ភ្នំពេញៈ អាជ្ញាធរខណ្ឌដូនពេញប្រកាសហាមឃាត់ការដាក់តាំងលក់រថយន្តនៅលើទ្រូងផ្លូវ និងចិញ្ចើមផ្លូវសាធារណៈក្នុងខណ្ឌដូនពេញទាំងមូល ដោយប្រាប់ឱ្យម្ចាស់រថយន្ត ត្រូវតែយករថយន្តចេញពីចិញ្ចើមផ្លូវចាប់ពីថ្ងៃទី ៨ ដល់ថ្ងៃទី ១២ មិថុនា ជាកំហិត ហើយបើក្នុងករណីមិនសហការនឹងចុះអនុវត្តវិធានការរដ្ឋបាល ដោយមិនទទួលខុសត្រូវលើការខូចខាត ឬបាត់បង់ឡើយ។
សេចក្តីជូនដំណឹងចុះថ្ងៃទី ៨ មិថុនា របស់លោក សុខ ពេញវុធ អភិបាលខណ្ឌដូនពេញអះអាងថា កន្លងមករដ្ឋបាលខណ្ឌដូនពេញបានចុះអនុវត្តការរៀបចំសណ្តាប់ធ្នាប់ និងរបៀបរៀបរយនៅលើទ្រូងផ្លូវ និងចិញ្ចើមផ្លូវសាធារណៈបានស្អាតជាប្រចាំ។
ប៉ុន្តែក្រោយពីបញ្ចប់ការបិទខ្ទប់រាជធានីភ្នំពេញ រដ្ឋបាលខណ្ឌ សង្កេតឃើញថា មានពលរដ្ឋមួយចំនួនតូចបានយករថយន្តមកដាក់តាំងលក់នៅលើទ្រូងផ្លូវ និងចិញ្ចើមផ្លូវសាធារណៈធ្វើឱ្យបាត់បង់សោភណភាព សណ្តាប់ធ្នាប់ របៀបរៀបរយសាធារណៈ និងបណ្តាលឱ្យមានការកកស្ទះចរាចរណ៍តាមដងផ្លូវយ៉ាងខ្លាំង។
រដ្ឋបាលខណ្ឌដូនពេញបញ្ជាក់ថា៖ «ដើម្បីរក្សាបាននូវសណ្ដាប់ធ្នាប់ របៀបរៀបរយ សោភណភាព និងជាប្រយោជន៍សាធារណៈ រដ្ឋបាលខណ្ឌដូនពេញសម្រេចដាក់ចេញជាគោលការណ៍មួយចំនួនដោយមិនអនុញ្ញាតឱ្យមានការដាក់តាំងលក់ និងចតរថយន្តគ្រប់ប្រភេទនៅលើទ្រូងផ្លូវ និងចិញ្ចើមផ្លូវសាធារណៈជាដាច់ខាតចាប់ពីពេលនេះតទៅ»។
ជាមួយគ្នានេះ រដ្ឋបាលខណ្ឌក៏បានទុករយៈពេលគិតចាប់ពីថ្ងៃជូនដំណឹងថ្ងៃទី ៨ ដល់ថ្ងៃទី ១២ ខែ មិថុនា ឆ្នាំ ២០២១ ដើម្បីឱ្យលោក លោកស្រីដែលជាម្ចាស់យករថយន្តចេញពីទីតាំងខាងលើនេះជាកំហិត។ ក្នុងករណី នៅតែមិនអនុវត្តតាមសេចក្តីជូនដំណឹងរបស់រដ្ឋបាលខណ្ឌដូនពេញទេ រដ្ឋបាលខណ្ឌដូនពេញនឹងចុះអនុវត្តវិធានការរដ្ឋបាល ដោយមិនទទួលខុសត្រូវរាល់ការខូចខាត បាត់បង់ទ្រព្យសម្បត្តិឡើយ។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិលើកឡើងថា ជាការពិត ការដាក់តាំងលក់រថយន្តលើចិញ្ចើម ឬទ្រូងផ្លូវសាធារណៈ គឺពិតជាបង្កឱ្យផ្លូវរួមតូចចង្អៀត និងឈានទៅដល់ភាពកកស្ទះចរាចរណ៍។
ការកកស្ទះចរាចរណ៍នេះលោក ថាមិនត្រឹមតែធ្វើឱ្យខាតបង់ពេលវេលា ផលិតភាពការងារ ថវិកា ដោយយានយន្តត្រូវប្រើប្រាស់ប្រេងឥន្ធនៈអស់ច្រើននោះទេ ក្រៅពីនេះ គឺមានការបំពុលបរិស្ថានដោយឧស្ម័ន CO2 ដែលបញ្ចេញពីយានយន្តផងដែរ។ រីឯអ្នកប្រើប្រាស់ផ្លូវវិញ ក៏អាចកើតនូវជំងឺស្ត្រេស ថប់អារម្មណ៍ កាត់បន្ថយ ភាពអត់ធ្មត់ និងធ្វើឱ្យប៉ះពាល់សុខភាពផ្នែកផ្សេងទៀត នៅពេលពួកគេជួបប្រទះនូវរំហូរដែលបង្កឱ្យមានការកកស្ទះលើដងផ្លូវនេះ។
លោក សុវណ្ណ ចង់ឱ្យរដ្ឋបាលខណ្ឌ គួរដាក់ចេញវិធានការ និងកំណត់ពេលវេលាឱ្យបានជាក់លាក់ ដើម្បីរៀបចំឱ្យប្រសើរឡើងនូវសណ្តាប់ធ្នាប់សាធារណៈក្នុងដែនសមត្ថកិច្ចរបស់ខ្លួន។ បើក្នុងករណីនៅតែបន្តមានរូបភាពល្មើសទាំងនេះធ្វើអាជីវកម្មបង្កឱ្យបាត់បង់នូវសណ្តាប់ធ្នាប់ និងប៉ះពាល់ប្រយោជន៍ និងសុខភាពសាធារណៈ ការដាក់វិន័យរដ្ឋបាល និងវិន័យម៉ឺងម៉ាត់របស់ថ្នាក់លើចំពោះរដ្ឋបាលខណ្ឌ ឬសង្កាត់នោះគួរត្រូវបានអនុវត្តជាគំរូ។
លោកបញ្ជាក់ថា៖ «ខ្ញុំជឿជាក់លើយន្តការរបស់រដ្ឋាភិបាលថាលោកពិតជានឹងធ្វើឱ្យបាន ព្រោះដើម្បីជាប្រយោជន៍សាធារណៈ សណ្តាប់ធ្នាប់ សោភណភាពទីក្រុង ឬតំបន់ប្រជុំជន ក៏ដូចជាអាចកាត់បន្ថយភាពកកស្ទះចរាចរណ៍បានមួយកម្រិតធំផងដែរ»៕
វីដេអូ៖