.jpg)
លោក ស ខេង រដ្ឋមន្ត្រីក្រសួងមហាផ្ទៃ និង លោក MIKAMI Masahiro ឯកអគ្គរាជទូតជប៉ុនប្រចាំនៅកម្ពុជា នៅក្នុងជំនួបកាលពីថ្ងៃទី ១០ មិថុនា។ រូបថតក្រសួងមហាផ្ទៃ
ភ្នំពេញៈ ក្រៅពីការចូលរួមចំណែកក្នុងការជួយគាំទ្រ ដើម្បីទប់ស្កាត់ការរីករាលនៃជំងឺកូវីដ ១៩ ក៏ដូចជាការជួយគាំទ្រលើកកម្ពស់សុខុមាលភាព និងជីវភាពរស់នៅរបស់ប្រជាជនកម្ពុជា រដ្ឋាភិបាលជប៉ុនបានសន្យាបន្តផ្តល់អាហារូបករណ៍ សម្រាប់ធ្វើការបណ្តុះបណ្តាលធនធានមនុស្ស ជាពិសេសមន្ត្រីវ័យក្មេងរបស់ក្រសួងមហាផ្ទៃ ដើម្បីចូលរួមក្នុងដំណើរការអភិវឌ្ឍ សង្គមជាតិ ស្របតាមគោលការណ៍កំណែទម្រង់វិមជ្ឈការ និងវិសហមជ្ឈការរបស់កម្ពុជា។
នេះបើតាមការថ្លែងរបស់លោក MIKAMI Masahiro ឯកអគ្គរាជទូតជប៉ុន ប្រចាំនៅកម្ពុជានៅក្នុងជំនួបសម្ដែងការគួរសម និងពិភាក្សាការងារជាមួយ លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃនៅថ្ងៃទី ១០ ខែមិថុនា។
លោក MIKAMI Masahiro ថ្លែងថា៖ «ថ្វីដ្បិតតែមានបញ្ហាប្រឈមដោយជំងឺកូវីដ ១៩ ក៏ប៉ុន្តែរដ្ឋាភិបាលជប៉ុននៅតែបន្តគាំទ្រដល់ការពង្រឹងសមត្ថភាព តាមរយៈការផ្ដល់អាហារូបករណ៍ និងវគ្គបណ្ដុះបណ្ដាលនានាដល់មន្ត្រីក្រសួងមហាផ្ទៃ»។
លោក MIKAMI Masahiro សង្ឃឹមថា ស្ថានទូតជប៉ុននឹងពង្រីកកិច្ចសហប្រតិបត្តិការនេះឱ្យកាន់តែទូលំទូលាយថែមទៀត ដើម្បីធ្វើយ៉ាងណាបន្តបណ្ដុះបណ្ដាលធនធានមនុស្សល្អៗ និងជាមន្ដ្រីវ័យក្មេង សម្រាប់ចូលរួមក្នុងដំណើរការអភិវឌ្ឍសង្គមជាតិ ស្របតាមគោលការណ៍កំណែទម្រង់វិមជ្ឈការ និងវិសហមជ្ឈការរបស់កម្ពុជា។
នៅក្នុងជំនួបនោះលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្ដែងក្ដីរីករាយចំពោះគោលបំណងរបស់ជប៉ុនក្នុងការបន្តជួយគាំទ្រដល់កិច្ចសហប្រតិបត្តិការ លើការបណ្ដុះបណ្ដាលធនធានមនុស្ស និងសំណូមពរដល់រាជរដ្ឋាភិបាលជប៉ុន បន្តជួយគាំទ្រដល់ផ្នែកនេះ ស្របតាមតម្រូវការនៃកំណែទម្រង់វិមជ្ឈការ និងវិសហមជ្ឈការនៅកម្ពុជាក្នុងគោលដៅអភិវឌ្ឍសង្គមជាតិឱ្យមានការរីកចម្រើន។
លោក ស ខេង បញ្ជាក់ថា៖ «ជំនួយគាំទ្រនានាដែលរដ្ឋាភិបាលជប៉ុនបានផ្ដល់ជូនរាជរដ្ឋាភិបាលកម្ពុជារួមទាំងក្រសួងមហាផ្ទៃដែរ ក្នុងនោះរាប់ទាំងជំនួយផ្នែកសុខាភិបាល ការផ្ដល់កម្ចីសម្រាប់អនុវត្តគោលនយោបាយសង្គម និងការជួយគាំទ្រដល់ការបណ្ដុះបណ្ដាល ធនធានមនុស្ស បានរួមចំណែកដល់ដំណើរការកំណែទម្រង់វិមជ្ឈការ និងវិសហមជ្ឈការនៅកម្ពុជា»។
បើតាមលោក ស ខេង បច្ចុប្បន្នរាជរដ្ឋាភិបាលកម្ពុជាកំពុងរៀបចំផែនការរយៈពេល ១០ ឆ្នាំបន្តទៀតក្នុងដំណើរការកំណែទម្រង់វិមជ្ឈការ និងវិសហមជ្ឈការរបស់ខ្លួន ដែលដំណាក់កាលនេះ គឺជាដំណាក់កាលដ៏មានសារៈសំខាន់ក្នុងការផ្ទេរសិទ្ធិអំណាច និងធនធានការទៅដល់រដ្ឋបាលថ្នាក់ក្រោមជាតិ ជាពិសេសធនធានមនុស្ស៕
