.jpg)
មន្ត្រីក្រសួងបរិស្ថាន និងមន្ត្រីខេត្តសៀមរាបក្នុងពិធីចុះហត្ថលេខាពីថ្ងៃទី ៧ មិថុនា។ រូប រដ្ឋបាលខេត្តសៀមរាប
សៀមរាបៈ ក្រសួងបរិស្ថាន និងរដ្ឋបាលខេត្ដសៀមរាបបានចុះកិច្ចព្រមព្រៀងអនុវត្តគម្រោងកាត់បន្ថយសំណល់ប្លាស្ទិកនៅក្នុងភូមិសាស្ដ្រខេត្តសៀមរាប ដោយទប់ស្កាត់ និងកាត់បន្ថយសំណល់ប្លាស្ទិកទាំងនៅលើដី និងក្នុងទឹកតាមរយៈការអនុវត្តនូវគោលការណ៍ ៤Rs (ការកាត់បន្ថយការប្រើប្រាស់ឡើងវិញការកែច្នៃ និងបដិសេធ) សំណល់ប្លាស្ទិក។
ពិធីចុះហត្ថលេខាលើកិច្ចព្រមព្រៀងនេះធ្វើឡើងកាលពីថ្ងៃទី ៧ ខែមិថុនា ក្រោមអធិបតីភាព លោក គិត ច័ន្ទគ្រឹស្នា ទីប្រឹក្សារដ្ឋមន្ត្រីក្រសួងបរិស្ថាន និងលោក ង៉ាន់ ភិរុណ អភិបាលរងខេត្តសៀមរាប អ្នកជំនាញការបរិស្ថាននៃកម្មវិធីអភិវឌ្ឍន៍សហប្រជាជាតិ (UNDP) រួមនឹងមន្ដ្រីពាក់ព័ន្ធរបស់រដ្ឋបាលខេត្ដសៀមរាបមួយចំនួនទៀត។
លោក ង៉ាន់ ភិរុណ ថ្លែងក្នុងពេលចុះហត្ថលេខានេះថា បច្ចុប្បន្នរដ្ឋបាលខេត្តសៀមរាបបាននិងកំពុងកៀរគរធនធានពីដៃគូអភិវឌ្ឍន៍ និងជំរុញដល់រដ្ឋបាលក្រុង-ស្រុកក្នុងការអនុវត្តមុខងារគ្រប់គ្រងសំរាមសំណល់រឹងនៅទីប្រជុំជនតាមអនុក្រឹត្យលេខ ១១៣ អនក្រ.បក ស្តីពីការគ្រប់គ្រងសំរាមសំណល់រឹងទីប្រជុំជន ដើម្បីធានាបាននូវសោភណភាពសុខុមាលភាព និងគុណភាពបរិស្ថាននៅក្នុងភូមិសាស្ដ្រខេត្តសៀមរាប។
លោកថ្លែងថា៖ «តាមរយៈកិច្ចព្រមព្រៀងនេះនឹងចូលរួមចំណែកក្នុងការទប់ស្កាត់ និងការកាត់បន្ថយសំណល់ប្លាស្ទិកទាំងនៅលើដី និងក្នុងទឹក ដោយការអនុវត្តនូវគោលការណ៍ ៤Rs ការប្រើប្រាស់ប្លាស្ទិក»។
លោកឱ្យដឹងថា កន្លងមកខេត្តសៀមរាបទទួលបានឡដុតសំរាមចំនួន ៣ ទីតាំង រ៉ឺម៉កម៉ូតូកង់បីចំនួន ៦ គ្រឿង និងរថយន្តដឹកជញ្ជូនសំរាមធុនធំចំនួន ២ គ្រឿងពីក្រសួងបរិស្ថាន។ រដ្ឋបាលខេត្ដក៏ទទួលរថយន្តបោសសម្អាតផ្លូវចំនួន ៣ គ្រឿងជាជំនួយពីខេត្តយូណាន ប្រទេសចិន សម្រាប់សម្អាតតាមដងផ្លូវនានាក្នុងក្រុងសៀមរាបផងដែរ។
លោក ភិរុណ ថ្លែងថា៖ «យើងសង្ឃឹមថា តាមរយៈកិច្ចសហការអនុវត្តគម្រោងនេះសំណល់ប្លាស្ទិកនឹងត្រូវបានកាត់បន្ថយដោយការអនុវត្ដការបញ្ជ្រាបការយល់ដឹង និងផ្សព្វផ្សាយចំណេះដឹងពីបញ្ហាសំណល់ប្លាស្ទិកដល់ប្រជាពលរដ្ឋការប្រើប្រាស់ផលិតផលជំនួសផលិតផលប្លាស្ទិក និងការគាំទ្រនូវមធ្យោបាយសម្ភារផ្សេងៗ»។
