បាត់ដំបងៈ គ្រាប់យុទ្ធភណ្ឌមិនទាន់ផ្ទុះចំនួនជាង ៥០០ គ្រាប់ ត្រូវបានប្រជាពលរដ្ឋម្នាក់ប្រទះឃើញកាលពីថ្ងៃទី ៨ មិថុនា នៅតាមមាត់ច្រាំងស្ទឹងសង្កែ ក្នុងភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង ខណៈគាត់កំពុងចេញទៅនេសាទ ហើយបានរាយការណ៍ប្រាប់សមត្ថកិច្ច។
លោក សន និល អធិការនគរបាលស្រុករតនមណ្ឌលប្រាប់ ភ្នំពេញ ប៉ុស្តិ៍ កាលពីម្សិលមិញថា បន្ទាប់ពីទទួលបានព័ត៌មាននេះភ្លាមលោកបានបញ្ជាទៅកម្លាំងនគរបាលប៉ុស្តិ៍ ឃុំផ្លូវមាស ឱ្យចុះទៅការពារ និងបានរាយការណ៍ទៅអង្គភាពស៊ីម៉ាក់ប្រចាំនៅខេត្តបាត់ដំបងឱ្យមកបន្សាប និងយកចេញពីតំបន់នេះ ដើម្បីធ្វើយ៉ាងណាឱ្យមានសុវត្ថិភាពជូនប្រជាពលរដ្ឋ។
លោកថ្លែងថា ការងារនេះក្រុមមន្ត្រីនគរបាលបានយាមកាមក៏ដូចជា ដាក់បារ៉ាស់ និងផ្សព្វផ្សាយដល់ប្រជាពលរដ្ឋដែលរស់នៅតំបន់នេះកុំឱ្យមកកាន់ទីតាំងដែលមានគ្រាប់នេះ ក្រែងលោមានគ្រោះថ្នាក់។
បើតាមលោក សន និល គ្រាប់ទាំងនេះត្រូវបានប្រទះឃើញកាលពីថ្ងៃទី ៨ ខែមិថុនា ដោយប្រជាពលរដ្ឋឈ្មោះ យ៉ាវ យូន ភេទប្រុស អាយុ ៤៣ ឆ្នាំ រស់នៅភូមិផ្លូវមាស ឃុំផ្លូវមាស ស្រុករតនមណ្ឌល ខណៈដែលរូបគាត់បានចេញដាក់មងត្រីក្នុងដងស្ទឹងសង្កែ។
លោកអធិការបានឱ្យដឹងថា គ្រាប់យុទ្ធភណ្ឌមិនទាន់ផ្ទុះនេះមានប្រភេទ គ្រាប់មីនប្រភេទ 72A ចំនួន ៣៦ គ្រាប់ គ្រាប់កាំភ្លើងប្រភេទ B40 ចំនួន ៣ គ្រាប់ និងគ្រាប់កាំភ្លើងប្រភេទ K57 ចំនួន ៥០០ គ្រាប់ ។ «គ្រាប់មីនទាំង ៣៦ គ្រាប់នេះ មានមួយចំនួនហាក់នៅមានប្រសិទ្ធភាពក្នុងការបំផ្ទុះបានបើទោះបីជាវាកប់ក្នុងដីរយៈពេលយូរឆ្នាំមកហើយក្តី រីឯគ្រាប់កាំភ្លើងទាំង ២ ប្រភេទទៀតមានសភាពច្រែះចាប់អស់ហើយ»។
លោក សន និល បញ្ជាក់ថា នៅចំណុចដែលប្រជាពលរដ្ឋប្រទះឃើញយុទ្ធភណ្ឌមិនទាន់ផ្ទុះទាំងនេះកាលពីសម័យសង្គ្រាមគឺជាតំបន់សមរភូមិប្រយុទ្ធដ៏ស្រួចស្រាល់មួយក្នុងចំណោមចំណុចផ្សេងទៀតក្នុងស្រុករតនមណ្ឌល ហើយយុទ្ធភណ្ឌទាំងនេះអាចជារបស់កងទ័ពក្នុងសម័យនោះ ដែលបានរក្សាទុកសម្រាប់ប្រើប្រាស់ក្នុងសកម្មភាពប្រយុទ្ធ។
