.jpg)
ផែនទីកំណត់តំបន់លឿងទុំ ក្នុងខណ្ឌពោធិ៍សែនជ័យ។ រូបថត រដ្ឋបាលរាជធានីភ្នំពេញ
ភ្នំពេញៈ រដ្ឋបាលរាជធានីភ្នំពេញសម្រេចកំណត់ផ្នែកខ្លះនៅភូមិចោមចៅ៣ នៃសង្កាត់ចោមចៅទី២ ផ្នែកខ្លះនៅភូមិត្រពាំងពោធិ៍ ភូមិព្រៃព្រីងខាងជើង និងភូមិជម្ពូវ័ន្តនៃសង្កាត់ចោមចៅទី៣ ខណ្ឌពៅធិ៍សែនជ័យទៅជា «តំបន់លឿងទុំ» ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
សេចក្តីជូនដំណឹងរបស់រដ្ឋបាលរាជធានីភ្នំពេញចុះថ្ងៃទី ៨ មិថុនា ដែល ភ្នំពេញ ប៉ុស្តិ៍ ទទួលបានម្សិលមិញបានឱ្យដឹងថា ការបិទខ្ទប់ធ្វើឡើងរយៈពេល ១៤ ថ្ងៃ គិតចាប់ពីម៉ោងសូន្យថ្ងៃទី ១០ ខែមិថុនាដល់ថ្ងៃទី ២៣ ខែ មិថុនា ឆ្នាំ ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
ក្នុងអំឡុងពេលបិទខ្ទប់នេះបុគ្គលគ្រប់រូបត្រូវបានហាមឃាត់មិនឱ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួនឡើយ។ ប៉ុន្តែការធ្វើដំណើរចេញក្រៅពីលំនៅឋាន ឬទីសំណាក់បច្ចុប្បន្នអាចត្រូវបានអនុញ្ញាតតែក្នុងករណីចាំបាច់បំផុតដូចជា ទៅប្រកបមុខរបរ ឬអាជីវកម្ម ការធ្វើដំណើរទៅក្រសួង ស្ថាប័នរដ្ឋ ការធ្វើដំណើរទៅកាន់ទីកន្លែងលក់ម្ហូបអាហារ កន្លែងលក់សម្ភារប្រើប្រាស់ប្រចាំថ្ងៃ មន្ទីរពេទ្យ មណ្ឌលសុខភាព និងការធ្វើដំណើររបស់អ្នកសារព័ត៌មានជាដើម។
សេចក្តីប្រកាសព័ត៌មានសរសេរថា «ត្រូវបានហាមឃាត់រាល់សកម្មភាពការងារ មុខរបរ ឬអាជីវកម្មទាំងអស់ ដែលមិនមែនជាតម្រូវការចាំបាច់ប្រចាំថ្ងៃ ប៉ុន្តែសកម្មភាពការងារមុខរបរ ឬអាជីវកម្ម អាចត្រូវបានអនុញ្ញាតក្នុងករណីចាំបាច់ ដូចជាការងាររបស់ស្ថាប័នសាធារណៈ រដ្ឋបាលរាជធានីភ្នំពេញ រដ្ឋបាលខណ្ឌទាំង ១៤ អាជ្ញាធរមូលដ្ឋាន គ្រប់លំដាប់ថ្នាក់ កងកម្លាំងប្រដាប់អាវុធ គ្រប់ប្រភេទព្រមទាំងមន្ត្រី និងបុគ្គលិកសុខាភិបាល។ រោងចក្រ សហគ្រាស សិប្បកម្ម ឬទីកន្លែងផលិតឱសថ និងសម្ភារបរិក្ខារពេទ្យ រួមទាំងម៉ាស់ អាល់កុល» ជាដើម។
អភិបាលរាជធានីភ្នំពេញលោក ឃួង ស្រេង បញ្ជាក់ក្នុងសេចក្តីប្រកាសព័ត៌មាននោះថា ពេលបិទខ្ទប់ត្រូវហាមឃាត់រាល់ការជួបជុំ ឬការប្រមូលផ្តុំមនុស្ស លើកលែងតែក្នុងករណីចាំបាច់ ដូចជា ការជួបជុំក្នុងចំណោមសមាជិកគ្រួសារ ដែលរស់នៅក្នុងលំនៅឋាន ឬទីសំណាក់ជាមួយគ្នា។
ការរៀបចំពិធីបុណ្យសព ដោយគោរពតាមការកំណត់របស់អាជ្ញាធរមានសមត្ថកិច្ច និងក្រោយពេលយកសំណាកសពទៅវិភាគរកកូវីដ ១៩ ដោយទទួលលទ្ធផលអវិជ្ជមាន ការជួបជុំរបស់អាជ្ញាធរមានសមត្ថកិច្ច និងមន្ត្រីសុខាភិបាលជាដើម។
លោក ឃួង ស្រេង បញ្ជាក់ក្នុងលិខិតថា «ត្រូវអនុវត្តបម្រាមគោចរនៅ «តំបន់លឿងទុំ» ដោយផ្អាកជាបណ្តោះអាសន្ននូវរាល់ការធ្វើចរាចរណ៍ និងរាល់សកម្មភាពការងារ មុខរបរ ឬអាជីវកម្ម នៅចន្លោះម៉ោង ២០ ដល់ម៉ោង ៣ លើកលែងតែករណីចាំបាច់»។
