ភ្នំពេញៈ សហរដ្ឋអាមេរិកបានប្រគល់វត្ថុបុរាណខ្មែរចំនួន ២៧ រូប រួមមានរូបបដិមាផ្នែកព្រះពុទ្ធសាសនា និងព្រហ្មញ្ញសាសនាសម័យអង្គរដែលត្រូវបានជួញដូរ មកឱ្យកម្ពុជាគ្រប់គ្រងវិញជាអ្វីដែលមន្ត្រីកម្ពុជា និងអាមេរិកចាត់ទុកការប្រគល់នេះថាជាផ្លែផ្កានៃការចុះអនុស្សរណៈរវាងប្រទេសទាំង ២។
លោក ជុំ សុន្ទរី ឯកអគ្គរាជទូតកម្ពុជាប្រចាំសហរដ្ឋអាមេរិក និងលោក CyrusVance Jr. រដ្ឋអាជ្ញានៃការិយាល័យរដ្ឋអាជ្ញាប្រចាំសង្កាត់ញូវយ៉កកាលពីថ្ងៃទី ៩ ខែមិថុនា បានចុះហត្ថលេខាលើកិច្ចព្រមព្រៀងរវាងកម្ពុជា និងរដ្ឋអាជ្ញានៃសង្កាត់ញូវយ៉កស្តីពីការផ្ទេរសិទ្ធិគ្រប់គ្រងវត្ថុបុរាណរបស់កម្ពុជាដែលត្រូវបានជួញដូរចំនួន ២៧ រូបពីការិយាល័យរដ្ឋអាជ្ញាមកឱ្យកម្ពុជា។
លោកបានបញ្ជាក់ក្នុងសេចក្តីប្រកាសព័ត៌មានថា៖ «ការបញ្ជូនត្រឡប់មកវិញនៃវត្ថុបុរាណទាំងនេះបានបង្ហាញឱ្យឃើញជាថ្មីនូវលទ្ធផលផ្លែផ្កានៃអនុស្សរណៈនៃការយោគយល់គ្នាចុះហត្ថលេខាដោយរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិកដែលបានបើកឡើងនូវទំព័រថ្មីនៃកិច្ចសហប្រតិបត្តិការទ្វេភាគីដ៏ល្អប្រសើរលើការអភិរក្សវប្បធម៌រវាងប្រទេសទាំង ២»។
លោកបានបន្ថែមថា៖ «យើងខ្ញុំសង្ឃឹមថា សហរដ្ឋអាមេរិកនឹងបន្តភាពជាដៃគូជាមួយប្រទេសកម្ពុជា ដើម្បីយើងអាចបញ្ឈប់ការជួញដូរសម្បត្តិវប្បធម៌ខ្មែរខុសច្បាប់ និងបញ្ជូនបេតិកភណ្ឌវប្បធម៌របស់យើងត្រឡប់ទៅកម្ពុជាវិញ»។
ស្ថានទូតកម្ពុជាប្រចាំសហរដ្ឋអាមេរិកបានបញ្ជាក់ក្នុងសេចក្តីប្រកាសព័ត៌មាននៅថ្ងៃទី ៩ ខែមិថុនាថា៖ «ក្នុងចំណោមវត្ថុបុរាណទាំងចំនួន ២៧ ដែលត្រូវបានរកឃើញមកវិញដោយការិយាល័យរដ្ឋអាជ្ញា និងក្រសួងសន្តិសុខមាតុភូមិអាមេរិករួមមានរូបបដិមាផ្នែកព្រះពុទ្ធសាសនា និងព្រហ្មញ្ញសាសនាសម័យអង្គរសំខាន់ៗមួយចំនួនដូចជា៖ ព្រះពុទ្ធគង់សមាធិលើនាគធ្វើពីសំរឹទ្ធ រូបព្រះឥសូរ និងព្រះនាងប្រាជ្ញាបារមិតាធ្វើពីថ្មភក់»។ល។
ស្ថានទូតកម្ពុជាបញ្ជាក់ថា៖ «ក្រសួងវប្បធម៌ និងវិចិត្រសិល្បៈបានដើរតួនាទីយ៉ាងសំខាន់ក្នុងការសម្របសម្រួល និងការចុះហត្ថលេខាលើកិច្ចព្រមព្រៀងជាប្រវត្តិសាស្ត្រនេះជាមួយការិយាល័យរដ្ឋអាជ្ញា»។
លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានចូលរួមពិធីនេះតាមរយៈប្រព័ន្ធវីដេអូពីភ្នំពេញមក ដើម្បីជាសាក្សីក្នុងការចុះហត្ថលេខានេះ។ រីឯលោកឯកអគ្គរាជទូត កែ សុវណ្ណ តំណាងអចិន្រៃ្តយ៍នៃកម្ពុជាប្រចាំនៅអង្គការសហប្រជាជាតិក៏មានវត្តមានចូលរួមផងដែរ។