ប៉ុន្តែនៅពេលក្រោយមកយុទ្ធភណ្ឌទាំងនេះបានកប់ទៅក្នុងដីនៅគុម្ពឫស្សីជិតមាត់ស្ទឹង ហើយក្នុងប៉ុន្មានថ្ងៃនេះនៅចំណុចនោះមានភ្លៀងធ្លាក់ខ្លាំងមានទឹកហូរច្រោះដីជាហេតុធ្វើឱ្យយុទ្ធភណ្ឌទាំងនេះផុសចេញមកពីគុម្ពឫស្សីទើបប្រជាពលរដ្ឋប្រទះឃើញ ហើយរាយការណ៍ជូនសមត្ថកិច្ច។
បើតាមលោក សន និល កាលពីថ្ងៃទី ៤ ខែមិថុនា ឆ្នាំ ២០២១ កន្លងទៅក៏មានប្រជាពលរដ្ឋធ្លាប់បានរាយការណ៍ប្រាប់សមត្ថកិច្ចនគរបាលស្រុករតនមណ្ឌលពីករណីប្រទះឃើញគ្រាប់មីនប្រភេទ 72A ចំនួន ១២ គ្រាប់ម្តងផងដែរ បន្ទាប់ពីពួកគាត់បានប្រទះឃើញ ខណៈកំពុងភ្ជួរដីក្នុងចម្ការរបស់គាត់នៅចំណុចភូមិជីប៉ាង ឃុំផ្លូវមាស ស្រុករតនមណ្ឌល ខេត្តបាត់ដំបង។
លោក ព្រីង បញ្ញារិទ្ធិ ប្រធានអង្គភាពកំចាត់មីនទី ២ ប្រចាំខេត្តបាត់ដំបង បានឱ្យដឹងថា លោកបានបញ្ជូនកម្លាំងទៅដោះបន្សាប និងប្រមូលគ្រាប់ទាំងនោះហើយ បន្ទាប់ពីទទួលបានព័ត៌មាននេះ។
លោកថា មិនមែនតែ ១ កន្លែងនេះទេ នៅឯចំណុចឃុំឃ្លាំងមាស ស្រុកបវេល ខេត្តបាត់ដំបងឯណោះ ក៏មានប្រជាពលរដ្ឋបានប្រទះឃើញហើយរាយការណ៍ជូនសមត្ថកិច្ចដែរ ដោយគ្រាប់នោះផុសឡើង បន្ទាប់ពីទឹកស្ទឹងបានស្រកចុះ។
ទោះបីជាយ៉ាងណា លោក ព្រីង បញ្ញារិទ្ធិ មិនទាន់ដឹងថាគ្រាប់យុទ្ធភណ្ឌមិនទាន់ផ្ទុះនោះមានចំនួនប៉ុន្មាននោះទេ ខណៈមន្ត្រីរបស់លោកកំពុងតែចុះទៅដោះបន្សាបនៅទីនោះ។
ចំណែកនៅឃុំស៊ុង ស្រុកសំឡូតកាលពីប៉ុន្មានថ្ងៃមុនក៏មានប្រជាកសិករប្រទះឃើញគ្រាប់មីនមិនទាន់ផ្ទុះមួយចំនួនផងដែរនៅពេលគាត់កំពុងភ្ជួរស្រែ ប៉ុន្តែសំណាងល្អមិនមានផ្ទុះហើយត្រូវបានកម្លាំងស៊ីម៉ាក់ទៅដោះបន្សាបរួចហើយ។
លោកបានបញ្ជាក់ថា៖ «គ្រាប់យុទ្ធភណ្ឌមិនទាន់ផ្ទុះទាំងនេះបានបន្សល់ពីសម័យសង្គ្រាមដោយកម្លាំងទាហានយកទៅកប់ចោល ហើយឥឡូវបាត់ម្ចាស់វាទើបផុសចេញមកដែលភាគច្រើនស្ថិតនៅស្រុកសំឡូត និងគាស់ក្រឡនៃខេត្តបាត់ដំបងដោយមានការប្រទះឃើញ និងគ្រោះថ្នាក់ច្រើនជាងគេ»៕