ដោយឡែកទីកន្លែងលក់ដូរគ្រឿងឧបភោគបរិភោគ និងភោជនីយដ្ឋាន អាហារដ្ឋានត្រូវលក់ដូរជាលក្ខណៈវេចខ្ចប់ ហើយអាជ្ញាធរមូលដ្ឋាន និងមន្ទីរអង្គភាពជំនាញពាក់ព័ន្ធត្រូវរឹតបន្តឹង និងពិនិត្យនៅតាមទីកន្លែងទាំងនោះ និងត្រូវហាមឃាត់មិនឱ្យបើកដំណើរការចំពោះផ្សារមិនរៀបរយ ឬទីតាំងណាដែលមានហានិភ័យខ្ពស់ក្នុងការចម្លង និងឆ្លងរាលដាលនៃជំងឺកូវីដ ១៩។
ចំពោះបុគ្គល ឬនីតិបុគ្គលទាំងឡាយណាដែលបំពានវិធានការនេះនឹងត្រូវអនុវត្តវិធានការច្បាប់យ៉ាងម៉ឺងម៉ាត់ ដោយរួមទាំងការឃាត់ទុក ជាបណ្តោះអាសន្ននូវមធ្យោបាយធ្វើដំណើរ និងទណ្ឌកម្មរដ្ឋបាល ដោយអនុលោមតាមបទប្បញ្ញត្តិ និងនីតិវិធីជាធរមាន។
ចៅសង្កាត់ចោមចៅទី ២ លោក វ៉ា សារ៉ង បានថ្លែងថា នៅសង្កាត់លោកបានបិទផ្ទះជួលនៅផ្សារកាណាស៊ីតធីដែលមាន ៤៩៧ បន្ទប់ បន្ទាប់ពីបានរកឃើញអ្នកជំងឺកូវីដ- ១៩ ចំនួន ៣៥២ នាក់ក្នុងចំណោមកម្មកររោងចក្រមីងដា ៣ ៧០៣ នាក់។
លោកថា៖ «នៅថ្ងៃនេះយើងបានបញ្ជូនអ្នកជំងឺដែលរកឃើញទៅព្យាបាលអស់ហើយ។ ដោយឡែកករណីពិនិត្យលើកទី ១ មិនឃើញមានជំងឺកូវីដ ១៩ យើងធ្វើការបិទខ្ទប់ទីតាំងគាត់ ប៉ុន្តែយើងដាក់កម្លាំងឃ្លាំមើល ២៤ ម៉ោង បើគាត់មិនស្រួលខ្លួនយើងនឹងហៅឡានពេទ្យមកជាបន្ទាន់ ដើម្បីសង្គ្រោះគាត់ចេញកុំឱ្យមានការឆ្លងតគ្នា» ។
លោក សុទ្ធ សុខជាតិ ចៅសង្កាត់រងចោមចៅទី៣ បានថ្លែងថា ក្រោយពីគ្រូពេទ្យជំនាញបានរកឃើញអ្នកឆ្លងជំងឺកូវីដ ១៩ កើនឡើងនៅរោងចក្រ QMI ក្នុងភូមិត្រពាំងពោធិ៍ សង្កាត់ចោមចៅទី ៣ អាជ្ញាធរសម្រេចបិទខ្ទប់ រោងចក្រ និងផ្សារត្រពាំងពោធិ៍ បណ្តោះអាសន្នដើម្បីទប់ស្កាត់ការឆ្លងរីករាលដាល។ លោកថា៖ «អ្នកដែលត្រូវយកសំណាកចំនួន ៣ ៨៨០ នាក់ និងរកឃើញវិជ្ជមានចំនួន ៣០២ នាក់» ។
ដោយឡែកនៅខេត្តសៀមរាបលោក លីវ សុខុន ប្រធានមន្ទីរព័ត៌មានខេត្តនេះថា អាជ្ញាធរខេត្តបានចុះផាកពិន័យអាជីវករក្នុងផ្សារលើធំថ្មីដែលមិនបានពាក់ម៉ាស់ត្រឹមត្រូវ។ លោកថា៖ «យើងបានផាកពិន័យមនុស្សស ៣១ នាក់ក្នុងនោះ ១៤ នាក់បានបង់លុយនៅនឹងកន្លែង ឯ ១៧ នាក់ទៀតយើងធ្វើវិក្កយបត្រទុកពេលឱ្យគាត់ទៅបង់នៅមន្ទីរសុខាភិបាលខេត្ត ព្រោះពេលនោះគាត់អត់មានលុយបង់»។
ប្រធានមន្ទីរបញ្ជាក់ថា ជាមួយការចុះផាកពិន័យពាក់ម៉ាស់ មិនបានត្រឹមត្រូវនេះ អាជ្ញាធរបានណែនាំបន្ថែមពាក់ព័ន្ធក្នុងការរក្សាគម្លាត និងអំពាវនាវពលរដ្ឋឱ្យអនុវត្តនូវវិធានការ «៣ការពារ និង៣កុំ» ឱ្យបានគ្រប់ៗគ្នា។ លោកថា ចំពោះការផាកពិន័យនឹងបន្តចុះថែមទៀត ប៉ុន្តែមិនទាន់អាចកំណត់ពេលវេលានោះទេ៕
