ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានធ្វើការណែនាំទៅដល់ម្ចាស់ ឬនាយករោងចក្រ សហគ្រាស និងកម្មករនិយោជិតទាំងអស់ក្នុងប្រទេសកម្ពុជា ឱ្យធ្វើបច្ចុប្បន្នភាពអាស័យដ្ឋានស្នាក់នៅបច្ចុប្បន្នរបស់កម្មករ និយោជិតទៅឱ្យអាជ្ញាធរមានសមត្ថកិច្ច ដើម្បីងាយគ្រប់គ្រងទៅលើកម្មករក្នុងអំឡុងពេលឆ្លងរីករាលដាលជំងឺកូវីដ ១៩។
លោក អ៊ិត សំហេង បានលើកឡើងនៅថ្ងៃទី ១០ ខែមិថុនា តាមរយៈសេចក្តីជូនដំណឹងថា យោងតម្រូវការចាំបាច់របស់រដ្ឋបាលរាជធានីភ្នំពេញ ក្រសួងការងារ ណែនាំដល់ម្ចាស់ ឬនាយករោងចក្រ សហគ្រាស និងកម្មករនិយោជិតទាំងអស់ ធ្វើបច្ចុប្បន្នភាពអាសយដ្ឋានស្នាក់នៅបច្ចុប្បន្នពិតប្រាកដរបស់កម្មករ-កម្មការិនី ដែលមានលេខផ្ទះ ឬលេខបន្ទប់ជួល ភូមិ ឃុំ/សង្កាត់ ក្រុង-ស្រុក-ខណ្ឌ និងរាជធានី-ខេត្ត របស់កម្មករ និយោជិតទាំងនោះឱ្យបានច្បាស់។
លោកបានបន្តថា៖ «ត្រូវធ្វើបច្ចុប្បន្នភាពកម្មកររួចហើយ បញ្ជូនមកក្រសួងឱ្យបានមុនថ្ងៃទី ២៥ ខែមិថុនា»។
ចំណែកកម្មករ និយោជិត ត្រូវធ្វើការសាកសួរទៅម្ចាស់ផ្ទះជួល ដើម្បីផ្តល់អាសយដ្ឋានស្នាក់នៅបច្ចុប្បន្នពិតប្រាកដ ដើម្បីផ្តល់ទៅឱ្យអ្នកទទួលបន្ទុករដ្ឋបាលរោងចក្រ សហគ្រាសដែលខ្លួនធ្វើការ និងត្រូវត្រៀមរូបថត ៤x៦ ចំនួន ៣ សន្លឹក និងសហការផ្តល់ព័ត៌មានអំពីអាសយដ្ឋានស្នាក់នៅក្នុងពេលបច្ចុប្បន្ន និងព័ត៌មានចាំបាច់តាមការកំណត់ ជូនអាជ្ញាធរមានសមត្ថកិច្ចនៅក្នុងពេលខាងមុខ។
សេចក្តីជូនដំណឹងរបស់លោក អ៊ិត សំហេង នេះបានធ្វើឡើង បន្ទាប់ពីលោក ឃួង ស្រេង អភិបាលរាជធានីភ្នំពេញបានស្នើឱ្យក្រសួងការងារ ធ្វើបច្ចុប្បន្នភាពបញ្ជីស្នាក់នៅរបស់កម្មករ-កម្មការិនីឱ្យបានច្បាស់លាស់ ដើម្បីឱ្យអាជ្ញាធរងាយស្រួលគ្រប់គ្រងទៅលើកម្មករក្នុងអំឡុងពេលមានការឆ្លងរីករាលដាលជំងឺកូវីដ ១៩។
លោក ឃួង ស្រេង បានលើកឡើងនៅក្នុងកិច្ចប្រជុំនាថ្ងៃទី ៨ ខែមិថុនាថា៖ «ការធ្វើបច្ចុប្បន្នភាពរបស់បងប្អូនកម្មករ កម្មការិនីរស់នៅគឺបង្កភាពងាយស្រួល ក្នុងការគ្រប់គ្រងក្នុងការទប់ស្កាត់ការឆ្លងរាលដាលនៃជំងឺកូវីដ ១៩ នៅតាមរោងចក្រតាមបន្ទប់ជួលដែលបងប្អូនកម្មករ-កម្មការិនីរស់នៅទាំងអស់ក្នុងរាជធានីភ្នំពេញ»។
ជាមួយគ្នានេះដែរ សមាគមរោងចក្រកាត់ដេរនៅកម្ពុជានឹងធ្វើការផ្សព្វផ្សាយ និងធ្វើការណែនាំបន្តទៅដល់បណ្តារោងចក្រដែលជាសមាជិកអំពីព័ត៌មាននេះ នៅពេលដែលក្រសួងការងារ ចេញសេចក្តីណែនាំណាមួយពាក់ព័ន្ធនឹងការធ្វើបច្ចុប្បន្នភាព បញ្ជីស្នាក់នៅរបស់កម្មករ-កម្មការិនី។ នេះបើតាម អគ្គលេខាធិការរងសមាគមរោងចក្រកាត់ដេរនៅកម្ពុជា លោក កាំង ម៉ូនីកា ដែលបានប្រាប់ភ្នំពេញប៉ុស្តិ៍នៅថ្ងៃទី ៩ មិថុនា៕