.jpg)
ផែនទីកម្រិតថ្នាក់តំបន់ដែលនៅតែបន្តឆ្លងជំងឺកូវីដ ១៩។ រូបថត រដ្ឋបាលខេត្តសៀមរាប
ភ្នំពេញៈ អាជ្ញាធរមូលដ្ឋានក្នុងតំបន់មួយចំនួន នៅក្នុងរាជធានីភ្នំពេញ ខេត្តសៀមរាប និងបន្ទាយមានជ័យ បានបន្តដាក់ចេញនូវវិធានសុខាភិបាលបង្ការនិងទប់ស្កាត់ការឆ្លងកូវីដ ១៩ ដោយធ្វើសំណាក និងបន្តកំណត់កម្រិតបិទខ្ទប់តំបន់ដែលបានរកឃើញវិជ្ជមាននៃការឆ្លង។
លោក ជឹម ស៊ីថា អធិការនគរបាលខណ្ឌដង្កោ បានប្រាប់ ភ្នំពេញ ប៉ុស្តិ៍ នៅថ្ងៃទី ១០ មិថុនាថា កាលពីយប់ថ្ងៃទី ៩ មិថុនា ក្រុមគ្រូពេទ្យ បានចុះយកសំណាកកម្មករទាំងអស់ នៅក្នុងរោងចក្រ Fortress International ដែលស្ថិតនៅខណ្ឌដង្កោ រាជធានីភ្នំពេញ ក្នុងនោះមានកម្មករប្រមាណជា១ពាន់នាក់ដែលបានយកសំណាកលើកទី១ ដោយអវិជ្ជមានកូវីដ ១៩ បានបង្កភាពអនាធិបតេយ្យ មិនស្តាប់ការណែនាំរបស់ក្រុមគ្រូពេទ្យ និងអាជ្ញាធរបាននាំគ្នារត់ចេញពីរោងចក្រ។
លោក ស៊ីថា បានអះអាងថា មានកម្មករជាច្រើន ដែលបានយកសំណាករួច និងមានលទ្ធផលអវិជ្ជមាន ហើយបានសុំឲ្យក្រុមគ្រូពេទ្យវាយត្រាបញ្ជាក់ថា ពួកគាត់បានយកសំណាករួច ប៉ុន្តែក្រុមគ្រូពេទ្យបានបដិសេធដោយបកស្រាយថា ទាល់តែធ្វើតេស្តលើកទី២ ទើបក្រុមគ្រូពេទ្យអាចបញ្ជាក់បាន។
លោក ជឹម ស៊ីថា បានថ្លែងថា៖ «ពួកគាត់ ដែលរត់ចេញពីរោងចក្រនេះ គឺជាកម្មករដែលបានយកសំណាកហើយ។ ក្រោយសម្រុកចេញនោះមក ឃើញថានៅព្រឹកថ្ងៃទី ១០ កម្មករទាំងនោះ បានចូលធ្វើការធម្មតាវិញហើយ។ អាជ្ញធរយើង ក៏បានចុះអប់រំ និងណែនាំពួកគាត់រួចហើយថា កុំឲ្យធ្វើបែបនេះបន្តទៀត»។
បើតាមលោក ជឹម ស៊ីថា ការយកសំណាកចំពោះកម្មករកម្មារិនីនៅក្នុងរោចចក្រនេះ បានធ្វើឡើងបន្ទាប់ពីមានការរកឃើញថា មានកម្មករក្នុងរោងចក្រមួយចំនួនតូច បានឆ្លងជំងឺកូវីដ១៩ ហើយនៅថ្ងៃទី ១១ មិថុនា ក្រោយកម្មករទាំងអស់រក្សាភាពស្ងៀមស្ងាត់នោះ ក្រុមគ្រូពេទ្យ នឹងបន្តចុះមកយកសំណាកកម្មករជាបន្តទៀត ខណៈកម្មករសរុបក្នុងរោងចក្រនេះ មានប្រមាណ ២ ពាន់នាក់។
