តងទេ ប៉ុន្តែជាការព្រមព្រៀងគ្នាប៉ុណ្ណោះ ព្រោះថាពួកគេទាំង ២ នាក់ស្រឡាញ់គ្នា»។
បើតាមលោកអធិការរង ការចាប់ខ្លួនជនសង្ស័យម្នាក់នេះ ធ្វើឡើងកាលពីថ្ងៃទី ៦ មិថុនា ហើយការចាប់ខ្លួននេះដែរ ដោយសារម្តាយក្មេងស្រីរងគ្រោះទៅប្តឹងនៅប៉ុស្តិ៍នគរបាលអូរតាគី។ ក្រោយទទួលបានពាក្យបណ្តឹងភ្លាម នគរបាលប៉ុស្តិ៍អូរតាគីបានរាយការណ៍មកសមត្ថកិច្ចរបស់លោកចុះឃាត់ខ្លួនជនសង្ស័យតែម្តង។
លោក ប៊ន់ វណ្ណារ៉ា នាយការិយាល័យនគរបាលប្រឆាំងការជួញដូរមនុស្ស និងការពារអនីតិជនមិនធ្វើអត្ថាធិប្បាយលម្អិតទេ ដោយប្រាប់ថា សមត្ថកិច្ចកំពុងបន្តនីតិវិធីសួរចម្លើយ ហើយថាជនសង្ស័យអាចបញ្ជូនទៅតុលាការនាថ្ងៃនេះ។
លោក ឈុំ ឆុំ ជាសមាជិកភូមិ ដែលក្មេងស្រីរស់នៅបានប្រាប់នៅថ្ងៃទី ៧ មិថុនាដែរ ថា ក្មេងស្រីរងគ្រោះមានបងប្អូនចំនួន ៣ នាក់ (ស្រី ២ ប្រុស ១)។ នាងជាកូនច្បងមានអាយុ ១៣ ឆ្នាំរស់នៅជាមួយម្តាយជាស្ត្រីមេម៉ាយមានជីវភាពក្រលំបាក។ ក្មេងស្រីរងគ្រោះតែងតែទៅស៊ីឈ្នួលបោចស្មៅចម្ការឱ្យគេទាំងម្តាយទាំងកូន ប៉ុន្តែក្មេងរងគ្រោះច្រើនទៅដេកនៅចម្ការ រយៈពេល ១ ទៅ ២ សប្តាហ៍ទើបមកផ្ទះម្តង។
លោកបន្តថា៖ «ម្តាយក្មេងស្រីរងគ្រោះក្រណាស់ រកព្រឹកខ្វះល្ងាច។ តាំងពីប្តីគាត់ចុះចោលទៅ គាត់ដើរស៊ីឈ្នួលគេ រកលុយចិញ្ចឹមកូនៗ ហើយឥឡូវគេធ្វើបាបកូនគាត់ទៀត។ សព្វថ្ងៃសូម្បីតែផ្ទះក៏គាត់គ្មាននៅផង»។
លោកនិយាយតាមសម្តីម្តាយក្មេងរងគ្រោះថា កាលពីថ្ងៃទី ៥ មិថុនា កូនស្រីរបស់គាត់បានមកផ្ទះ បន្ទាប់ពីទៅស្នាក់នៅស៊ីឈ្នួលគេអស់ប៉ុន្មានសប្តាហ៍។ ប៉ុន្តែដល់ពេលយប់ស្រាប់តែបាត់កូនស្រីគាត់មិនឃើញចូលផ្ទះដេក។ លុះព្រឹកឡើងថ្ងៃទី ៦ មិថុនា ទើបឃើញ កូនស្រីគាត់ចូលផ្ទះ ហើយស្ត្រីជាម្តាយបានសាកសួរ ទើបក្មេងរងគ្រោះប្រាប់ថា ឈ្មោះ ធី សុខឿត បានមកបបួលនាងទៅដេកនៅផ្ទះគេក្នុងភូមិត្រស់ហើយបានរួមភេទជាមួយនាងបានម្តងផង។
លោកបន្ថែមថា ក្រោយពីម្តាយក្មេងដឹងថា ជនសង្ស័យឈ្មោះ ធី សុខឿត រួមភេទជាមួយកូនស្រីខ្លួនទើបម្តាយក្មេងស្រីបាននាំកូនមកប្តឹងគាត់ដែលជាអាជ្ញាធរភូមិ។ បន្ទាប់ពីស្តាប់តាមការរៀបរាប់របស់ក្មេងរងគ្រោះចប់រួចរាល់ លោកក៏ធ្វើកំណត់ហេតុ ហើយរាយការណ៍បន្តទៅនគរបាលប៉ុស្តិ៍ អូរតាគី ចុះចាប់ជនសង្ស័យតែម្តង។
ពាក់ព័ន្ធអំពើរំលោភសេពសន្ថវៈនេះដែរ នៅថ្ងៃទី ៧ មិថុនា ភ្នំពេញ ប៉ុស្តិ៍ មិនអាចទាក់ទងលោកស្រី ម៉ៅ ម៉ាប់ មន្ត្រីសមាគមការពារសិទ្ធិមនុស្ស (ADHOC) ដែលធ្វើការងារផ្នែកកុមារបានទេ។ ប៉ុន្តែលោកស្រីធ្លាប់ប្រាប់ភ្នំពេញប៉ុស្តិ៍កាលពីខែមុន ថាខេត្តបាត់ដំបង ខេត្តកំពត និងខេត្តកំពង់ធំ កើតមានអំពើរំលោភសេពសន្ថវៈច្រើនជាងបណ្តាខេត្តផ្សេងៗ។ កត្តាសំខាន់ដែលនាំឱ្យកើតមានបទល្មើសនេះគឺមកពីស្ថានភាពសេដ្ឋកិច្ចក្រីក្រក្នុងគ្រួសាររបស់ក្មេងតែម្តង។
លោកស្រីថ្លែងថា៖ «សមាគមអាដហុក ភាគច្រើនធ្វើការផ្តោតលើកុមារីដែលមានអាយុក្រោម ១៨ ឆ្នាំ ហើយបានរកឃើញថាពួកគេត្រូវរងនូវអំពើរំលោភសេពសន្ថវៈពីសំណាក់ជនល្មើសក្នុងនោះមានសាច់ញាតិផ្ទាល់ក្នុងគ្រួសារក្មេងស្រីរងគ្រោះ ឬបុគ្គលនៅក្រៅរង្វង់គ្រួសារពួកគេ (អ្នកដទៃ)»៕