.jpg)
ជនត្រូវចោទ និងវត្ថុតាងគ្រឿងញៀន ក្រោយពេលសមត្ថកិច្ចចាប់ខ្លួនបាន ។ រូបថត ប៉ូលិស
ភ្នំពេញៈ សាលាដំបូងរាជធានីភ្នំពេញកាលពីថ្ងៃទី ៩ មិថុនា បានចោទ និងឃុំជនត្រូវចោទប្រុសស្រី ៤ នាក់ ក្នុងពន្ធនាគារព្រៃស បន្ទាប់ពីចាប់ខ្លួនពួកគេជាបន្តបន្ទាប់ក្នុង ៣ ទីតាំងផ្សេងគ្នា តែមិនមែនបក្ខពួកតែមួយទេ ដែលលើកទី១ ចាប់នៅពីថ្ងៃទី ៤ មិថុនា និងទី២ លើកទៀតចាប់នៅទីតាំងផ្សេងនាថ្ងៃទី ៧ មិថុនា ក្នុងរាជធានីភ្នំពេញ ពាក់ព័ន្ធនឹងករណីជួញដូរគ្រឿងញៀនមេតំហ្វេតាមីនសរុបជិត ៤ គីឡូក្រាម។
លោកឧត្តមសេនីយ៍ទោ អ៊ិន សុង នាយករងមន្ទីរប្រឆាំងគ្រឿងញៀនបានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ១០ មិថុនាថា ជនត្រូវចោទ ទី១- ឈ្មោះ សេង ស៊ីនួន ហៅ ម៉ាលីស ភេទស្រី អាយុ ៣២ ឆ្នាំ ជនជាតិខ្មែរ, ទី២- ឈ្មោះ អ៊ុក ធី ភេទប្រុស អាយុ ៣៧ ឆ្នាំ ជនជាតិខ្មែរ។ ទី៣-ឈ្មោះ សៅ ចិត្រា ភេទប្រុស អាយុ ២៩ ឆ្នាំ ជនជាតិខ្មែរ និងទី៤- ឈ្មោះ ជា ថៃតាំ ភេទប្រុស អាយុ ៣០ ឆ្នាំ ជនជាតិខ្មែរ។ ពួកគេត្រូវបានចៅក្រមស៊ើបសួរចេញដីកាឃុំខ្លួនក្នុងពន្ធនាគារកាលពីថ្ងៃទី ៩ មិថុនា។
លោកថ្លែងថា៖ «ជនត្រូវចោទទាំង ៤ នាក់នោះ ត្រូវបានចោទប្រកាន់ពីបទជួញដូរគ្រឿងញៀនខុសច្បាប់តាមបញ្ញត្តិមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន»។
លោកបានរំឭកថា ជនត្រូវចោទទាំង៤នាក់ ត្រូវបានសមត្ថកិច្ចនៃមន្ទីរប្រឆាំងគ្រឿងញៀនបង្ក្រាបនិងឃាត់ខ្លួនក្នុង ៣ ដំណាក់កាល។ ដំណាក់ទី១ កាលពីវេលាម៉ោងជាង ៨ យប់ថ្ងៃទី ៤ ខែ មិថុនា ឆ្នាំ ២០២១ ដឹកនាំដោយលោកឧត្តមសេនីយ៍ទោ ហម គន្ធី ជានាយករងនៃមន្ទីរប្រឆាំងបទល្មើសគ្រឿងញៀនជាអ្នកដឹកនាំកម្លាំងជំនាញ (ក៦) និងមានការសម្របសម្រួលពីលោក វង្ស សាវ៉ាត ព្រះរាជអាជ្ញារងអមសាលាដំបូងរាជធានីភ្នំពេញ ចុះបង្ក្រាបនៅចំណុចផ្លូវលំ ផ្ទះជួល ស្ថិតក្នុងភូមិប៉ប្រក សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។
