.jpg)
មន្ត្រីជំនាញចុះពិនិត្យស្ថានីយលក់ប្រេងឥន្ធនៈពីថ្ងៃ ៤ មិថុនា។ រូបថត កបប
ភ្នំពេញៈ រដ្ឋមន្ត្រីចំនួន ៣ បានចុះហត្ថលេខារួមគ្នាដាក់ឱ្យប្រើប្រាស់ប្រកាសអន្តរក្រសួងស្ដីពីនីតិវិធីពិន័យអន្តរការណ៍លើអំពើល្មើសនឹងច្បាប់ស្តីពីកិច្ចការពារអ្នកប្រើប្រាស់ ខណៈអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» បានចុះត្រួតពិនិត្យបណ្តាស្ថានីយដេប៉ូចែកចាយប្រេងឥន្ធនៈជាង ២០០ ទីតាំង។
ប្រកាសអន្តរក្រសួងស្ដីពីនីតិវិធីពិន័យអន្តរការណ៍លើអំពើល្មើសនឹងច្បាប់ស្តីពីកិច្ចការពារអ្នកប្រើប្រាស់ត្រូវបានចុះហត្ថលេខាដោយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក កើត រិទ្ធ រដ្ឋមន្ត្រីក្រសួងយុត្តិធម៌ និងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅថ្ងៃទី ៣ មិថុនា ឆ្នាំ ២០២១។
ប្រកាសអន្តរក្រសួងនេះមានគោលដៅក្នុងការកំណត់វិសាលភាព និងនីតិវិធីរបស់ស្ថាប័នដែលមានសិទ្ធិក្នុងការពិន័យជាអន្តរការណ៍ចំពោះអ្នកល្មើស ដើម្បីលើកកម្ពស់ប្រសិទ្ធភាពនៃការអនុវត្តច្បាប់ស្តីពីកិច្ចការពារអ្នកប្រើប្រាស់ បន្ទាប់ពីច្បាប់នេះត្រូវបានប្រកាសឱ្យប្រើប្រាស់កាលពីខែវិច្ឆិកា ឆ្នាំ ២០១៩។
តាមប្រកាសដដែលនេះក៏បានសម្រេចប្រគល់សិទ្ធិទៅឱ្យអគ្គនាយកដ្ឋាន ក.ប.ប ជាអ្នកអនុវត្តនីតិវិធីក្នុងការពិន័យជាអន្តរការណ៍ដោយសហការជាមួយមន្ត្រីនគរបាលយុត្តិធម៌ ចំពោះបុគ្គលល្មើសនឹងច្បាប់ស្តីពីកិច្ចការពារអ្នកប្រើប្រាស់ បន្ទាប់ពីបញ្ចប់ការស៊ើបអង្កេត។
ប្រកាសនេះបានបញ្ជាក់ដែរថា៖ «ក្នុងករណីដែលបុគ្គលល្មើស បដិសេធមិនព្រមទទួលលិខិតជូនដំណឹង និងឯកសារពាក់ព័ន្ធនឹងការពិន័យអន្តរការណ៍ ឬមិនមានម្ចាស់ ឬមិនមានតំណាងទទួលនោះមន្ត្រីស៊ើបអង្កេតនៃអគ្គនាយកដ្ឋាន ក.ប.ប ត្រូវបិទសេចក្តីជូនដំណឹងពីការពិន័យនៅទីតាំងទាំងនោះ និងនៅសាលាឃុំ សង្កាត់»។
ប្រកាសនេះបានឱ្យដឹងបន្តថា៖ «ក្រសួងពាណិជ្ជកម្ម ត្រូវធ្វើការផ្សព្វផ្សាយជាសាធារណៈឱ្យបានទូលំទូលាយនូវខ្លឹមសារប្រកាសអន្តរក្រសួងនេះ និងត្រូវរៀបចំឱ្យមានកន្លែងទទួលពាក្យបណ្តឹងតវ៉ា ឬការមិនសុខចិត្តណាមួយ ចំពោះការពិន័យអន្តរការណ៍របស់មន្ត្រីស៊ើបអង្កេតនៃអគ្គនាយកដ្ឋាន ក.ប.ប»។
