.jpg)
កំពង់ឆ្នាំងៈ ក្រុមគ្រូពេទ្យបានចុះទៅយកសំណាកអ្នករត់តាក់ស៊ី និង អ្នកពាក់ព័ន្ធនៅចំណតផ្សារលើក្រុងកំពង់ឆ្នាំងកាលពីម្សិលមិញ បន្ទាប់ពីរដ្ឋបាលក្រុងប្រកាសផ្អាកជាបណ្តោះអាសន្នចំពោះអ្នកបើកបររថយន្តតាក់ស៊ីទាំងអស់ក្នុងក្រុងកំពង់ឆ្នាំងដែលធ្វើដំណើរទៅកាន់តំបន់ផ្សេងៗ ដោយសារមានករណីអ្នកបើកបរ ២ នាក់មានផ្ទុកវីរុសកូវីដ ១៩។
លោក យិន សាវ៉េន អភិបាលក្រុងកំពង់ឆ្នាំងបានប្រាប់ភ្នំពេញ-ប៉ុស្ដិ៍កាលពីម្សិលមិញថា ក្រុមគ្រូពេទ្យបានចុះយកសំណាកពីអ្នករត់តាក់ស៊ី និងអ្នកពាក់ព័ន្ធបានចំនួន ១២០ នាក់តែលទ្ធផលអវិជ្ជមានទាំងអស់។ ហេតុនេះអាជ្ញាធរក្រុងបានអនុញ្ញាតឱ្យដំណើរការឡើងវិញធម្មតានៅរសៀលថ្ងៃទី ១០ ខែមិថុនា។
លោកថ្លែងថា៖ « អ្នករត់តាក់ស៊ីនៅក្រុងកំពង់ឆ្នាំងទាំងអស់មាន ៥១ នាក់ ប៉ុន្តែមានពលរដ្ឋផ្សេងទៀតបានមកចូលរួមពិនិត្យតាមការប្រកាសអំពាវនាវរបស់អាជ្ញាធរ។ ជាលទ្ធផលអ្នកមកយកសំណាកទាំងអស់មាន ១២០ នាក់ ហើយសុទ្ធតែអវិជ្ជមានកូវីដ ១៩។ អ៊ីចឹង ឥឡូវយើងបានឱ្យពួកគាត់ដំណើរការដឹកភ្ញៀវឡើងវិញហើយ»។
សេចក្តីជូនដំណឹងរបស់រដ្ឋបាលក្រុងកំពង់ឆ្នាំងពីថ្ងៃទី ៩ ខែមិថុនា ឱ្យដឹងថា ក្រុមគ្រូពេទ្យបានរកឃើញវិជ្ជមានកូវីដ ១៩ ចំនួន ២ នាក់លើអ្នកបើកបរតាក់ស៊ីក្នុងក្រុងកំពង់ឆ្នាំង។
ចំណតរថយន្តក្រុងកំពង់ឆ្នាំងត្រូវបានអាជ្ញាធរក្រុងប្រកាសបិទមិនឱ្យដឹកភ្ញៀវចេញទៅភ្នំពេញ និងតំបន់ដទៃទៀតទេ។
សេចក្តីជូនដំណឹងនោះបញ្ជាក់ថា អ្នកបើកបររថយន្តតាក់ស៊ីទាំងអស់ក្នុងក្រុងកំពង់ឆ្នាំងត្រូវផ្អាកជាបណ្តោះអាសន្ន ដើម្បីទៅយកសំណាកនៅទីតាំងចំណតរថយន្តនៅផ្សារលើក្រុងកំពង់ឆ្នាំងចាប់ពីម៉ោង ៤ ព្រឹកថ្ងៃទី ១០ ខែមិថុនា ជាកំហិត។ ករណីមិនព្រមអនុវត្តតាម រដ្ឋបាលក្រុងនឹងចាត់វិធានការតាមច្បាប់។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងថ្លែងថា អ្នកដែលយកសំណាកត្រូវបានឱ្យត្រឡប់ទៅផ្ទះវិញធម្មតាដោយមិនមានការធ្វើចត្តាឡីស័កអ្វីទេ។ ការយកសំណាកនេះដោយសារបារម្ភខ្លាចមានអ្នករត់តាក់ស៊ីផ្សេងទៀតមានជំងឺកូវីដ ១៩ ដែលអាចឆ្លងអ្នកដំណើរ។
លោកថា៖ «រឿងហ្នឹងដោយសារយើងចេះតែកត់សម្គាល់ឃើញមានអ្នករត់តាក់ស៊ីកើតជំងឺកូវីដ ១៩ យើងឃើញមាន ២ នាក់ហើយដែលមានជំងឺហ្នឹងអ៊ីចឹង ដើម្បីបង្ការខ្លាចក្រែងមានអ្នករត់តាក់ស៊ីផ្សេងទៀតមានជំងឺហ្នឹងដែរបានជាយើងស្រាវជ្រាវរកមើលតែប៉ុណ្ណឹង»។
ស្រដៀងគ្នានេះរដ្ឋបាលខេត្តឧត្តរមានជ័យបានសម្រេចផ្អាកបណ្តោះអាសន្នអាជីវកម្មចំណតរថយន្តអូរស្មាច់ស្ថិតនៅភូមិអូរស្មាច់ សង្កាត់អូរស្មាច់ ក្រុងសំរោងផងដែរ ក្រោយរកឃើញអ្នកឆ្លងជំងឺកូវីដ ២ នាក់ស្នាក់នៅចំណតរថយន្តនោះ។
នាយករដ្ឋបាលខេត្តឧត្តរមានជ័យលោក ជា ពិសិដ្ឋ ថ្លែងពីម្សិលមិញថា ការផ្អាកចំណតរថយន្តអូរស្មាច់នេះចាប់ពីថ្ងៃទី ៩ ខែមិថុនា រហូតដល់មានការសម្រេចជាថ្មី។
លោកថា៖ «ក្នុងអំឡុងពេលការផ្អាកអាជីវកម្មបណ្តោះអាសន្ន ម្ចាស់ទីតាំងត្រូវគោរពឱ្យបានម៉ឺងម៉ាត់តាមវិធានការរដ្ឋបាល វិធានការសុខាភិបាល»៕
