.jpg)
ទិដ្ឋភាពព្រៃឡង់ថតពីលើ។ រូបថត USAID
ព្រះវិហារៈ គម្រោង USAID ព្រៃឡង់បៃតងកំពុងរៀបចំគម្រោង រេដបូកដែលនឹងផ្តល់ហិរញ្ញប្បទានប្រកបដោយនិរន្តរភាពសម្រាប់តំបន់ការពារធម្មជាតិចំនួន ៤ នៅខេត្តព្រះវិហារ ហើយគម្រោងនេះនឹងរៀបចំការពិគ្រោះយោបល់ស្តីពីការព្រមព្រៀងដោយសេរីជាមុន និងផ្តល់ព័ត៌មាន (FPIC) ជាមួយភូមិ ៥១ ។ នេះបើតាម USAID ព្រៃឡង់បៃតង។
ការអះអាងនេះបានធ្វើឡើងនៅលើទំព័រហ្វេសប៊ុករបស់ USAID ព្រៃឡង់បៃតងកាលពីថ្ងៃទី ៨ ខែមិថុនា បន្ទាប់ពីកិច្ចប្រជុំពិគ្រោះយោបល់របស់ភាគីពាក់ព័ន្ធរវាងអាជ្ញាធរជាតិ និងអាជ្ញាធរមូលដ្ឋានត្រូវបានបណ្តុះបណ្តាលលើគោលការណ៍ FPIC ពីតួនាទី និងការទទួលខុសត្រូវរបស់ពួកគេត្រូវបានបញ្ចប់ពីពេលថ្មីៗនេះ។
តាមទំព័រហ្វេសប៊ុករបស់ USAID ព្រៃឡង់បៃតងឱ្យដឹងថា គម្រោង USAID ព្រៃឡង់បៃតងនឹងរៀបចំការពិគ្រោះយោបល់ FPIC ក្នុងភូមិចំនួន ៥១ ដែលស្ថិតក្នុងតំបន់គម្រោងរេដបូកនេះ ហើយខ្លួនក៏កំពុងរៀបចំគម្រោងរេដបូក ដែលនឹងផ្តល់ហិរញ្ញប្បទានប្រកបដោយនិរន្តរភាពសម្រាប់តំបន់ការពារធម្មជាតិចំនួន ៤ នៅខេត្តព្រះវិហារផងដែរ។
ការផ្តល់ហិរញ្ញប្បទានប្រកបដោយនិរន្តរភាពសម្រាប់តំបន់ការពារធម្មជាតិចំនួន ៤ នេះ គឺក្នុងចំណោមភូមិចំនួន ៥១ ដែលស្ថិតក្នុង និងជុំវិញដែនជម្រកសត្វព្រៃគូលែនព្រហ្មទេព ព្រះរកា ឆែប និងឧទ្យានបេតិកភណ្ឌធម្មជាតិភ្នំត្បែង។ នេះបើតាមការអះអាងរបស់ស្ថាប័ននេះ។
USAID ព្រៃឡង់បៃតងបញ្ជាក់ថា៖ «នៅពេលដែលព្រៃឈើត្រូវបានរក្សាឱ្យនៅគង់វង្ស យើងអាចទទួលបានមកវិញនូវហិរញ្ញវត្ថុ តាមរយៈការលក់កាបូន។ ការលក់ កាបូនមិនត្រឹមតែផ្តល់នូវអត្ថប្រយោជន៍រួមដល់ប្រជាសហគមន៍ទេ វាថែមទាំងផ្តល់ជាហិរញ្ញវត្ថុសម្រាប់ប្រើប្រាស់ដើម្បីអភិរក្សតំបន់ការពារធម្មជាតិ»។
ជាមួយគ្នានេះ USAID ព្រៃឡង់បៃតងបាននិយាយទៀតថា គម្រោងរេដបូក និងការលក់កាបូនព្រៃឈើអាចដំណើរការទៅបាន លុះត្រាតែមានការយល់ដឹងដោយគ្រប់ភាគីពាក់ព័ន្ធអំពីអ្វីដែលគម្រោងរេដបូកនឹងធ្វើ ហើយថា តើពួកគេអាចចូលរួមបានដោយរបៀបណា?
ដូច្នេះអ្វីដែលសំខាន់បំផុតនោះ គឺសហគមន៍ត្រូវតែទទួលបានឱកាសដើម្បីស្វែងយល់អំពីគម្រោងរេដបូកតាមរយៈគោលការណ៍មួយដែលមានឈ្មោះថា ការព្រមព្រៀងដោយសេរីជាមុន និងផ្តល់ព័ត៌មាន (FPIC)។
លោក ឈុន ឌឺលុច ប្រធានគម្រោងរេដបូកទំរីងនៃរដ្ឋបាលព្រៃឈើកម្ពុជា ដែលកំពុងដឹកនាំអនុវត្តគម្រោងរេដបូកក្នុងតំបន់ព្រៃឡង់ កត់សម្គាល់ឃើញថា ការប្រកាសពីគម្រោងរេដបូកដែលនឹងផ្តល់ហិរញ្ញប្បទានប្រកបដោយនិរន្តរភាពសម្រាប់តំបន់ការពារធម្មជាតិនៅខេត្តព្រះវិហារនេះនាពេលកន្លងមកគឺមានការប្រកាសច្រើន។ ប៉ុន្តែចំពោះសកម្មភាពជាក់ស្តែងយ៉ាងណានោះ លោកហាក់មិនសូវច្បាស់នោះទេ។
លោកបញ្ជាក់ថា៖ «ឃើញតែមានការប្រកាសពីគំនិតផ្តួចផ្តើមជុំវិញបញ្ហាច្រើននេះ ប៉ុន្តែមិនទាន់មានឯកសារផ្លូវការណាពីរដ្ឋាភិបាលឱ្យអនុម័តពីគម្រោងរេដបូកនេះជាផ្លូវការនោះទេ។ ការប្រកាសនេះ គ្រាន់ជាគម្រោងមួយៗរបស់អង្គការទាំងនោះ ដើម្បីជាមូលដ្ឋានរបស់គាត់ប៉ុណ្ណោះ»។
ទោះយ៉ាងណា លោក ឈុន ឌឺលុច បានបន្ថែមថា ប្រសិនជាគម្រោងដែលកំពុងរៀបចំនេះអាចលេចជារូបរាងពិតមែននោះពិតជាចូលរួមចំណែកការពារបរិស្ថាន ជាពិសេសជួយដល់ប្រជាសហគមន៍ក្នុងតំបន់ទាំងនោះបានច្រើន។
ជាពិសេសនោះលោកចាត់ទុកគ្រប់គម្រោងរេដបូកទាំងអស់ គឺសុទ្ធតែមានគោលដៅក្នុងការកាត់បន្ថយភាពសឹករេចរឹលនៃព្រៃឈើ។ លោកថា បើសិនការសិក្សាពីផលចំណេញនៃការវិនិយោគមានលក្ខណៈតិចជាងការវិនិយោគ នោះគួរតែធ្វើការពិចារណាជាថ្មី៕
