ភ្នំពេញៈ បុរសម្នាក់ត្រូវបានសមត្ថកិច្ចបញ្ជូនទៅសាលាដំបូងរាជធានីភ្នំពេញ ពីម្សិលមិញពាក់ព័ន្ធការជះទឹកអាស៊ីតលើអតីតប្រពន្ធរបស់ខ្លួនកាលពីឆ្នាំមុននៅរាជធានីភ្នំពេញ ក្រោយពីគេចខ្លួនបាន ១ ឆ្នាំ ហើយដែលទើបចាប់ខ្លួនបានកាលពីថ្ងៃទី ៥ មិថុនា នៅភូមិ ២ ឃុំកំពង់ទ្រាស ស្រុកក្រូចឆ្មា ខេត្តត្បូងឃ្មុំ។
លោក ជា សុវណ្ណ អធិការរងទទួលផែនការងារព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យប្រាប់ ភ្នំពេញ ប៉ុស្តិ៍ នៅថ្ងៃទី ៨ មិថុនា ថា ជនសង្ស័យឈ្មោះ ហេង ចាន់ឌី អាយុ ៤៣ ឆ្នាំមានរបររត់ម៉ូតូឌុប និងរស់នៅក្នុងភូមិ ២ ឃុំកំពង់ទ្រាស ស្រុកក្រូចឆ្មា ខេត្តត្បូងឃ្មុំ។ រីឯ ស្ត្រីរងគ្រោះជាអតីតប្រពន្ធ ឈ្មោះ លី រ៉ានី អាយុ ៥០ ឆ្នាំ។ កាលពីឆ្នាំកើតហេតុមានមុខរបរជាសន្តិសុខ និងស្នាក់នៅផ្ទះជួលភូមិត្រពាំងថ្លឹង ១ សង្កាត់ចោមចៅទី១ ខណ្ឌពោធិ៍សែនជ័យ។
លោកប្រាប់ថា៖ «ករណីសំណុំរឿងរបស់ជនសង្ស័យម្នាក់នេះសមត្ថកិច្ចខ្ញុំបានបញ្ជូនរបាយការណ៍ទៅតុលាការតាំងពីថ្ងៃទី ៧ មិថុនាម្ល៉េះ។ ប៉ុន្តែជនសង្ស័យ ខ្ញុំទើបតែបញ្ជូនទៅតុលាការនៅថ្ងៃនេះទេ (ថ្ងៃទី ៨ មិថុនា)»។
លោកឱ្យដឹងថា ជនសង្ស័យត្រូវបានសមត្ថកិច្ចតាមស្រាវជ្រាវរកជាយូរខែមកហើយ ដោយបានផ្តល់ជារូបថត និងសាវតាររបស់ជនសង្ស័យទៅនគរបាលមូលដ្ឋានដែលជាស្រុកកំណើតរបស់ជនសង្ស័យរស់នៅផងដែរ។ លុះនៅថ្ងៃទី ២ មិថុនា ឆ្នាំ ២០២១ ស្រាប់តែសមត្ថកិច្ចនគរបាលឃុំកំពង់ត្រាច បានរាយការណ៍មកថា បានឃើញជនសង្ស័យឈ្មោះ ហេង ចាន់ឌី កំពុងធ្វើចត្តាឡីស័កនៅក្នុងមណ្ឌលចត្តាឡីស័ក ស្ថិតក្នុងភូមិ ២ ឃុំកំពង់ទ្រាស ស្រុកក្រូចឆ្មា ខេត្តត្បូងឃ្មុំ។
លោកបញ្ជាក់ថា បន្ទាប់ពីបានទទួលសេចក្តីរាយការណ៍ និងដោយទទួលបញ្ជាពីលោក ម៉ន វុធី អធិការនគរបាល ខណ្ឌពោធិ៍សែនជ័យ សមត្ថកិច្ចរបស់លោកបានដឹកនាំកម្លាំងចុះទៅឃាត់ខ្លួនជនសង្ស័យនៅថ្ងៃទី ៥ មិថុនា តែម្តង។
បើតាមលោក សុវណ្ណ រវាងស្ត្រីរងគ្រោះឈ្មោះ លី រ៉ានី និងជនសង្ស័យឈ្មោះ ហេង ចាន់ឌី បានរួមរស់ជាប្តីប្រពន្ធជាមួយគ្នាតែមិនបានរៀបការទេ។ ក្រោយមកជនសង្ស័យបានចុះចោលស្ត្រីរងគ្រោះ និងបានទៅរស់នៅជាមួយស្រីថ្មីអស់រយៈពេលជាច្រើនឆ្នាំហើយ។
បន្ទាប់មកទៀត ជនសង្ស័យសុំស្ត្រីរងគ្រោះជានាជាមួយគ្នាវិញ តែនាងមិនព្រម។ ហេតុនេះហើយទើបធ្វើឱ្យជនសង្ស័យខឹង និងធ្វើសកម្មភាពជះទឹកអាស៊ីតដាក់ស្ត្រីរងគ្រោះនៅយប់ថ្ងៃទី ២៨ ខែមីនា ឆ្នាំ ២០២០ ខណៈជនរងគ្រោះចេញពីធ្វើការដើរទៅបន្ទប់ជួលភូមិត្រពាំងថ្លឹង ១ សង្កាត់ចោមចៅទី១ ខណ្ឌពោធិ៍សែនជ័យ បណ្ដាលឱ្យរងរបួសផ្ទៃមុខធ្ងន់ធ្ងរ។
ពាក់ព័ន្ធអំពើហិង្សា និងជនរងគ្រោះដោយទឹកអាស៊ីតនេះ លោកស្រី ឈុន ចិន្តាសោភា ជាប្រធានអង្គការទប់ស្កាត់ជនពិការភាពហៅ ថា (IMPACT) បានប្រាប់ភ្នំពេញប៉ុស្តិ៍ នៅថ្ងៃទី ៨ មិថុនា ថា ករណីអំពើហិង្សាជះទឹកអាស៊ីតនេះបានថយចុះច្រើន បន្ទាប់ពីច្បាប់ស្តីពីការគ្រប់គ្រងអាស៊ីត ចេញនៅឆ្នាំ ២០១២ ។
បើធៀបប្រហែល ៣-៤ ឆ្នាំមុន មុនច្បាប់អាស៊ីតចេញមានជនរងគ្រោះជាង ៧០ នាក់ ហើយមកដល់ឆ្នាំនេះមានតែម្នាក់ទៅ ២ នាក់ប៉ុណ្ណោះ។ ការថយចុះនៃចំនួនជនរងគ្រោះ ឬការថយចុះនៃអំពើហិង្សាដោយការជះទឹកអាស៊ីតនេះគឺដោយសារប្រទេសកម្ពុជាមានច្បាប់ស្តីពីការគ្រប់គ្រងអាស៊ីតខ្លាំង។
លោកស្រីថ្លែងថា៖ «ច្បាប់នេះមានឥទ្ធិពលមែន ព្រោះអីគេដាក់បន្ទុកទៅលើអ្នកលក់អ្នកទិញដែរ។ បើសិនជាទិញ ឬក៏លក់អត់ច្បាប់ គឺគេពិន័យហើយ គេចាប់ដាក់គុកទៀត។ អ៊ីចឹងទៅធ្វើឱ្យមនុស្សខ្លាចអត់ហ៊ានយកទៅធ្វើអ្វីផ្តេសផ្តាសទេ។ មានដាក់ទណ្ឌកម្មជាទោសព្រហ្មទណ្ឌទៀតដែលអាចជាប់គុកពី ២០ ទៅ ២៥ ឆ្នាំឯណោះ»៕