ក្នុងពេលថ្លែងទៅកាន់ពិធីចុះហត្ថលេខានោះ លោកស្រី ភឿង សកុណា បានសម្តែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការ និងការខិតខំប្រឹងប្រែងពីសំណាក់ការិយាល័យរដ្ឋអាជ្ញាសហរដ្ឋអាមេរិកប្រចាំសង្កាត់ញូវយ៉ក ក្រសួងសន្តិសុខមាតុភូមិសហរដ្ឋអាមេរិក ស្ថានទូតសហរដ្ឋអាមេរិកប្រចាំនៅកម្ពុជា និងស្ថានទូតកម្ពុជាប្រចាំសហរដ្ឋអាមេរិក ព្រមទាំងក្រុមការងារនៃក្រសួងវប្បធម៌ និងវិចិត្រសិល្បៈកម្ពុជាក្នុងការបញ្ជូនសម្បត្តិវប្បធម៌ទាំងនេះត្រឡប់មកមាតុភូមិកម្ពុជាវិញ។ នេះបើយោងតាមសេចក្តីប្រកាសព័ត៌មានដដែល។
លោក កុយ គួង អ្នកនាំពាក្យក្រសួងការបរទេសប្រាប់ ភ្នំពេញ ប៉ុស្តិ៍ កាលពីម្សិលមិញថា បច្ចុប្បន្នទាំងវត្ថុបុរាណ ២៧ រូបនេះកំពុងស្ថិតក្នុងស្ថានទូតកម្ពុជានៅទីក្រុងវ៉ាស៊ីនតោន សហរដ្ឋអាមេរិកហើយលោកក៏មិនទាន់ដឹងថា តើវត្ថុបុរាណទាំងនេះនឹងមកកម្ពុជានៅពេលណាដែរ។
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌មិនអាចទាក់ទងសុំការបញ្ជាក់បន្ថែមបានទេកាលពីថ្ងៃម្សិលមិញ។ រីឯលោក Chad Roedemeier អ្នកនាំពាក្យស្ថានទូតអាមេរិកប្រចាំកម្ពុជាសុំមិនធ្វើអត្ថាធិប្បាយបន្ថែមដោយស្នើឱ្យភ្នំពេញប៉ុស្តិ៍យោងទៅលើសេចក្តីប្រកាសព័ត៌មានរបស់ស្ថានទូតនេះពីថ្ងៃទី ១០ ខែមិថុនា។
លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាលើកឡើងក្នុងសេចក្តីប្រកាសព័ត៌មាននេះថា៖ «ពិធីប្រគល់វត្ថុបុរាណនេះគឺជាការផ្តល់កិត្តិយសដល់កិច្ចសហប្រតិបត្តិការរវាងប្រទេសយើងទាំង ២ លើការការពារការលួច និងការជួញដូរវត្ថុបុរាណខ្មែរ។ សហរដ្ឋអាមេរិកមានមោទនភាពដែលបានដើរតួនាទីក្នុងការធានាបេតិកភណ្ឌ-វប្បធម៌របស់ប្រជាជនកម្ពុជា»។
ចំណែកលោក Cyrus VanceJr ត្រូវបានដកស្រង់សម្ដីក្នុងសេចក្តីប្រកាសព័ត៌មាននេះថា ការធ្វើមាតុភូមិនិវត្តន៍នៃវត្ថុបុរាណទាំង ២៧ នេះទៅកាន់ប្រជាជនកម្ពុជាគឺជាការផ្សារភ្ជាប់នូវទំនាក់ទំនងដ៏សំខាន់រវាងយុគបុរាណសម័យអង្គររបស់ប្រទេសកម្ពុជាជាមួយនឹងទំនៀមទម្លាប់និ ងជំនឿសម័យទំនើបដែលអស់រយៈពេលជាយូរមកហើយ ត្រូវបានរំខានដោយការលោភលន់របស់អ្នកជួញដូរវត្ថុបុរាណ។
លោកបានថ្លែងថា៖ «ពិធីថ្ងៃនេះគឺជាការរំឭកដ៏មានអានុភាពថា បុគ្គលដែលលួច និងលក់វត្ថុបុរាណសំខាន់ៗកំពុងប្រព្រឹត្តបទឧក្រិដ្ឋ មិនត្រឹមតែប្រឆាំងនឹងបេតិកភណ្ឌរបស់ប្រទេសមួយនោះទេ ប៉ុន្តែវាក៏ជាការប្រឆាំងនឹងបច្ចុប្បន្នកាល និងអនាគតកាលផងដែរ»។
លោក កុយ គួង អ្នកនាំពាក្យក្រសួងការបរទេសប្រាប់ ភ្នំពេញ ប៉ុស្តិ៍ កាលពីម្សិលមិញថា តាមការបញ្ជាក់បន្ថែមពីស្ថានទូតកម្ពុជានៅទីក្រុងវ៉ាស៊ីនតោន សហរដ្ឋអាមេរិក វត្ថុបុរាណចំនួន ២៧ រូប កំពុងស្ថិតនៅក្រុមហ៊ុន Museum Partner ដើម្បីរៀបចំបញ្ជូនមកកម្ពុជាវិញ៕