.jpg)
ស្លាកប៉ាណូស្រាបៀរកំពុងត្រូវបានរុះរើចេញ។ រូបថត រដ្ឋបាលខេត្តកំពង់ស្ពឺ
កំពង់ស្ពឺ/កែបៈ ការរុះរើដោយស្ម័គ្រចិត្តនូវស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទទូទាំងខេត្តកំពង់ស្ពឺ សម្រេចបានជិត ៩០ ភាគរយ និងទុកពេលឱ្យក្រុមហ៊ុនស្រាបៀរ ដែលមិនទាន់ធ្វើការរុះរើត្រឹមពាក់កណ្តាលខែនេះ ស្របពេលខេត្តកែបក៏បានដាក់ចេញនូវវិធានការរុះរើបដា ឬផ្ទាំងប៉ាណូនានា ដោយជំនួសមកវិញនូវខ្លឹមសារអប់រំពាក់ព័ន្ធនឹងវិធានការទប់ស្កាត់ជំងឺកូវីដ ១៩។
លោក វ៉ី សំណាង អភិបាលខេត្តកំពង់ស្ពឺបានប្រាប់ ភ្នំពេញ ប៉ុស្តិ៍ នៅថ្ងៃទី ៨ មិថុនាថា ការ រុះរើស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទនៅតាមផ្ទះរបស់ប្រជាពលរដ្ឋ គឺបានធ្វើឡើងយ៉ាងសកម្ម និងស្ថិតក្នុងភាពល្អប្រសើរដោយមានការចូលរួមពីប្រជាពលរដ្ឋគ្រប់ៗគ្នា។
ចំណែកស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទ នៅតាមទីសាធារណៈវិញ ក្រុមហ៊ុនស្រាក៏បានធ្វើការរុះរើជាបន្តបន្ទាប់ផងដែរ ហើយដោយសារតែការរុះរើរបស់ក្រុមការងារនៃក្រុមហ៊ុនទាំងនោះមានកម្រិត ទើបរដ្ឋបាលខេត្ត ទុកពេលឱ្យធ្វើការរុះរើបន្តត្រឹមថ្ងៃទី ១៥ មិថុនា។
លោកបញ្ជាក់ថា៖ «ភាគច្រើនពលរដ្ឋគាត់រើបានច្រើន នៅតាមមុខផ្ទះរបស់ពួកគាត់បាន ៨០ ទៅជិត ៩០ % នៅទូទាំងខេត្ត។ បើក្រុមហ៊ុនរុះរើមិនទាន់ត្រឹមថ្ងៃកំណត់ទេ យើងនឹងឱ្យក្រុមការងារចុះរុះរើ ដោយថ្លៃរុះរើ និងថ្លៃខូចខាតក្រុមហ៊ុនជាអ្នករ៉ាប់រង»។
បើតាមលោក វ៉ី សំណាង ការរុះរើស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទ គឺរដ្ឋបាលខេត្តនឹងមិនមានវិធានការជំនួសមកវិញនូវស្លាកផ្សព្វផ្សាយនានានោះទេ ដោយលោកយល់ថា រក្សាទុកថវិកាទាំងនេះ ដើម្បីយកទៅប្រើប្រាស់ក្នុងប្រតិបត្តិការផ្សេងៗ ខណៈប្រជាពលរដ្ឋដែលបានរុះរើស្លាកស្រាបៀរនៅតាមផ្ទះរបស់ខ្លួន គឺអាចជំនួសដោយផ្ទាំងរូបភាពផ្សេងៗដែលខ្លួនពេញចិត្តដោយស្របតាមគោលការណ៍របស់ខេត្ត។
លោកបន្តថា៖ «ប្រហែលជាបងប្អូនគាត់គិតថា ផ្ទាំងប៉ាណូនៅតាមទីសាធារណៈនេះយើងយកលុយរដ្ឋមកដាក់ហើយ។ ប៉ុន្តែអត់ទេ គឺក្រុមហ៊ុនទាំងនោះគេអ្នកចំណាយលុយនោះទេ ដូច្នេះពេលគេដកផ្ទាំងផ្សព្វផ្សាយរបស់គេនោះគេក៏ដកចេញវិញទាំងអស់ដែរ។ យើងនឹងមិនចំណាយទៅលើបញ្ហានេះទេយើងទុកលុយទាំងនេះយកទៅធ្វើផ្លូវធ្វើអ្វីផ្សេងវិញគឺមានប្រយោជន៍ជាង»។
កាលពីថ្ងៃទី ២៤ ឧសភា រដ្ឋបាលខេត្តកំពង់ស្ពឺបានចេញសេចក្តីជូនដំណឹងឱ្យម្ចាស់អាជីវកម្មដែលបានលើកតាំងស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទនៅទូទាំងខេត្តត្រូវរុះរើចេញជាបន្ទាន់ ដើម្បីធានាដល់សណ្តាប់ធ្នាប់ របៀបរៀបរយល្អជាពិសេសលើកកម្ពស់សេចក្តីថ្លៃថ្នូររបស់ខេត្ត។