ប្រតិបត្តិការនេះសមត្ថកិច្ចបានឃាត់ខ្លួនជនសង្ស័យ ២ នាក់ ឈ្មោះ សេង ស៊ីនួន ហៅ ម៉ាលីស ភេទស្រី អាយុ ៣២ ឆ្នាំ ជនជាតិខ្មែរ, ទី២- ឈ្មោះ អ៊ុក ធី ភេទប្រុស អាយុ ៣៧ ឆ្នាំ ជនជាតិខ្មែរ។ ចំពោះវត្ថុតាងមានគ្រឿងញៀនប្រភេទមេតំហ្វេតាមីន (ICE) ទម្ងន់សុទ្ធ ១ ៥៨៧,៨៤ ក្រាម។
លោកបន្តថា ដំណាក់កាលទី២ គឺនៅថ្ងៃទី ៧ ខែ មិថុនា ឆ្នាំ ២០២១ វេលាម៉ោងជាង ១ រំលងអធាត្រ របស់កម្លាំងជំនាញ (ក១១) នៃមន្ទីរប្រឆាំងបទល្មើសគ្រឿងញៀនដឹកនាំដោយលោកឧត្តមសេនីយ៍ត្រី អាំ សុជាតិ និងលោកវរសេនីយ៍ យា ប៊ុនណារត្ន័ន៍ នាយករងមន្ទីរប្រឆាំងបទល្មើសគ្រឿងញៀន និងមានការសម្របសម្រួលពីលោក វង្ស សាវ៉ាត ព្រះរាជអាជ្ញារងអមសាលាដំបូងរាជធានីភ្នំពេញ។ ប្រតិបត្តិការនេះបង្ក្រាបនៅចំណុចផ្ទះសំណាក់សម្បត្តិលាភ បន្ទប់លេខ ២៤ ស្ថិតក្នុងភូមិដើមគ សង្កាត់ជ្រោយចង្វារខណ្ឌជ្រោយចង្វាររាជធានីភ្នំពេញ។
ក្នុងនោះសមត្ថកិច្ចឃាត់ជនសង្ស័យបានម្នាក់ឈ្មោះ សៅ ចិត្រា ភេទប្រុស អាយុ ២៩ ឆ្នាំ ជនជាតិខ្មែរ និងរឹបអូសបានវត្ថុតាងមានម្សៅក្រាមពណ៌ស សង្ស័យមេតំហ្វេតាមីន (ICE) ១ កញ្ចប់ធំ ស្មើទម្ងន់ ៩៩៣,៤៩ ក្រាម។
ដោយឡែកការបង្ក្រាបលើកទី៣ នៅរសៀលថ្ងៃទី ៧ ខែ មិថុនា ឆ្នាំ ២០២១ របស់កម្លាំងជំនាញ (ក៥) នៃមន្ទីរប្រឆាំងបទល្មើសគ្រឿងញៀនដឹកនាំដោយលោកឧត្តមសេនីយ៍ទោ សាន សុទ្ធី នាយករងមន្ទីរនិងលោកវរសេនីយ៍ឯក ជាវ វណ្ណា នាយការិយាល័យ (ក៥) ដោយមានការសម្របសម្រួលពីលោក ហេង ផេង ព្រះរាជអាជ្ញារងអមសាលាដំបូងរាជធានីភ្នំពេញ។
ការបង្ក្រាបករណីជួញដូរគ្រឿងញៀននេះធ្វើឡើងនៅចំណុចគល់ស្ពានស្ទឹងមានជ័យ ស្ថិតក្នុងសង្កាត់បឹងសាឡាង ខណ្ឌទួលគោករាជធានីភ្នំពេញ។
ក្នុងប្រតិបត្តិការនោះដែរ សមត្ថកិច្ចបានឃាត់ខ្លួនជនសង្ស័យ ឈ្មោះ ជា ថៃតាំ ភេទប្រុស អាយុ ៣០ ឆ្នាំ ជនជាតិខ្មែរ និងរឹបអូសបានគ្រឿងញៀនប្រភេទមេតំហ្វេតាមីន (ICE) ១ កញ្ចប់ធំ និង ៣ កញ្ចប់តូច ស្មើនឹងទម្ងន់១ ២៩៤,៣៩ ក្រាម។ ចំពោះវត្ថុតាងគ្រឿងញៀនសរុបទាំង៣លើកមានចំនួនជាង ៣ ៨៧៥,៧២ ក្រាម៕