ពាក់ព័ន្ធនឹងជំងឺកូវីដ ១៩ នេះដែរ រដ្ឋបាលខេត្តសៀមរាប បានសម្រេចដាក់ភូមិសាស្ត្រមួយចំនួនក្នុងស្រុកសូទ្រនិគម និងស្រុកជីក្រែង ជាតំបន់ក្រហម តំបន់លឿងទុំ និងលឿង បន្ទាប់ពីមានការឆ្លងរីករាលដាលខ្លាំង ក្រោយផ្ទុះចេញពីករណីជួបជុំរបស់មន្ត្រីអាជ្ញាធរ កាលពីពេលថ្មីៗនេះ។
សេចក្ដីសម្រេចរបស់រដ្ឋបាលខេត្តសៀមរាប ចុះថ្ងៃទី ៩ ខែមិថុនា បានឲ្យដឹងថា រដ្ឋបាលខេត្ត បានសម្រេចបិទខ្ទប់ភូមិសាស្ដ្រដែលមានការឆ្លងរាលដាលនៃជំងឺកូវីដ ១៩ ជាបណ្ដោះអាសន្នរយៈពេល ២សប្ដាហ៍ គឺចាប់ពីថ្ងៃទី ៩ ដល់ថ្ងៃទី ២២ ខែមិថុនា ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ នៅក្នុងសហគមន៍ស្រុកសូទ្រនិគម និងស្រុកជីក្រែង។
រដ្ឋបាលខេត្តសៀមរាបបានបញ្ជាក់ថា៖ «ចំពោះការកំណត់តំបន់ក្រហម គឺធ្វើឡើងនៅក្នុងភូមិសាស្ដ្រឃុំកំពង់ឃ្លាំង ស្រុកសូទ្រនិគម ចំណែកភូមិសាស្ត្រ ដែលត្រូវបានកំណត់ជាតំបន់លឿងទុំ គឺស្ថិតក្នុងឃុំគោកធ្លកក្រោម ស្រុកជីក្រែង ហើយឃុំកំពង់ក្ដី ស្រុកជីក្រែង ខេត្តសៀមរាប ត្រូវបានកំណត់ជាតំបន់លឿង»។
ការផ្ទុះការឆ្លងរាលដាលជំងឺកូវីដ ១៩ ក្នុងសហគមន៍ស្រុកសូទ្រនិគម និងស្រុកជីក្រែងរហូតកំណត់ជាតំបន់បិទខ្ទប់នេះត្រូវបានរដ្ឋបាលខេត្ត អះអាងថា កើតឡើងដោយសារមានការជួបជុំមិនចាំបាច់មួយ ដោយអាជ្ញាធរមូលដ្ឋាន នៅក្នុងភោជនីយដ្ឋានពិភពធម្មជាតិ ដែលក្នុងនោះមានអធិការស្រុកសូទ្រនិគម សមាជិកក្រុមប្រឹក្សាស្រុក មេឃុំកំពង់ឃ្លាំង និងមានអ្នកចូលរួមជាច្រើនទៀត ត្រូវបានរកឃើញថា មានករណីវិជ្ជមានកូវីដ ១៩ ជាបន្តបន្ទាប់។
