ភ្នំពេញៈ អភិបាលរាជធានីភ្នំពេញ លោក ឃួង ស្រេង ស្នើក្រសួងការងារ និងបណ្តុះបណ្តាលវិជ្ជាជីវៈ ចេញសេចក្តីជូនដំណឹងមួយទៅម្ចាស់រោងចក្រសហគ្រាសនានានៅរាជធានី ឱ្យធ្វើបច្ចុប្បន្នភាពបញ្ជីស្នាក់នៅរបស់កម្មករ កម្មការិនី ឱ្យបានច្បាស់លាស់ ដើម្បីងាយគ្រប់គ្រងទៅលើកម្មករ ក្នុងអំឡុងពេលឆ្លងរីករាលដាលជំងឺកូវីដ ១៩ ។
ការស្នើឡើងរបស់លោក ឃួង ស្រេង បានធ្វើឡើងក្នុងកិច្ចប្រជុំកាលពីថ្ងៃទី ៨ ខែមិថុនា តាមរយៈ video conference ដោយមានការចូលរួមពីថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ ក្រសួងសុខាភិបាល និងអាជ្ញាធរខណ្ឌទាំង ១៤ ចំណុះឱ្យរដ្ឋបាលរាជធានីភ្នំពេញ។ នេះបើតាមការផ្សព្វផ្សាយរបស់រដ្ឋបាលរាជធានីភ្នំពេញ នៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី ៨ មិថុនា។
រដ្ឋបាលរាជធានីភ្នំពេញបញ្ជាក់ថា៖ «កិច្ចប្រជុំនេះ ដើម្បីស្វែងរកដំណោះស្រាយ និងបច្ចេកទេសការធ្វើបច្ចុប្បន្នភាពរបស់បងប្អូនកម្មករ-កម្មការិនីរស់នៅ ដែលបង្កភាពងាយស្រួលក្នុងការគ្រប់គ្រងក្នុងការទប់ស្កាត់ការឆ្លងរាលដាលនៃជំងឺកូវីដ ១៩ តាមរោងចក្រ តាមបន្ទប់ជួល ដែលបងប្អូនកម្មករ-កម្មការិនីរស់នៅទាំងអស់ក្នុងរាជធានីភ្នំពេញ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញមិនអាចសុំអត្ថាធិប្បាយជុំវិញសំណើនេះបានទេ នៅថ្ងៃទី ៩ ខែមិថុនា ដោយទូរស័ព្ទមិនមានការឆ្លើយតប។
ប៉ុន្តែបើតាមប្រសាសន៍របស់លោក ឃួង ស្រេង ដែលត្រូវបានប្រព័ន្ធផ្សព្វផ្សាយដកស្រង់ក្នុងកិច្ចប្រជុំនោះថា៖ «ក្នុងរយៈពេល ១ ខែចុងក្រោយនេះស្ថានភាពជំងឺកូវីដ ១៩ ឃើញថា មិនមានការថមថយនៅឡើយទេ ហើយអ្នកដែលមានវិជ្ជមានកូវីដ ១៩ ក្នុងរយៈពេលចុងក្រោយនេះដែរ ភាគច្រើនជាបងប្អូនកម្មករ-កម្មការិនីដែលបម្រើនៅតាមបណ្តារោងចក្រនានានៅក្នុងរាជធានីភ្នំពេញ»។
ដូច្នេះការស្នើទៅក្រសួងការងារ និងបណ្ដុះបណ្ដាលវិជ្ជាជីវៈឱ្យចេញជាសេចក្តីជូនដំណឹងមួយទៅម្ចាស់រោងចក្រសហគ្រាសក្នុងរាជធានីភ្នំពេញធ្វើជាបញ្ជីស្នាក់នៅរបស់កម្មករឱ្យបានច្បាស់លាស់ ដើម្បីអាចគ្រប់គ្រងកម្មករទាំងនោះ បាន និងឈានទៅដល់ការកាត់ផ្ដាច់បាននូវការរីករាលដាលនៃជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ។
ក្រៅពីនេះ លោក ឃួង ស្រេង ក៏បានជំរុញ និងធ្វើការណែនាំដល់អាជ្ញាធរខណ្ឌទាំង ១៤ ឱ្យត្រៀមលក្ខណៈដើម្បីចូលរួមសហការ និងធ្វើការងារនេះព្រមៗគ្នាជាមួយក្រសួងការងារ ក្រោយសេចក្តីជូនដំណឹងរបស់ក្រសួងការងារចេញជាផ្លូវការផងដែរ ដើម្បីអាចសហការធ្វើការងារនេះបានលឿន និងមានប្រសិទ្ធភាពជាមួយម្ចាស់រោងចក្រ។
លោក ឃួង ស្រេង បញ្ជាក់ថា៖ «ចំពោះការងារនេះត្រូវតែធ្វើឡើងដោយលម្អិត មានទាំងលិខិតបត្ររបស់កម្មករ ឈ្មោះ ទីកន្លែងស្នាក់នៅច្បាស់លាស់ ដោយភ្ជាប់មកជាមួយនឹងរូបថត ៤ គុណនឹង ៦ ផងដែរ មានន័យថា មានបញ្ហា យើងអាចឈានទៅកាត់ផ្តាច់ឫសគល់នៃជំងឺកូវីដ ១៩ នេះបាន»។
លោក ហេង សួរ អ្នកនាំពាក្យក្រសួងការងារកាលពីថ្ងៃទី ៩ មិថុនា ក៏មិនអាចទាក់ទងសុំអត្ថាធិប្បាយបានដែរជុំវិញការចេញសេចក្តីជូនដំណឹងទៅកាន់ម្ចាស់រោងចក្រសហគ្រាសនេះ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា ប្រាប់ភ្នំពេញប៉ុស្តិ៍នៅថ្ងៃទី ៩ មិថុនា ថា សមាគមនឹងធ្វើការផ្សព្វផ្សាយ និងណែនាំបន្តទៅបណ្តារោងចក្រដែលជាសមាជិកអំពីព័ត៌មាននេះ ប្រសិនបើក្រសួងបានចេញសេចក្តីណែនាំណាមួយពាក់ព័ន្ធនឹងការធ្វើបច្ចុប្បន្នភាពបញ្ជីស្នាក់នៅរបស់កម្មករ-កម្មការិនី។
លោកប្រាប់ថា៖ «រហូតមកដល់ពេលនេះ បណ្តារោងចក្រមានបញ្ជីស្នាក់នៅរបស់កម្មករ-កម្មការិនីរួចហើយនៅក្នុងរោងចក្រនីមួយៗ។ ប៉ុន្តែការរក្សាវា ឱ្យមានបច្ចុប្បន្នភាពជារៀងរាល់ខែនោះអាចជាការងាររដ្ឋបាលមួយដែលលំបាកសម្រាប់បុគ្គលិករោងចក្រយើង»៕