កំពង់ចាមៈ រដ្ឋបាលខេត្តកំពង់ចាមគ្រោងដាក់ពាក្យស្នើសុំកាត់ឆ្វៀលដី ៥០ ហិកតា ដែលស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទមានទីតាំងស្ថិតនៅភូមិខ្នារ ឃុំស្ដើងជ័យ ស្រុកជើងព្រៃ ដើម្បីធ្វើជាទីលានចាក់សំរាមថ្មីក្នុងពេលឆាប់ៗខាងមុខនេះ។
នាយករដ្ឋបាលខេត្តកំពង់ចាមលោក ឃន ប្រុស ថ្លែងនៅថ្ងៃទី ៨ ខែមិថុនាថា រដ្ឋបាលខេត្តកំពង់ចាមកំពុងរៀបចំធ្វើពាក្យស្នើសុំកាត់ឆ្វៀលដីចំនួន ៥០ ហិកតា ពីក្រសួងកសិកម្ម រុក្ខាប្រមាញ់ និងនេសាទ ដែលមានទីតាំងស្ថិតនៅភូមិខ្នារ ឃុំស្ដើងជ័យ ស្រុកជើងព្រៃ ខេត្តកំពង់ចាម ដើម្បីយកមកប្រើប្រាស់ជាកន្លែងចាក់សំរាម។
លោកថ្លែងថា៖ «យើងកំពុងរៀបចំធ្វើពាក្យដើម្បីដាក់ស្នើសុំទៅកាន់ក្រសួងកសិកម្ម រុក្ខាប្រមាញ់ និងនេសាទ។ អ៊ីចឹងក្រោយពេលក្រសួង កសិកម្មយល់ព្រមហើយ យើងនឹងស្នើរាជរដ្ឋាភិបាល ដើម្បីកាត់ឆ្វៀល ជាដីសាធារណៈរបស់ខេត្ត»។
លោក នួន គង់សល្យ ប្រធានមន្ទីរបរិស្ថានខេត្តកំពង់ចាមថ្លែងថា បច្ចុប្បន្នខេត្តកំពង់ចាមនៅមិនទាន់មានទីលានចាក់សំរាមផ្ទាល់ខ្លួននៅឡើយទេ។ ចំណែកទីតាំងចាក់សំរាមបច្ចុប្បន្ន ដែលស្ថិតនៅឃុំបុសខ្នុរ ស្រុកចំការលើ មានទំហំ ១០ ហិកតានោះ ជាទីលានរបស់ក្រុមហ៊ុនស៊ីនទ្រី។
លោកបន្តថា បានជារដ្ឋបាលខេត្តស្វែងរកទីតាំងថ្មីសម្រាប់ចាក់សំរាម ព្រោះក្រុងកំពង់ចាមបានជាប់នៅក្នុងគម្រោងមួយរបស់ ADB ដែលគ្រោងជួយរៀបចំទីលានចោលសំរាមដែលមានស្តង់ដា មិនប៉ះពាល់ដល់បរិស្ថាន។
លោកថ្លែងថា៖ «យើងមានគម្រោងរបស់ ADB មួយ ដែលគាត់ជួយទៅលើគម្រោងក្រុងរបៀងរបស់ខេត្តចំនួន ៤ ក្នុងតំបន់បឹងទន្លេមេគង្គហ្នឹង។ ក្នុងហ្នឹងមានក្រុងកំពង់ចាមមួយដែរ ដែលផែនការហ្នឹងគាត់ជួយឲ្យទីលានចាក់សំរាមមួយដែលមានស្តង់ដា។ ប៉ុន្តែទីលានដែលយើងបម្រុងទុកវាមិនមានលក្ខណៈ អំណោយផលល្អដល់គម្រោង។ អ៊ីចឹង ខេត្តក៏មានផែនការរើសយកដីកន្លែងណា ដែលអាចមានទីតាំងល្អជាងទីតាំង ដែលត្រៀមហ្នឹង»។
លោក អូត ឈាងលី អភិបាលស្រុកជើងព្រៃថ្លែងថា ដីនោះពិតជានៅឆ្ងាយពីផ្ទះប្រជាពលរដ្ឋប្រាកដមែន ប៉ុន្តែពាក់ព័ន្ធក្នុងការចោលសំរាម បើសិនជាធ្វើមិនបានល្អនឹងអាចបណ្តាលឱ្យមានជម្រាបទឹកកខ្វក់ដែលប៉ះពាល់ដល់ការធ្វើស្រែចម្ការរបស់ពលរដ្ឋនៅក្បែរនោះ។
លោកថ្លែងថា៖ «បើសិនជាទុកដាក់មិនបានល្អ អាចបណ្តាលឱ្យមានការប៉ះពាល់ដល់ប្រជាពលរដ្ឋចំនួន ២ ភូមិនៅទីនោះ គឺភូមិខ្នារ និងភូមិក្តុយ ឃុំស្តើងជ័យ ដែលពួកគាត់ធ្វើស្រែចម្ការនៅក្បែរកន្លែងទីតាំងដីដែលរដ្ឋបាលខេត្តគ្រោងរៀបចំ ជាទីលានចាក់សំរាមនោះ។ ប៉ុន្តែខ្ញុំមិនចាំថា ២ ភូមិនោះមានពលរដ្ឋប៉ុន្មានគ្រួសារទេ ព្រោះពេលនេះខ្ញុំនៅតាមផ្លូវ»។
លោក ហែម ឧត្តម អ្នកជំនាញផ្នែកបរិស្ថានថ្លែងថា ការបង្កើតទីលានចាក់សំរាមមិនថា នៅទីជនបទ ឬទីប្រជុំជននោះទេសំខាន់គឺបច្ចេកវិទ្យាក្នុងការរៀបចំឱ្យមានស្តង់ដាត្រឹមត្រូវ។ បើសិនគ្រាន់តែជាទីដាក់សំរាម ដោយមិនមានអ្វីក្រាលគ្រប ឬខ្ចប់ត្រឹមត្រូវ នោះប្រាកដជាមានផលប៉ះពាល់នៅពេលមានភ្លៀង។
លោកថា សំរាមចម្រុះ ដែលមានដូចជា ដបប្លាស្ទិក ឬថង់ប្លាស្ទិក ដែលមានសារធាតុគីមី វានឹងប៉ះពាល់ខ្លាំងទៅលើគុណភាពដី និងទឹកនៅក្រោមដីផងដែរ។
លោកនិយាយថា៖ «ជួនកាលគាត់គរសំរាមហើយដុត អ៊ីចឹងនៅពេលដុត ទី១ អាចបំភាយផ្សែងដល់អ្នកដុត ហើយនិងអ្នកនៅជុំវិញហ្នឹងធំក្លិនមិនល្អ ទី២ វាអាចជ្រាបទៅតាមប្រភពទឹកក្រោមដី។ អ៊ីចឹងបើសិនជាមានអណ្តូងទឹក ឬក៏ស្ទឹង បឹងបួរអី នៅក្បែរនោះក៏ពិបាកក្នុងការយកទៅប្រើប្រាស់ដែរ»។
យ៉ាងណាក៏ដោយលោក នួន គង់សល្យ បញ្ជាក់ថា ទីតាំងដែលរដ្ឋបាលខេត្តគ្រោងចង់បាននោះជាទីតាំងដែលនៅឆ្ងាយពីទីប្រជុំជន។ ហេតុនេះប្រសិនបើមានការរៀបចំប្រកបទៅដោយស្តង់ដាទៀតនោះ មិនមានផលប៉ះពាល់អ្វីដល់ប្រជាពលរដ្ឋឡើយ៕