ជាមួយនឹងការផ្ទុះឡើងនេះ រដ្ឋបាលខេត្ត បានសម្រេចយកវិទ្យាល័យដំដែក ធ្វើជាកន្លែងព្យាបាលអ្នកជំងឺកូវីដ ១៩ មកពីស្រុកចំនួន៣ជាប់ព្រំប្រទល់គ្នាដែលត្រូវបានកំណត់ជាតំបន់ក្រហម លឿងទុំ និងលឿងនេះដែរ ខណៈគិតត្រឹមថ្ងៃទី ៧ មិថុនា មានការឆ្លងរាលដាជំងឺកូវីដ ១៩ ក្នុងសហគមន៍ស្រុកសូទ្រនិគម និងស្រុកជីក្រែងសរុបចំនួន ៦៦ នាក់ ហើយពុំទាន់អាចកំណត់មុខសញ្ញាច្បាស់លាស់អំពីប្រភពនៃការឆ្លងនៅឡើយទេ។ នេះបើតាមការអះអាងរបស់រដ្ឋបាលខេត្តសៀមរាប។
បន្ថែមពីនេះ នៅថ្ងៃទី ១០ មិថុនានេះ រដ្ឋបាលខេត្តសៀមរាប ក៏បានប្រកាសដាក់ភូមិចំនួន ៤ ទៀត ក្នុងក្រុងសៀមរាប ជាតំបន់ក្រហមផងដែរ ដោយក្នុងនោះ រដ្ឋបាលខេត្ត អំពាវនាវឲ្យអ្នកពាក់ព័ន្ធ តាមដានសុខភា និងយកសំណាកឲ្យបានគ្រប់ៗគ្នា។
រដ្ឋបាលខេត្តបានបញ្ជាក់ក្នុងសេចក្តីប្រកាសថា៖ «ការសម្រេចកំណត់តំបន់ក្រហមនេះ ក្រោយរកឃើញវិជ្ជាមានមេរោគកូវីដ ១៩ ទៅលើសព ភេទប្រុស អាយុ ៥៦ ឆ្នាំ នៅភូមិព្រៃធំ សង្កាត់ស្រង៉ែ ក្រុងសៀមរាប ដែលបានទទួលមរណភាពនៅព្រឹកថ្ងៃទី ១០ ខែមិថុនា ដោយមានទំនាក់ទំនងស្មុគស្មាញជាមួយប្រជាពលរដ្ឋក្នុងតំបន់»។
ចំណែកលោក អ៊ុំ រាត្រី អភិបាលខេត្តបន្ទាយមានជ័យ បានប្រាប់ ភ្នំពេញ ប៉ុស្តិ៍ នៅថ្ងៃទី ១០ មិថុនា ដែរថា សម្រាប់ខេត្តបន្ទាយមានជ័យ គឺបន្តដាកចេញវិធានការរដ្ឋបាល ដើម្បីទប់ស្កាត់ការឆ្លងរីករាលដាលនៃជំងឺនេះដដែល។ បន្ថែមពីនេះ លោកអះអាងថា សម្រាប់ភូមិសាស្ត្រមួយចំនួន នៅក្នុងក្រុងប៉ោយប៉ែត គឺនៅតែបន្តដាក់ជាតំបន់ក្រហម ឬមិទខ្ទប់ ក៏ព្រោះអត្រានៃការឆ្លង នៅប្រឈមខ្ពស់ក្នុងភូមិសាស្ត្រនេះ។
លោកបានបញ្ជាក់ថា៖ «តំបន់ដែលបានបិទកន្លងទៅ គឺបានបើកវិញជិតអស់ហើយ គឺនៅមានតិចតួចណាស់។ យើងមិនមានការឆ្លងចូលសហគមន៍ច្រើនទេ ។ ប៉ុន្តែយើងនៅតែបន្តវិធានការរដ្ឋបាលដដែល ដោយមិនត្រូវធ្វើធ្វេសប្រហែសនោះទេ»។
តាមលោក អ៊ុំ រាត្រី ភូមិសាស្ត្រដែលត្រូវបានបិទខ្ទប់ ចុងក្រោយនេះ គឺស្ថិតក្នុងផ្នែកខ្លះនៃភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ដែលត្រូវបានដាក់ជាតំបន់ក្រហម តាំងពីថ្ងៃទី ៦ មិថុនា បន្ទាប់ពីមើលឃើញពីហានិភ័យនៃការឆ្លងជំងឺនេះ៕
