បន្ទាយមានជ័យៈ បុរសម្នាក់ត្រូវបានតំណាងអយ្យការចោទប្រកាន់ និងបញ្ជូនទៅឲ្យចៅក្រមស៊ើបសួរនៃសាលាដំបូងខេត្តបន្ទាយមានជ័យចាត់ការបន្តតាមនីតិវិធីកាលពីថ្ងៃទី ១០ ខែមិថុនា ពាក់ព័ន្ធនឹងការបន្លំធ្វើជាក្រឡាបញ្ជីដើរបោកលុយពីពលរដ្ឋ ក្រោយពីត្រូវបានឃាត់ខ្លួនកាលពីថ្ងៃទី ៨ មិថុនា។
អ្នកនាំពាក្យសាលាដំបូងខេត្តបន្ទាយមានជ័យលោក សំរិទ្ធ សុខុន ប្រាប់ពីម្សិលមិញថា ជនត្រូវចោទឈ្មោះ នី ឆេងឡេង ភេទប្រុសអាយុ ២៤ ឆ្នាំរស់នៅភូមិក្បាលស្ពាន ១ សង្កាត់-ក្រុងប៉ោយប៉ែត។ ជននេះត្រូវបានតំណាងអយ្យការចោទពីបទឆបោក និងបញ្ជូនទៅចៅក្រមស៊ើបសួរ ដើម្បីចាត់ការសាកសួរតាមនីតិវិធីបន្តទៀត។
លោកថ្លែងថា៖ «លោកព្រះរាជអាជ្ញារង ស៊ិន វិសុទ្ធ ដែលជាតំណាងអយ្យការបានចោទប្រកាន់ពីបទឆបោកតាមបញ្ញត្តិមាត្រា ៣៧៧ និង ៣៧៨ នៃក្រមព្រហ្មទណ្ឌ។ ជនម្នាក់នេះមិនមែនជាក្រឡាបញ្ជីនៅក្នុងតុលាការខេត្តទេ»។
លោក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យទទួលការងារផែនយុត្តិធម៌ឱ្យដឹងនៅថ្ងៃទី ១០ មិថុនា តាមសម្តីជនរងគ្រោះចំនួន ៣ នាក់ថា ជនសង្ស័យឈ្មោះ នី ឆេងឡេង បានអួតអាងប្រាប់ជនរងគ្រោះថា រូបគេជាក្រឡាបញ្ជី និងជាជំនួយការផ្ទាល់របស់លោកចៅក្រម អាំង ចិន្ដា នៅសាលាដំបូងខេត្តបន្ទាយមានជ័យ។ ប៉ុន្តែតាមពិតគ្មានមុខរបរអ្វីទេ។
លោកថា ជនសង្ស័យបានប្រើល្បិចបោកលុយពីជនរងគ្រោះជាច្រើននាក់អស់ជាច្រើនពាន់ដុល្លារហើយគេចខ្លួនរហូត។ លុះដល់ថ្ងៃទី ៨ មិថុនា ក៏ស្រាប់តែជនរងគ្រោះប្រទះឃើញជនសង្ស័យនៅក្រុងប៉ោយប៉ែតហើយក៏នាំគ្នាចាប់ខ្លួនប្រគល់ឱ្យកងរាជអាវុធហត្ថក្រុងប៉ោយប៉ែតតែម្តង។ ស្របពេលនោះជនរងគ្រោះក៏បានដាក់ពាក្យបណ្តឹងនៅបញ្ជាការដ្ឋានកងរាជអាវុធហត្ថក្រុងប៉ោយប៉ែត ដែលមានឈ្មោះ ស៊ុំ ម៉ាលី ភេទស្រី អាយុ ២៦ ឆ្នាំឈ្មោះ វុទ្ធី វណ្ណថា ភេទប្រុស អាយុ ២៩ ឆ្នាំ និងឈ្មោះ សួន ស៊ីម៉ាប់ អាយុ ៤១ ឆ្នាំ។
លោកបញ្ជាក់ថា៖ «រឿងឆបោកនេះមិនមែនមានតែជនរងគ្រោះ ៣ នាក់ទេ ប៉ុន្តែជាក់ស្តែងអង្គភាពរបស់ខ្ញុំទទួលបានបណ្តឹងតែ ៣ នាក់ទេ។ ពួកគាត់ចាញ់បោកជនសង្ស័យ ដែលអាចដល់ខ្ទង់ពាន់ដុល្លារផង»។
ពីម្សិលមិញ ភ្នំពេញ ប៉ុស្តិ៍ មិនអាចទាក់ទងលោក នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត ដើម្បីបញ្ជាក់បន្ថែមទេ។ ប៉ុន្តែបើតាមរបាយការណ៍របស់បញ្ជាការដ្ឋានកងរាជអាវុធហត្ថក្រុងប៉ោយប៉ែត ជនសង្ស័យបានឆ្លើយសារភាពថានៅថ្ងៃទី ៣ ខែ មេសា ឆ្នាំ ២០២១ គាត់បានមកធ្វើការផ្នែកជំនួយការចៅក្រមនៅសាលាដំបូងខេត្តបន្ទាយមានជ័យ។
ចាប់តាំងពីពេលនោះមករហូតដល់ថ្ងៃទី ៨ ខែឧសភា គាត់បានដើរបោកប្រាក់ជនរងគ្រោះនៅក្រុងប៉ោយប៉ែតបានជាបន្តបន្ទាប់។ គាត់បានប្រាប់គេថា គាត់ជាក្រឡាបញ្ជី និងជាជំនួយការរបស់លោកចៅក្រម អាំង ចិន្ដា។ មនុស្សជាច្រើនបានពឹងពាក់គាត់ឱ្យជួយរត់ការរឿងប្លង់ដី៕