.jpg)
ពលរដ្ឋតវ៉ាសុំអាជ្ញាធរជួយបើកទឹកឱ្យបានស្រោចស្រពដំណាំស្រូវពីថ្ងៃទី ៧ មិថុនា នៅខេត្តកំពង់ធំ។ រូប FB
កំពង់ធំៈ ប្រជាពលរដ្ឋ ២០០ គ្រួសារ ក្នុងឃុំសំព្រោច ស្រុកស្ទោង បារម្ភខ្លាចខូចដំណាំស្រូវបាននាំគ្នាតវ៉ាទៅអាជ្ញាធរខេត្តកំពង់ធំស្នើសុំជួយសម្រួល ដើម្បីបានបូមទឹកចេញពីប្រឡាយដាក់ចូលទៅក្នុងស្រែ ដែលកំពុងខ្វះខាតទឹក ខណៈមានពលរដ្ឋ ១០០ គ្រួសារផ្សេងទៀត កំពុងដេកយាមប្រឡាយ និងហាមពលរដ្ឋដែលតវ៉ានោះបូមទឹកយក។ ទោះយ៉ាងណា អាជ្ញាធរស្រុកអះអាងថា បញ្ហានេះត្រូវបានដោះស្រាយរួចរាល់ហើយ។
លោក ពេញ ពូល មេឃុំសំព្រោច ថ្លែងថា បន្ទាប់ពីមានភាពរាំងស្ងួតប្រជាពលរដ្ឋក៏មានការខ្វះខាតទឹកសម្រាប់ស្រោចស្រពដំណាំស្រូវ។ ហេតុដូច្នេះ ទើបប្រជាពលរដ្ឋទាំងនោះតវ៉ាសុំឱ្យមានការបូមទឹកចេញពីប្រឡាយ ក្រោយពីមានពលរដ្ឋចំនួន ១០០ គ្រួសារ បានឡើងទៅស្នើសុំឱ្យបើកទឹកចេញពីសំណង់ ៣០ កញ្ញា ដាក់ទៅក្នុងប្រឡាយសម្រាប់បូមដាក់ចូលក្នុងស្រែដែលកំពុងខ្វះខាតទឹក។
ទោះយ៉ាងណា លោកថា បន្ទាប់ពីពលរដ្ឋ ១០០ គ្រួសារ បានទៅស្នើសុំបើកទ្វារទឹកបានហើយ ពួកគេក៏បាននាំគ្នាទៅបិទលូតាមបណ្តោយប្រឡាយកុំឱ្យទឹកហូរបែកចេញមុនទៅដល់ដីស្រែពួកគាត់ដែលនៅខាងក្រោម។ ហេតុនេះទើបពួកគាត់ទៅដេកយាម និងហាមឃាត់ពលរដ្ឋមួយចំនួនផ្សេងទៀតបូមទឹកយក។
លោកបានថ្លែងថា៖ «ប្រជាពលរដ្ឋនៅក្នុងឃុំខ្ញុំមួយចំនួន គាត់ចាំតែបើកយកទឹក ឬក៏បូមយកទឹក ដោយមិនបានទៅចូលរួមស្នើសុំទឹកនោះទេ។ ដោយឡែក ពលរដ្ឋដែលទៅដេកយាម នោះស្នើសុំមកខ្ញុំ សុំកុំឱ្យមានប្រជាពលរដ្ឋណាបូមយកឱ្យសោះ ព្រោះទឹកដែលពួកគាត់ស្នើសុំនោះ ហូរមិនទាន់ដល់ដីស្រែរបស់ពួកគាត់»។
លោកមេឃុំសំព្រោច បានបន្តថា អាជ្ញាធរឃុំបានគិតគូរដល់ប្រជាពលរដ្ឋទាំងអស់នៅក្នុងឃុំ ប៉ុន្តែសុំឱ្យមានការយោគយល់អធ្យាស្រ័យគ្នា។ ព្រោះបើមានអ្នកឡើងមកយកទឹកផ្សេង ហើយមានអ្នកចាំយកទឹកផ្សេង ជាហេតុធ្វើឱ្យមានការប៉ះពាល់គ្នានាំឱ្យអ្នកឡើងទៅយកទឹកបែរជាមិនបានទឹក។ រីឯអ្នកដែលមិនបានឡើងទៅយកទឹក បែរជាបូមយកអស់នោះមិនមែនជាការល្អទេ ព្រោះទឹកមិនអាចហូរទៅដល់បានឡើយ ប្រសិនបើមិនមានអ្នកឡើងមកនាំទឹក។
លោកថ្លែងថា៖ «បើសិនជាពួកគាត់ឡើងមកដេកចាំនាំទឹកទៅដូចគ្នានោះវាលែងជាបញ្ហាទៀតហើយ ប៉ុន្តែពលរដ្ឋមួយចំនួនគាត់មិនព្រមឡើងមកទេ។ អ៊ីចឹងបើគាត់បូមនោះ ឯគ្នាដេកចាំ ចាំនៅឯណេះ វាអយុត្តិធម៌សម្រាប់ពួកគាត់ជាពលរដ្ឋមួយក្រុមទៀតដែលខំប្រឹងនាំទឹកទៅ»។