ជាមួយនឹងការរុះរើផ្ទាំងប៉ាណូនេះ រដ្ឋបាលខេត្តកែប ក៏បានចេញលិខិត ១ ច្បាប់ទៅម្ចាស់អាជីវកម្មទាំងអស់ទូទាំងខេត្ត ឱ្យធ្វើការរុះរើបដា ឬផ្ទាំងប៉ាណូដែលមានខ្លឹមសារផ្សព្វផ្សាយផលិតផលគ្រប់ប្រភេទ ដោយដាក់ជំនួសមកវិញនូវខ្លឹមសារអប់រំនានាពាក់ព័ន្ធនឹងវិធានការទប់ស្កាត់ការរីករាលដាលនៃជំងឺកូវីដ ១៩។
លិខិតចុះហត្ថលេខាដោយលោក សោម ពិសិដ្ឋ អភិបាលខេត្តកែបចុះថ្ងៃទី ៣ មិថុនា បន្តថា៖ «ដើម្បីចូលរួមប្រយុទ្ធប្រឆាំងជំងឺកូវីដ ១៩ រដ្ឋបាលខេត្តកែប នឹងធ្វើការផ្សព្វផ្សាយសារអប់រំពាក់ព័ន្ធនឹងវិធានការការពារជំងឺកូវីដ ១៩ ពិសេសវិធានការ “៣ ការពារ ៣ កុំ" របស់សម្តេចអគ្គមហាសេនាបតីតេជោ ហ៊ុន សែន នៅតាមសួនច្បារ និងទីតាំងសាធារណៈមួយចំនួនចាប់ពីថ្ងៃទី ១០ ខែមិថុនា តទៅ»។
លោក សោម ពិសិដ្ឋ បញ្ជាក់ក្នុងលិខិតថា ផ្អែកលើបញ្ហានេះ ស្នើលោក លោកស្រី ម្ចាស់ក្រុមហ៊ុន ឬអាជីវកម្មផ្សព្វផ្សាយពាណិជ្ជកម្មធ្វើការរុះរើបដា ឬផ្ទាំងប៉ាណូដែលមានខ្លឹមសារផ្សព្វផ្សាយផលិតផល ដើម្បីរដ្ឋបាលខេត្តមានលទ្ធភាពយកបង្គោលដែលក្រុមហ៊ុនបានដាក់កន្លងមកដោយដាក់ជំនួសមកវិញនូវខ្លឹមសារអប់រំនានាពាក់ព័ន្ធនឹងវិធានការទប់ស្កាត់ការរីករាលដាលនៃជំងឺកូវីដ ១៩។
លោក ពិសិដ្ឋ បញ្ជាក់ថា៖ «ការបោះពុម្ពខ្លឹមសារអប់រំជាបន្ទុករបស់រដ្ឋបាលខេត្តហើយការរុះរើត្រូវចាប់ពីថ្ងៃជូនដំណឹងនេះរហូតដល់ ថ្ងៃទី ៩ មិថុនា ឆ្នាំ ២០២១ ជាកំហិត។ ករណីមិនអនុវត្តតាមសេចក្តីជូនដំណឹងនេះរដ្ឋបាលខេត្តនឹងចាត់វិធានការតាមនីតិវិធីរដ្ឋបាល និងធ្វើការរុះរើដោយរាល់ការចំណាយជាបន្ទុករបស់ម្ចាស់ក្រុមហ៊ុន ហើយរាល់ការខូចខាតរដ្ឋបាលខេត្តមិនទទួលខុសត្រូវឡើយ»។
លោក មុំ គង់ នាយកប្រតិបត្តិអង្គការចលនា ដើម្បីសុខភាពកម្ពុជាបានសាទរ និងបានចាត់ទុកវិធានការទាំងនេះថា គឺជាការចាប់ផ្តើមដ៏ល្អមួយ។ ប៉ុន្តែលោកនៅតែចង់ឱ្យមានការបង្កើតច្បាប់ ដើម្បីធ្វើការគ្រប់គ្រងគ្រឿងស្រវឹងទាំងនេះនៅក្នុងប្រទេសឱ្យមានរបៀបរៀបរយ។
លោកលើកឡើងថា ការផ្សព្វផ្សាយគ្រឿងស្រវឹង គឺជាការជំរុញលើកទឹកចិត្តមួយ ដែលនាំឱ្យពលរដ្ឋឈានទៅដល់ការប្រើប្រាស់ ហើយវា គឺជាដើមចម ដែលនាំឱ្យមានគ្រោះថ្នាក់ចរាចរណ៍បណ្តាលឱ្យកើតជំងឺមហារីក និងមានអំពើហិង្សាក្នុងគ្រួសារ។
លោកបញ្ជាក់ថា៖ «ខ្ញុំនៅតែនិយាយដដែលៗថា វិធានការនេះគឺជាការចាប់ផ្តើមដ៏ល្អមួយ។ ប៉ុន្តែប្រជាពលរដ្ឋយើង ក្រេបគ្រឿងស្រវឹងយ៉ាងគគ្រឹកគគ្រេង ដែលផ្ទុយនឹងវិធានការ ៣កុំ ៣ការពារ របស់រដ្ឋាភិបាលយើងក្នុងពេលនេះ ដើម្បីទប់ស្កាត់ការរីករាលដាលជំងឺកូវីដ ១៩។ បើមានច្បាប់ដើម្បីធ្វើការគ្រប់គ្រងបញ្ហានេះ កាន់តែប្រសើរ ព្រោះវាមិនត្រឹមតែការពារបានក្នុងការផ្សព្វផ្សាយនោះទេគឺគ្រប់គ្រងបានលើអ្នកប្រើប្រាស់ទៀត»៕