យោងតាមច្បាប់ស្តីពីកិច្ចការពារអ្នកប្រើប្រាស់ចុះខែវិច្ឆិកា ឆ្នាំ ២០១៩ បានឱ្យដឹងថា ច្បាប់នេះសំដៅធានាឱ្យមានកិច្ចការពារដល់អ្នកប្រើប្រាស់ ដើម្បីបង្កើតបរិយាកាសនៃការធ្វើពាណិជ្ជកម្មដោយស្មោះត្រង់ និងការប្រកួតប្រជែងដោយសុចរិត។
លោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋាន ក.ប.ប. បានប្រាប់ ភ្នំពេញ ប៉ុស្តិ៍ នៅថ្ងៃទី ៨ មិថុនាថា បន្ទាប់ពីអន្តរក្រសួងបានប្រកាសឱ្យប្រើប្រាស់ប្រកាសរួមនេះ អគ្គនាយកដ្ឋាន ក.ប.ប. បានបើកកិច្ចប្រជុំមួយកាលពីថ្ងៃទី ៧ មិថុនា ដោយមានការចូលរួមពីប្រធានសាខា ក.ប.ប រាជធានី ដើម្បីដាក់ចេញវិធានការ និងការផ្សព្វផ្សាយជាបន្តបន្ទាប់។
លោកបញ្ជាក់ថា៖ «ឡូវប្រកាសនេះបានចេញហើយយើងជជែកគ្នា ដើម្បីសុំគោលការណ៍ថ្នាក់ដឹកនាំ ជាពិសេសឯកឧត្តមរដ្ឋមន្ត្រីក្រសួងពាណិជ្ជកម្ម ដែលជាប្រធានគណៈកម្មការការពារអ្នកប្រើប្រាស់ ដើម្បីសុំការផ្សព្វផ្សាយ និងការអនុវត្តនូវខ្លឹមសារនៃប្រកាសរួមនេះ»។
លោក ផាន អូន បញ្ជាក់ថា យោងតាមប្រកាសរួមនេះ អគ្គនាយកនៃអគ្គនាយកដ្ឋាន ក.ប.ប នឹងមានតួនាទីក្នុងការចេញកំណត់ត្រាស្តីពីបណ្ណពិន័យអន្តរការណ៍ ចេញវិក្កយបត្រ ទទួល និងចេញបង្កាន់ដៃបង់ប្រាក់ពិន័យអន្តរការណ៍ឱ្យទៅបុគ្គលល្មើស រួមទាំងកសាងសំណុំរឿងនៃបទល្មើសនៃច្បាប់ស្តីពីការការពារអ្នកប្រើប្រាស់ទៅតុលាការផងដែរ។
តាមរបាយការណ៍របស់អគ្គនាយកដ្ឋាន ក.ប.ប ដែលភ្នំពេញប៉ុស្តិ៍ទទួលបាន នៅថ្ងៃទី ៨ មិថុនា បានឱ្យដឹងថា គិតចាប់ពីឆ្នាំ ២០២០ ដល់ ដើមខែមិថុនា ឆ្នាំ ២០២១ អគ្គនាយកដ្ឋាន ក.ប.ប បានចុះត្រួតពិនិត្យបណ្តាស្ថានីយ ដេប៉ូចែកចាយប្រេង ឥន្ធនៈទូទាំងប្រទេសចំនួន ២១៨ កន្លែងក្នុងនោះបានបញ្ជូនទៅតុលាការចំនួន ១៧ ទីតាំង ខណៈបានផាកពិន័យជាអន្តរការណ៍ជិត ១០ ទីតាំង។
របាយការណ៍ដដែលនេះបន្តថា ក្នុងចំណោមជាង ២០០ ទីតាំងនេះ គឺទីតាំងមិនមានភាពអនុលោមផ្នែកគុណភាព និងបរិមាណសរុបជាង ១០០ ទីតាំង ត្រូវបានរកឃើញ ខណៈទីតាំងដែលបានគោរពតាមអនុលោមភាពល្អមានជិត ៧០ ទីតាំង៕
វីដេអូ៖