លោក ប៊ី ឆុន អាយុ ៤០ ឆ្នាំ ជាពលរដ្ឋនៅភូមិអំពៅព្រៃ ឃុំសំព្រោច ស្រុកស្ទោង ថ្លែងថា មានពលរដ្ឋចំនួន ២០០ គ្រួសារ ដែលមានដីស្រែនៅឆ្ងាយពីប្រឡាយបារម្ភខ្លាចខូចខាតដំណាំស្រូវ ខណៈមានការហាមឃាត់មិនឱ្យមានការបូមទឹកដាក់ស្រែ ទើបនាំគ្នាធ្វើការតវ៉ាបន្តបន្ទាប់រហូតដល់ថ្ងៃទី ៧ ខែមិថុនា។
លោកបាននិយាយថា៖ «ស្រូវពួកខ្ញុំនៅឃុំសំព្រោចនេះ មានការស្វិតច្រើន ដោយសារអត់មានភ្លៀង ហើយពេលគេនាំទឹកពីសំណង់ ៣០ កញ្ញាមក គេមិនឱ្យគ្នាយើងប្រើប្រាស់ទេ»។
ពលរដ្ឋរូបនោះបន្តថា៖ «ពេលពួកខ្ញុំកំពុងបូមទឹក គេមកបញ្ឈប់ រុញម៉ាស៊ីន រុញអីទម្លាក់ទឹក។ ពួកគាត់ ១ ឆ្នាំធ្វើស្រែ បាន ២ ទៅ ៣ ដង ហើយទឹកគាត់យករហូតដល់ពេលខ្វះទឹកពលរដ្ឋគ្នាបូមទឹកតិចតួចមកឃាត់»។
ប្រជាពលរដ្ឋម្នាក់ទៀតប្រាប់ ភ្នំពេញ ប៉ុស្តិ៍ ក្នុងលក្ខខណ្ឌសុំមិនឱ្យបញ្ចេញឈ្មោះកាលពីម្សិលមិញ ថាបន្ទាប់ពីរដ្ឋាភិបាលបានធ្វើប្រឡាយបេតុងនាំទឹក ប្រជាពលរដ្ឋមានទឹកសម្រាប់ស្រោចស្រពស្រែស្រូវបានយ៉ាងស្រួល។ ប៉ុន្តែបានរយៈ ១ ឆ្នាំក្រោយមក ក៏មានការកាយប្រឡាយបន្តពីប្រឡាយដែលរដ្ឋាភិបាលធ្វើហើយនោះ សម្រាប់ស្រោចស្រពដីស្រែនៅផ្នែកខាងក្រោមថែមទៀតដែលមានដីរាប់រយហិកតា ពីសំណាក់អ្នកមានលុយ។
ពលរដ្ឋរូបនេះថ្លែងថា៖ «នៅពេលពួកគាត់ឡើងទៅយកទឹក ហើយប្រជាពលរដ្ឋយើងសុំបូម សុំបង្ហូរតាមលូតិចតួច គាត់អត់ឱ្យទេ។ គាត់ថា យើងអត់ជួយឡើងទៅយកទឹកជួយអីឯណា ឯណី សុទ្ធតែថា គាត់ខំឡើងទៅយក។ ឯយើងនៅចាំតែបូមយកឯណេះ ប៉ុន្តែពេលគាត់ឡើងទៅយកអត់មានហៅពួកយើងទៅទេ»។
អ្នកនាំពាក្យរដ្ឋបាលខេត្តកំពង់ធំលោក យ៉ូវ សេងគុណ ប្រាប់ ភ្នំពេញ ប៉ុស្តិ៍ថា ជុំវិញបញ្ហានេះលោកនៅមិនទាន់ទទួលបានព័ត៌មានពេញលេញនៅឡើយទេ ព្រោះកំពុងរង់ចាំរបាយការណ៍ពីខាងអាជ្ញាធរស្រុកស្ទោង។ លោកបានថ្លែងថា៖ «ជុំវិញបញ្ហានេះ សូមលោកទាក់ទងទៅខាងអាជ្ញាធរស្រុក»។
លោក ណែត សារី អភិបាលស្រុកស្ទោងប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែមិថុនាថា ជុំវិញបញ្ហានេះ អាជ្ញាធរស្រុកបានចុះសម្របសម្រួលឱ្យប្រជាពលរដ្ឋបានទឹកប្រើប្រាស់ហើយ។
លោកបានថ្លែងថា៖ «មិនមែនមិនឱ្យប្រជាពលរដ្ឋប្រើប្រាស់ទេ ប៉ុន្តែត្រូវធ្វើការបែងចែកគ្នាបូមប្រើ។ មានន័យថា អ្នកណាដែលទៅនាំទឹក ឬបើកទ្វារទឹកបង្ហូរចេញមកហ្នឹងឱ្យគាត់ប្រើប្រាស់មុនទៅ។ អ្នកដែលមិនបានជួយបង្ហូរទឹក នាំទឹកហ្នឹងមកប្រើប្រាស់ក្រោយអ៊ីចឹងទៅ មានតែចែកគ្នាប្រើអ៊ីចឹង គ្រាន់តែមុន និងក្រោយទេ។ ឥឡូវនេះយើងបានសម្របសម្រួលហើយអស់ហើយ»៕