បើតាមរដ្ឋបាលខេត្ដសៀមរាប ផែនការក្នុងការអនុវត្តសកម្មភាពគម្រោងនេះរួមមានការសិក្សាពីលទ្ធភាព និងមធ្យោបាយបង្កើនសេវាគ្របដណ្តប់ក្នុងការប្រមូលសម្អាត និងដឹកជញ្ជូនសំរាម និងដោះស្រាយការកកស្ទះសំរាម។ ក្រៅពីនេះក៏មានគម្រោងផ្តល់នូវសម្ភារធុងសំរាម និងការរៀបចំដំឡើងផ្ទាំងផ្សព្វផ្សាយទាក់ទង និងការកាត់បន្ថយការប្រើប្រាស់ប្លាស្ទិក និងបង្កើនចំណេះដឹង និងយុទ្ធនាការផ្សព្វផ្សាយគ្រប់មធ្យោបាយ។
លោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងថា បច្ចុប្បន្នក្រសួងបរិស្ថានកំពុងអនុវត្ដគម្រោងផ្ដល់រថយន្ត និងម៉ូតូដឹកសំរាមរួមនឹងសម្ភារទុកដាក់សំរាមដល់រដ្ឋបាលរាជធានី-ខេត្ដ ដើម្បីគាំទ្រលើការផ្ដល់សេវាប្រមូលសម្អាត និងដឹកជញ្ជូនសំរាមសំណល់រឹង នៅតាមមូលដ្ឋានឱ្យទាន់ពេលវេលា ធានានិរន្តរភាព និងភាពជាម្ចាស់ក្នុងការគ្រប់គ្រងសំណល់សំរាម។
លោកថ្លែងថា៖ «ការប្រគល់រថយន្ត និងម៉ូតូដឹកសំរាមទៅដល់អាជ្ញាធរខេត្ដនេះក៏ជាការចូលរួមពង្រីកសេវាប្រមូលសំរាមដោយខ្លួនឯង នៅតាមបណ្ដារាជធានី-ខេត្ដដើម្បីឱ្យមានបរិស្ថានស្អាតប្រមូលសំរាមឱ្យទាន់ពេលវេលា និងធានានិរន្តរភាព និងការធ្វើភាពជាម្ចាស់នៅក្នុងការគ្រប់គ្រងសំណល់សំរាមនៅតាមតំបន់ដែលខ្លួនគ្រប់គ្រង»។
ទាក់ទងនឹងការគ្រប់គ្រងសំរាមនេះដែរអភិបាលស្រុកបន្ទាយស្រីនៃខេត្ដសៀមរាប លោក ឃឹម ហ្វីណង់ បានប្រើប្រាស់រូបមន្ត «សហគមន៍ស្វ័យគ្រប់គ្រង» ដើម្បីឱ្យពលរដ្ឋម្ចាស់ការ អនុវត្ដការគ្រប់គ្រងសំរាមក្នុងមូលដ្ឋាននៃភូមិព្រះដាក់ដោយជោគជ័យចាប់តាំងពីដើមឆ្នាំរហូតមកដល់ត្រឹមខែឧសភា ឆ្នាំ ២០២១ នេះនិងកំពុងបន្តរៀបចំគម្រោងពង្រីកការអនុវត្តគម្រោងនេះទៅតាមបណ្ដាភូមិស្រុកដទៃទៀត។
លោក ហែម ឧត្តម អ្នកជំនាញផ្នែកបរិស្ថានបានលើកឡើងថា ដើម្បីឱ្យការអនុវត្ដគម្រោងកាត់បន្ថយការប្រើប្រាស់សំណល់ប្លាស្ទិក ប្រកបដោយប្រសិទ្ធភាពគឺត្រូវធ្វើពីថ្នាក់ក្រោមជាតិ ដល់ប្រជាពលរដ្ឋនៅតាមភូមិ ឃុំ។ រាជរដ្ឋាភិបាលត្រូវមានផែនការច្បាស់លាស់ក្នុងការទម្លាក់ថវិកាក្នុងការអនុវត្ដលើគម្រោងនេះបន្ថែមទៀត។
លោកបានបញ្ជាក់ថា៖ «ពលរដ្ឋនៅតែត្រូវឱ្យមានការពន្យល់ណែនាំ ឬដាក់ចេញជាកម្មវិធីអប់រំតាមរយៈក្រសួងអប់រំ ក្រសួងបរិស្ថាន ឬមន្ដ្រីមូលដ្ឋាន ពីព្រោះវាគឺជាការចាំបាច់។ យើងមិនអាចទម្លាក់កិច្ចការងារនេះទៅឱ្យតែក្រុមហ៊ុនប្រមូលសំរាម ឬអ្នកទទួលបន្ទុកលើកិច្ចការងារនេះតែមួយផ្នែកទេ។ ប៉ុន្ដែប្រជាពលរដ្ឋគ្រប់រូបត្រូវចូលរួមទាំងអស់គ្នារឿងសំរាមនេះ»៕
