.jpg)
យុវជន ៣ នាក់ ក្នុងចំណោម ៦ នាក់ ត្រូវបាននគរបាលឃាត់ខ្លួន ពាក់ព័ន្ធករណីការស្លាប់ក្មេងម្នាក់ និងរបួសម្នាក់ កាលពីម្សិលមិញ។ រូបថត ប៉ូលិស
កណ្ដាលៈ យុវជនម្នាក់ស្លាប់ពេលបញ្ជូនដល់មន្ទីរពេទ្យ និងក្មេងប្រុសម្នាក់ទៀតរបួសស្រាលក្នុងទំនាស់ដេញវាយគ្នា រីឯក្រុមក្មេងបង្កល្មើសចំនួន ៤ នាក់ ត្រូវសមត្ថកិច្ចចាប់បានក្រោយកើតហេតុប៉ុន្មានម៉ោងស្ថិតនៅភូមិចុងបង្គោល ឃុំបែកចាន ស្រុកអង្គស្នួល ខេត្តកណ្តាល។
លោក ថាច ផល្លា អធិការរងទទួលផែនការងារព្រហ្មទណ្ឌនៃអធិការដ្ឋាននគរបាលស្រុកអង្គស្នួលប្រាប់នៅថ្ងៃទី ៨ មិថុនាថា ក្មេងរងគ្រោះស្លាប់ឈ្មោះ មុត ឧត្តម ភេទ ប្រុសអាយុ ១៨ ឆ្នាំ និងក្មេងប្រុសម្នាក់ទៀត ឈ្មោះ ឌី សម្បត្តិ របួសស្រាល។ ចំណែកភាគីខាងក្រុមក្មេងបង្កហេតុមានគ្នាចំនួន ១០ នាក់ ហើយភ្លាមៗក្រោយកើតហេតុការណ៍ត្រូវបានកម្លាំងនគរបាលស្រុកអង្គស្នួលស្រាវជ្រាវចាប់បាន ៣ នាក់ និងក្រោយមកសមត្ថកិច្ចចាប់បានម្នាក់ទៀត។
លោកប្រាប់ថា៖ «ខាងភាគីបង្កយើងចាប់បាន ៤ នាក់ ឥឡូវយើងកំពុងស្រាវជ្រាវឈានទៅចាប់បក្ខពួកគេ ៦ នាក់ទៀត។ រឿងនេះយើងមិនទាន់ដឹងច្បាស់ថា ជារឿងគំនុំ ឬអ្វីទេព្រោះចាំសាកសួរពីភាគីទាំងសងខាងសិន»។
លោក ផល្លា រៀបរាប់ប្រាប់តាមចម្លើយរបស់ជនរងគ្រោះថា នៅវេលាម៉ោងប្រហែល ៧ យប់ថ្ងៃទី ៧ មិថុនា មានក្មេងប្រុស ២ នាក់បានជិះម៉ូតូ ១ គ្រឿងម៉ាកស្កូពីឌុបគ្នាក្នុងគោលដៅទៅផ្សារបែកចាន។ ប៉ុន្តែពេលក្មេងទាំង ២ នាក់ កំពុងតែជិះម៉ូតូស្រាប់មានក្រុមក្មេងសង្ស័យ ១ ក្រុមមានគ្នាប្រមាណជា ៥ ទៅ ៦ នាក់ជិះម៉ូតូដេញតាមពីក្រោយម៉ូតូរបស់ជនរងគ្រោះ។
ពេលក្រុមក្មេងរងគ្រោះឃើញគេដេញតាមដូច្នេះក៏បត់ម៉ូតូបំណងបកក្រោយវិញ ប៉ុន្តែត្រូវបានក្រុមជនបង្កដេញតាមទាន់ហើយក៏គប់នឹងដំថ្ម ទៅលើជនរងគ្រោះទាំង ២ នាក់តែមិនត្រូវ។ ដោយសារតែភ័យខ្លាចគេដេញវាយផងនោះ ជនរងគ្រោះទាំង ២ នាក់ បានបើកម៉ូតូធ្លាក់ប្រឡាយនៅក្បែរចិញ្ចើមផ្លូវរបួសទាំង ២ នាក់។ ជនរងគ្រោះត្រូវបានដឹកទៅមន្ទីរពេទ្យ ប៉ុន្តែម្នាក់បានដាច់ខ្យល់ស្លាប់ ក្រោយបញ្ជូនដល់មន្ទីរពេទ្យខេត្តកំពង់ស្ពឺ។
លោក ផល្លា ថ្លែងថា ក្រោយកើតហេតុកម្លាំងនគរបាលស្រុកអង្គស្នួលបានសហការជាមួយកម្លាំងនគរបាលប៉ុស្តិ៍បែកចានធ្វើការស្រាវជ្រាវចាប់ជនសង្ស័យបានជាបន្តបន្ទាប់ចំនួន ៤ នាក់ និងបានកំណត់អត្តសញ្ញាណជនសង្ស័យចំនួន ៦ នាក់ទៀត។
លោក ផុន រតនា នាយនគរបាលប៉ុស្តិ៍បែកចានបានបញ្ជាក់ថា ករណីនេះជនរងគ្រោះមានតែ ២ នាក់ហើយស្លាប់ដោយសារដួលម៉ូតូ៕
